Parau poro’i nā te mau tuahine hāhaere, Tiunu 2016
Te mau ’ōro’a ’e te mau fafaura’a o te hiero
’A tuatāpapa nā roto i te pure i teie materia ma te ’imi ’ia ’ite e aha te fa’a’ite atu. Nāhea te ta’a-maita’i-ra’a i « Te Utuafare : E poro’i i tō te Ao nei », e ha’amara’a i tō tātou fa’aro’o i te Atua ’e e ha’amaita’i i te feiā tā ’outou e ha’apa’o ra nā roto i te hāhaerera’a a te mau tuahine ? Nō te mau ha’amāramaramara’a hau atu, ’a haere i ni’a i te reliefsociety.lds.org.
Te Fa’aro’o, Te ’Utuāfare, Te Tōtauturu
Te tā’ato’ara’a o te mau ’ōro’a e tītauhia nō te fa’aorara’a ’e te fa’ateiteira’a, e ’āpe’ehia ïa e te mau fafaura’a i te Atua. ’Ua parau Linda K. Burton, peresideni rahi nō te Sotaiete Tauturu ē, « Te ravera’a ’e te ha’apa’ora’a i te mau fafaura’a, te aura’a ra, e mā’iti tātou ’ia tā’amu ia tātou i tō tātou ra Metua i te Raʻi ’e ia Iesu Mesia ».1
’Ua parau Elder Neil L. Andersen nō te Tino ’Ahuru Ma Piti ’āpōsetolo, « ’Ua parau te Fatu ē, ‘i roto i te mau oro’a… te mana nō te huru Atua e fa’a’itehia mai ai’.
« Tē vai nei te mau ha’amaita’ira’a ta’a ’ē nō ’ō mai i te Atua ra nō te feiā ti’amā ato’a ’o te bapetizohia, ’o te fāri’i i te Vārua Maita’i ’e ’o te rave tāmau nei i te ’ōro’a ».2
« ’Ia haere te tane ’e te vahine i te hiero », tē parau ra Elder M. Russell Ballard nō te Tino ’Ahuru ma Piti ’āpōsetolo, « e fari’i rāua to’opiti i te hō’ē ā mana, ’oia ho’i te mana no te autahu’ara’a…
« ’Ua mātara teie mana i te mau tāne ato’a ’e te mau vahine ato’a nō te tauturura’a i tō rātou orara’a. Rātou tei rave i te mau fafaura’a mo’a i mua i te Fatu ma te fa’atura i teie mau fafaura’a, ’ua mātara ïa ia rātou te heheura’a nō rātou iho, ’e e ha’amaita’ihia rātou e te utuutura’a a te mau melahi, ’e e ’āmui rātou i te Atua, ’e e fāri’i rātou i te ’īra’a o te evanelia, ’e i te hōpea roa, e riro mai rātou ’ei feiā tufa’a nō te mau mea ato’a a te Metua i piha’i iho ia Iesu Mesia ».3
Te tahi atu mau ’īrava pāpa’ira’a mo’a
1 Nephi 14:14; Te Parau Ha’api’ira’a ’e te mau Parau Fafau 25:13; 97:8; 109:22
’Ā’amu mau
I te matahiti 2007, te mahana i muri i te ’āueuera’a rahi i Peru, ’ua fārerei Elder Marcus B. Nash nō te Hitu Ahuru i te peresideni ’āma’a, ia Wenceslao Conde e i tāna vahine fa’aipoipo, ia Pamela. ’Ua ani ’o Elder Nash i te tuahine Conde e aha te huru ’o tāna mau tamari’i. Ma te mata ’ata’ata, ’ua pāhono mai ’oia ē maoti te maita’i o te Atua e mea maita’i pauroa rātou. ’Ua ani ’oia nō ni’a i te huru o tō rātou ra fare.
« ’Ua pāhono noa mai ’oia, ‘ua reva’
« … ‘Ua parau ’o Elder Nash, « ’e tē vai ’ata’ata noa ra ’oe ’a paraparau ai taua’.
« ’Ua parau mai ’oia, ‘Ē, ’ua pure au ’e tē parahi nei au ma te hau. Tē vai nei tā mātou te mau mea e hina’arohia e mātou. Tē vai nei māua tō’u hoa fa’aipoipo, tā māua mau tamari’i, ’ua tā’atihia mātou i roto i te hiero, ’e tē vai nei mātou i roto i teie nei Ekalesia fa’ahiahia, ’e tē vai nei te Fatu. E nehenehe tā mātou e patu fa’ahou nā roto i te tauturura’a a te Fatu’ …
« E aha ïa tā te ravera’a ’e te ha’apa’ora’a i te mau fafaura’a e te Atua ’o te hōro’a mai ia tātou te mana ’ia ’ata’ata i roto i te mau ’ati, ’ia fa’ariro te ’ati ’ei upo’oti’ara’a… ? »
« Te tumu ’o te Atua ïa. Tō tātou ’e’a e tae atu ai i taua mana ra e mea nā roto ïa i tā tātou mau fafaura’a e ’Ona ».4
© 2016 na Intellectual Reserve, Inc. Fatura’a pāruruhia. Nene’ihia i te Mau Hau Amui nō Marite. Parau fa’ati’a nō te reo peretane : 6/15. Parau fa’ati’a nō te iritira’a : 6/15. Iritira’a nō Visiting Teaching Message, June 2016. Tahitian. 12866 895
A feruri i teie
Nāhea te mau ’ōro’a ’e te mau fafaura’a nō te hiero e ha’apūai ’e e hōro’a i te mana ia tātou ?