Na iNuinui ni Loloma Tawamudu Vakamatavuvale

Mai na isolisoli taucoko e sa vakarautaka na Tamada Vakalomalagi dauloloma kivei ira na Luvena, na kena e uasivi duadua oya na bula tawamudu (raica na V&V 14:7). Na isolisoli oya meda bula kina ena itikotiko ni Kalou na Tamada kei na Luvena Daulomani vakamatavuvale. Ena matanitu cecere duadua ga ni Kalou, vakasilesitieli, ena tomani kina na ivau ni loloma ena bula vakamatavuvale.

Eda nuitaka taucoko na reki ni bula voli ena loloma vakamatavuvale. Ki na so vei keda, e sa dua na ka eda se bera ni sotava—e dua na ka eda kila ni rawati ia e se bera ni vakilai. Eda na rairai raica ena nodra bula tale e so. Kivei keda e so, e rairai bibi ka vakasakiti cake na loloma vakamatavuvale ni tawasei keda na mate ni dua na gone, tina, tama, tacida, ganeda, se dua na tubuda lomani ka dauloloma.

Eda sa vakila taucoko na inuinui ni dua na siga eda na vakila tale na veimaliwai totoka ni lewe ni matavuvale oya eda lomana vakalevu ka mosita tu oqo meda mokota tale.

Sa kila tu na lomada na Tamada Vakalomalagi dauloloma. Sa Nona inaki me vakamarautaki keda (raica na 2 Nifai 2:25). Ka sa solia o Koya na isolisoli ni Luvena me rawati kina na reki ni ivau vakamatavuvale ka sa tomani me tawayalani. Baleta ni sa tagutuva na iVakabula na ivesu ni mate, eda na tucake tale. Baleta ni a sorovaka o Koya na noda ivalavala ca, sa rawa, ena noda vakabauta kei na veivutuni, ni bulataka kilikili na matanitu vakasilesitieli, ka ra sa vauci vata kina ena loloma tawayalani na matavuvale.

Na iVakabula a tala na Parofita o Ilaija kivei Josefa Simici me vakalesuya mai na idola ni matabete (raica na V&V 110). A basika mai na idola oya na kaukauwa ni veivauci, ena cabori ni isolisoli levu duadua ni Kalou kivei ira na Luvena—bula tawamudu ena veimatavuvale vauci vata ka tawayalani.

E sa dua na isolisoli e dodonu me nona na luve ni Kalou yadua e basika mai ki vuravura. E dua na ikatolu ni Luvena vakayalo a sega ni vakadonuya na Nona isolisoli ena vuravura ni yalo. Mai na lailai ni vakabauta kei na levu ni vakaduiduile, era sa digitaka mera kakua ni kila na reki ni isolisoli ni Tamada Vakalomalagi me baleta na matavuvale tawamudu.

Kivei keda ka lako sivita na veivakatovolei momona ena vuravura ni yalo ka rawata ni ciqoma na isolisoli ni yago vakatamata, na digidigi levu ni bula tawamudu e dodonu meda digitaka. Kevaka eda sa vakalougatataki ena kunei ni kosipeli vakalesui mai, sa rawa ni da digitaka meda cakava ka maroroya na veiyalayalati kei na Kalou ka na vakatarai keda ki na bula tawamudu. Ni da vosota voli ena yalodina, ena vakadeitaka na Yalo Tabu na noda inuinui kei na yalodei ni da sa tiko ena salatu ni bula tawamudu, meda bula tawayalani vakamatavuvale ena matanitu vakasilesitieli.

Ki na so, na reki tawamudu oya ena rairai dua na inuinui tawamacala se seavu saraga. Sa na rairai caka digidigi na itubutubu, gonelalai, tacida, kei na ganeda ka vaka me tawavakadeitaki ira mai na bula tawamudu. O na rairai vakananuma beka se o sa vakadeitaki tu li mai na Veisorovaki i Jisu Karisito.

A soli vakasala taumada vei au e dua na parofita ni Kalou ka sa vakacegui au. Au a lomaleqataka ni na rawa ni vakavuna na nodra digidigi tale e so me sega ni tiko vata me tawayalani na neitou matavuvale. A kaya o koya, “O sa lomaleqataka voli na leqa e cala. Mo bulataka kilikili ga na matanitu vakasilesitieli, ka na totoka cake na ituvatuva ni matavuvale o na rawa ni vakasamataka.”

Kivei ira taucoko ka seva na ka era sotava se na nodra vakawati kei na luvedra—ka sa vakavu veivakataotaki ki na nodra inuinui, au vakaraitaka na noqu ivakadinadina: na Tamada Vakalomalagi e kilai iko ka lomani iko vaka na Luvena vakayalo. Ni ko a tiko vata kei Koya kei na Luvena Daulomani ni bera na bula oqo, Rau a biuta ki na lomamu na inuinui e tiko vei iko me baleta na bula tawamudu. Kei na cakacaka voli ni kaukauwa ni Veisorovaki i Jisu Karisito vata na veituberi ni Yalo Tabu, sa rawa ni o vakila oqo ka na vakila ena vuravura ka lako mai na loloma vakamatavuvale e vinakata vakalevu kivei iko na Tamamu Vakalomalagi kei na Luvena Daulomani mo ciqoma.

Au vakadinadinataka ni ko bulataka kilikili voli na matanitu vakasilesitieli, na parofisai ni “na totoka cake na ituvatuva ni matavuvale o na rawa ni vakasamataka” ena nomu.