Tibwauaan te Kukurei ae Aketa Tokina

Teuana te bwai ae moan te tamaroa ibukin te euangkerio bon te atatai n te babaire ni kamaiu. Ti karekea te tai ae rang n tamaroa ni maeka ma ara utu ibukin akea tokina. E na buokiira te taneiai anne n anganiira te kantaninga n te tai are ti namakina te karawawataki ni bwain te aonaaba. E reirei Beretitenti Eyring, “Tamara are i Karawa ae tangiraki e atai nanora. Ana kantaninga bwa E na anganiira te kimwareirei (taraa 2 Nibwaai 2:25). Ao ai ngaia are E anga ana bwaintituaraoi Natina bwa E na kona ni karekea te kimwareirei n ana kabaebae te utu n reitinako n aki toki. … bon te boraraoi are a kona ni karekea natin te Atua ni kabane aika a roko nakon te aonaaba.”

Te kakabwaia anne e kaineti nakoira aika ti maiuakina ae eti ngkai ao nakoia naake a tia ni mate—ma e ti kona ni karaoaki (nakoia ake a tia ni mate) rinanon ara ibuobuoki. A maeka ara bakatibu n te aba n tamnei n te tai aei, n tataningaira ni katauraoi araia ibukin otenanti n te tembora bwa a na karaoaki ibukiia. Ma n tabetai e kona ni kangaanga karaoan te mwakuri ibukiia. Ti kona n rangin n tabetabe, ke ni maeka n raroa nako man te tembora ni kona n nanako n tainako.

Ti tekeraoi, bwa iai kawai tabeua aika ti kona ni buokiia ara bakatibu iai, n aron karaoan te mwakuri n rongorongon te utu, karinanakin araia, ke te tobwa ibukiia ara karo ngkana a nakon te tembora. Man te ibuobuoki, ti beku ibukin te Uea ao ni uota te kantaninga n te utu ae akea tokina nakoia naake n iteran te aonaaba n tamnei.