Ennaan eo an Būreejtōnji eo Kein Kajuon, Juun 2016
Jemed, Ad Rūkaki
Jān Būreejtōn Dieter F. Uchtdorf
Rikapilōklōk eo Kein Karuo ilo Būreejtōnji eo Kein Kajuon
Emōj ke am̧ kōppeļļo̧k juon bo̧o̧k elōn̄ baat ko rejeplōklōk ilowaan, kadiwōj namōjtak peba in kōmeļeļe eo n̄an karōki, im ļōmņak, “Āinwōt menin ejjab jim̧we”?
Jet iien, jej kōjekdo̧o̧n kōtmāne ko ad rem̧m̧antata im lōke eo ad make, jej kadiwōj namōjtak baat ko rejeplōklōk im kajjitōk, “Mōttan eo ej jerbal n̄an ta?” ak “Elmen an naaj baat in eļļaak?”
Ad inepata ej ļapļo̧k ilo ad kalimjōke bo̧o̧k eo im kile juon naan in kōmeļeļe ie ej ba, “N̄an karōk baat ko ej aikuj—bwe armej eo en 8 iiō im rūttoļo̧k.” Kōnke ejjan̄in wōr ad meļeļe kilen karōki, menin ejjab maron̄ kōļapļo̧k lōke eo ad ak bōklōkōt eo ad em̧m̧an.
Jet iien, ej wōr ad ejja kain en̄jake in ilo gospel in. Ilo ad kalimjōk jet iaan baat ko rejeplōklōk an mōņakjen eo, jemaron̄ kūrij bōrad im ļōmņak baat eo ej jerbal n̄an ta. Ak ilo ad etale bar juon baat, jemaron̄ kile bwe men̄e ālkin ad kajjieon̄ lukkuun meļeļe, jej jab maron̄ jeļā etke baat eo ekar kobatok.
Jemedwōj Ilan̄ ej Ad Rūkaki
Ilo m̧ool, Jemedwōj Ilan̄ ekar letok n̄an kōj kōmeļeļe ko rem̧m̧an n̄an karōk mour ko ad im kobaiki ippān doon men ko rem̧m̧an tata ippād. Kōmeļeļe kein rej jerbal mekarta jete ad iiō ak jekjek eo jeped ie. Ekar letok n̄an kōj gospel eo im Kabun̄ eo an Jisōs Kraist. Ekar letok n̄an kōj karōk in pinmuur eo, karōk in lo̧mo̧o̧r eo, aaet karōk in m̧ōņōņō eo. Ejjan̄in kōmakeļo̧k kōj make kōn aolep n̄ūrbōktak kein ak apan̄ kein an mour, ba, “En̄ ņe waj. Jeraam̧m̧an. Pukōt kilen.”
Eļan̄n̄e jenaaj kijenmej wōt im reilo̧k kōn juon bōro ettā im juon bōro einem̧m̧an, jenaaj loe bwe Anij ekar letok n̄an kōj elōn̄ kein jerbal ko rem̧m̧anļo̧k n̄an meļeļe kōmeļeļe ko An reppen n̄an m̧ōņōņō eo ad ilo mour in:
-
Ekar letok n̄an kōj menin letok eo ejjeļo̧k wōņāān Jetōb Kwojarjar eo, eo ewōr an jibadbad n̄an erom m̧ōttad, rijipan̄ eo ad jān lan̄ ilo ad katak naan ko an Anij im kajjieon̄ bōktok ļōmņak ko im m̧akūtkūt ko ad im kajim̧weik ippān naan ko An.
-
Ekar letok n̄an kōj 24/7 ad maron̄ tōpar E ilo jar ko retōmak im wūjlepļo̧k ko kōn bōro em̧ool.
-
Ekar letok n̄an kōj rijilōk ro raan kein im rikanaan ro, ro rej kwaļo̧k naan ko an Anij ilo raan kein ad im ewōr ippāer mālim eo n̄an likwōj ak liāp jabdewōt men ioon laļ im ilo lan̄.
-
Ekar kōjepļaaktok Kabun̄ in An—juon doulul in ritōmak ro rej jerbal ippān doon n̄an jipan̄ doon ilo aer jerbal e lo̧mo̧o̧r eo aer make kōn mijak, wudiddid, im lan̄lōn̄ āinjuon jān doon.1
-
Ekar letok n̄an kōj jeje ko rekwojarjar—Naan ko An emōj aer jeje n̄an kōj.
-
Ekar letok n̄an kōj elōn̄ kein jerbal ko rekāāl raan kein n̄an jipan̄ kōj n̄an erom rikaļoor ro An. Elōn̄ wōt iaan kein jerbal kein rekabwilōn̄lōn̄ maron̄ loi ilo LDS.org.
Etke Jemedwōj Ilan̄ ekar letok n̄an kōj eļap jipan̄? Kōnke E ej iakwe kōj. Im kōnke, āinwōt E ekar ba Ippān Make, “Bwe lo, en̄in ej jerbal eo Aō im aiboojoj eo Aō—n̄an kakūrm̧ool jab wabanban im mour indeeo an armej.”2
Ilo naan ko jet, Jemedwōj Ilan̄ ej ad Anij, im Anij ej juon rikakpilōklōk n̄an kōj.
Jemed Ilan̄ ejeļā aikuj ko an ajri ro nejin eļapļo̧k jān jabdewōt armej. Ej jerbal eo An in im aiboojoj eo n̄an jipan̄ kōj aolep iaļ, letok n̄an kōj jipan̄ ko rekabwilōn̄lōn̄ ilo ānbwin im jetōb n̄an jipan̄ kōj ilo iaļ in ad n̄an ro̧o̧lļo̧k n̄an E.
Aolep Baba rej juon Rūkaki
Ilo jet jikin ilo laļ in, baba ro rej utiej kōn baam̧le ko im jukjukinpād ilo allōn̄ in Juun. Ej aolep iien em̧m̧an n̄an nōbar im kautiej ro jined im jemed. Baba ro rej kōm̧m̧ane elōn̄ men ko n̄an baam̧le ko aer im ewōr ippāer m̧wil ko rem̧m̧an. Ruo iaan eddo ko relukkuun aorōk ewōr ippān baba ro n̄an ajri ro nejier rej erom juon waanjon̄ok im juon rūkaki. Baba ro rej kōm̧m̧an eļapļo̧k jān aer jiron̄ ajri ro nejier ta eo ejim̧we ak ebōd; rej kōm̧m̧ane ijo eļapļo̧k jān aer leļo̧k juon bok in katakin n̄an er im ļōmņak bwe er renaaj make lale n̄an ņamejļan mour in n̄an er make.
Baba ro im rej rūkaki ro an ajri ro nejier raiboojoj im rej kwaļo̧k waanjon̄ok ko aer rem̧m̧an wāween mour juon mour etiljek. Baba ro rej jāmin kōmakeļo̧k ajri ro nejier ak rej mōkajļo̧k im jipan̄ er, kajutak er ilo jabdewōt jikin rej okjak ie. Im jet iien n̄e māletlet ej men eo elmakote, baba ro rej kōtļo̧k bwe ajri ro nejier ren kakkōt, jeļā bwe ej wāween eo de in em̧m̧antata bwe ren ekkatak.
Kōj Aolep Rej Rūkaki Ro
Ilo an baba ro kōm̧m̧ane men in n̄an ajri ro nejier make, jetōb in rūkaki ej juon men eo jej aikuj in leļo̧k n̄an ajri ro nejin Anij, mekarta jon̄an iiō eo aer, ia rej pād ie, ak jekjek rot. Keememej, ajri ro Nejin Anij rej ro jeid im jatid; kōj aolep rej juon wōt ilo baam̧le eo indeeo.
Ilo wāween in, jen erom rūkaki ro—rej kōņaan in diwōjļo̧k im jipan̄ doon erom ro rem̧m̧antata. Kōnke jej ajri ro nejin Anij, ewōr ippād jibadbad n̄an erom āinwōt E. Iakwe Anij im ro m̧ōttad, kōjparok kien ko an Anij, im ļoor waanjon̄ak eo an Kraist ej iaļ eo ejim̧we, eadik, im kam̧ōņōņō ļo̧k n̄an im̧aan mejān jemedwōj ilan̄ im jinedwōj ilan̄.
Eļan̄n̄e Anij in lan̄ ko otemjej ej lukkuun kea kōn kōj bwe E ej juon rūkaki n̄an kōj, bōlen jemaron̄ barāinwōt pukōt ļo̧k ro m̧ōttad, mekarta kil rot, armej rot, jekjek rot, kajin rot, ak kabun̄ rot. Jen erom rūkaki ro rej im̧we im kōjeraam̧m̧an mour ko an ro jet—jab wōt ajri ro nejid ak barāinwōt aolep ajri ro nejin Anij ipeļaakin laļ in.
© 2016 Intellectual Reserve, Inc. Aolep jim̧we ko rej pād ippān. Jeje ilo USA. Kōmālim ilo kajin English: 6/15. Kōmālim an ukook: 6/15. Ukook eo an First Presidency Message, June 2016. Marshallese. 12866 874
Katakin jān Ennaan In
Komaron̄ in aikuj in jino kajjitikin ro kwoj katakin ļōmņak kōn juon iien me Jemedwōj Ilan̄ ekar katakin er. Innām komaron̄ in kajjitōk ippāer n̄an ļōmņak kōn wāween ko rej juon wōt ikōtaan iien eo im juon iien me rekar en̄jake aer ekkatak jān baba ro aer ioon laļ in. Kajjitōk ippāer n̄an je wāween ko rej juon wōt ilo wāween aer kar katakin. Komaron̄ kajjitōk ippāer n̄an kajjieon̄ ļoor men eo raar je ilo juon kijejeto n̄an erom juon waanjon̄ak n̄an ro jet.