Finata

Pwi me fefinei, me mwen ai upwe poputani ai afanafan ikenai, ua mochen pwarata pwe ruanu tempel minafo repwe kauta non ekkewe maram me ier repwap feito non ekkei neni: Quito, Ecuador; Harare, Zimbabwe; Belém, Brazil; me ewe oruan tempel non Lima, Peru.

Nupwen ua choni ewe mwichen Engon me Ruemon Aposel non 1963, mi wor 12 tempel non ewe Mwichefen. Ren ach epinano ewe Provo City Center Tempel ru wik ano, iei mi wor 150 tempel ekis meinisin won fonufan. Sia fokkun kinisou ren ekkewe feioch sia angei non ekkei imw mi pin.

Iei, pwi me fefinei, ua mochen apasa ai kinisou ren ei tufich ai upwe aporausa mefiei ngenikemi non ei nesessor.

Non ekkewe ran ua fen ekieki usun finiach kewe. Aramas ra fen apasa pwe kukkun mettoch mi tongeni esenipato mettoch mi watte non uruon ewe fonufan me non manauen aramas. Finiach kewe ra esenipato met sipwe winiti.

Nupwen sia feino seni manauach me mwen ei fonufan me sia uputiw won fonufan, sia pwan uwei ach niffangen pungun finata. Ach kokkot ach sipwe tori ewe ningen akkar, me ika sipwe apwonueta ach kokkot a anongonong won finiach kewe.

Chommong me neimi mi sinei usun ewe emon itan Alice non ewe puk an Lewis Carroll itan Alice’s Adventures in Wonderland. Oupwe chechemeni pwe a tori eu neni ren ru aan, ir me ru mi soposopono nge ra feino ngeni ru neni mi sokofesen. Nupwen a ekiek usun meni aan epwe fiti, a chufengen ren emon katu, Alice a eisini ewe katu, “Menni aan upwe fiti?”

Ewe katu a ponueni, “A anongonong won ia ka mochen feino ia. Ika kese sinei ia ka mochen feino ia, ese nifinifin Menni aan ka fiti.”¹

Sise usun Alice, sia sinei ia sia mochen feino ia, me mi auchea Menni aan sia fiti, pokiten ewe aan sia fiti non ei manau epwe emwenikich ngeni ia sipwe nom ia non ewe manau mwirin ei manau.

Amo ita sipwe finata ne pwisin apochokunata ach nuku mi amwarar me manaman minne epwe epetikich seni ekkewe kokkotun ewe chon ungeni kich—nuku mi ennet, ewe sokkun nuku minne epwe apochokuna me anisi kich ren ach mochen fori mi pung. Ika ese wor ei sokkun nuku me rech, sisap feino ekis. Ren ei sokkun nuku, sia tongeni apwonueta ach kokkot.

Ina mwo pwe mi namwot sipwe finata mettoch fiti mirit, fan ekkoch sipwe finata mettoch mi tiparoch. Ewe niffangen aier, seni ach Chon Amanau, a atufichikich ach sipwe awena ia sia feino ia, pwe sipwe tongeni niwiniti ewe aan minne epwe emweni kich ngeni ewe ningen akkar minne sia kutta.

Amo ita sipwe pworacho ach sisap fiti met chok aramas mi ekieki. Amo ita sipwe kan fini ewe pung mi weires nap seni ewe ngau mi mecheres.

Nupwen sia ekieki usun met sia finata non manauach iteiten ran—ese nifinifin met sia finata—ika sia finata Kraist, sia fen finata met mi pung.

Iei ai ennetin iotek fiti tipetekison pwe sipwe non iten Jises Kraist, ach Samon me Chon Amanau, amen.