Fare Athap ko T’ufeg ko Tabinaew ni Manemus

Fithik gubin e pi tawa’ath nike pi’ e Chitamangdad nu Tharmiy nib sug ko t’ufeg ngak e pifaak, ni bin ni tha’abi falel’ e yafos nib manemus (muguy ko D&C 14:7). Binem e tawa’ath e ngan paer u pow’chen Got ni Chitamangiy nge Faak nib T’uf Rok u lane tabinaew nib manemus. Kemus ni bin tha’abi tolang u lane pi gil’ilungun Got, fare celestial, e ra chiyliy e yafos ko tabinaew u fithik e t’ufeg nib ul’ul.

Gadaed gubin ni gadaed ma athapeg e falfalen’ gaed e tabinaew rodaed u ta’abang. Boech i gadaed, e ma thamtham ni daworin nanged—ba thamtham ni gadaed manang ni rayog machane daworin nang. Rayog ni kan guyed u lane yafos rok boech e gidii’. Boech gadaed, ma t’uf ko tabinaew e boed ni rib riyul’ ma ba ga’fan napan nike yib e yam’ nga thilin daed e bitir, nina’, papa’, walagey nib pagael, walagey nib ppin, fa tutuw nge titaw nib t’uf rodaed.

Gadaed gubin ma kad thamiyed e athap ni ra boran ma rayog ni ngad thamiyed biyay e t’ufeg rok e chonggin e tabinaew nib tu’uf rodaed ni chiney e ri gadaed ba adag ni ngad thamiyed bayay.

Chitamangdad nu Tharmiy e manang gumircha’en daed. Fan e Nge pi’ e falfalen’ ngodaed (muguy ko 2 Nephi 2:25). Ere Ke pi’ e tawa’ath Rok ni Faak ni nge na’anggin ngeyag e falfalen’ ko tabinaew ni ngan chiyliy ni nge ul’ul nib manemus. Bachan nike kireb nag fare Tathapeg e kalbus ko yam’, ma gadaed gubin ni gadra fas ko yam’. Bachan nike bayul ni fan e denen rodaed, ma rayog rodaed, u dakean e mich nge kalngan’ rodaed, ni ngad yul’yul’ gaed ni fan gil’ilungun got nib celestial, gin nikan chiyliy e tabinaew riy u fithik e t’ufeg nib manemus.

Ke pi’ fare Tathapeg i Profet Elijah ngak Joseph Smith ni ngan fulweg fapi kiy ko fare priesthood (muguy ko D&C 110). Pi kiy nem ni ngan chiyliyey ni ba’, ma bin tha’abi falel’ e tawa’ath rok Got ngak pifaak—e yafos nib manemus ko tabinaew ni ngan chiyliy nib manemus.

Ba tawa’ath ni gubin faak Got nike yib nga fayleng e rayog ni nge non. Baley urngin ko pifaak nib ya’el e ri pi’ed kiru’ raed ko n’en Nike yoeg u lane gin tafen e ya’el. Bachane mich ni dariy nge togpluw nike buch, mar me’leged ni ri dabri nanged e falfalen’ ko tawa’ath rok e Chitamangiy nu Tharmiy ni mornga’agen e tabinaew nib manemus.

Picha’an ni gadaed nike cheg nag ko bin tha’abi ga’fan e skeng u lane tafen e ya’el e ke yag ni nge thapeg e dowef, yafos nib manemus ningan mel’eg e rayog ni ngad mel’eged. Fa’anra kan fal’eg wa’athan daed ni ngad pir’eged fare gospel nikan fulweg, ma rayog ni ngad fal’eged ma gadaed fol ko pi m’ag nike thapeg Got nag daed riy ni fan e yafos nib manemus. Nap’an ni gadaed ra athamgil u fithik e yul’yul’, ma fare Kan ni Thothup e ra dugliy e athap rodaed nge pagan’ rodaed ni gadaed ba’ ko kanawo’ nib sar ko yafos nib manemus, ni ngan paer ko tabinaew nib manemus u lane gil’ilungun u celestial.

Boech e gidii’, e ra thamiy ni dariy e athap rok ni nge thapeg e falfalen’ nib manemus. Galabthir, bitir, walagey nib pagael, nge walagey nib ppin e rayog ni kar mel’eged boech ban’en ni boed nike chuweg raed ko yafos nib manemus. Ku rayog ni ku um tafney nag ko kan mu’ i fekem u dakean fare Bayul rok Yesus Kristus fa danga’.

Fare profet rok Got e non ngog ni pi’ e gapas ngog. Kug magar nag e pi n’en nike mel’eg boech e gidii’ ni ra n’anggin nge momaw’ ko tabinaew romaed ni nge paer u ta’abang nib manemus. Ke ga’ar, “Gabe magar nag e bin ni gathi ba magawon. Kemus ni ngam paer nib gab yul’yul’ ni fan ko gil’ilungun u celestial, ma fane tabinaew e ra mangil nib gel ko rogon ni gabe leam nag.”

Picha’an ni tirok ban’en fa mabgol rok nge bitir—fa dariy bee’ rok—nike chuweg e athap roraed, gube pi’ e mich rog: Chitamangiy ni bay u Tharmiy e ma nangem ma gab t’uf rok ni gab faak nib ya’el. Nap’an ni umoy Rok nge Faak nib T’uf Rok um’on ko biney e yafos, Mar tew e athap nga lan gumircha’em ni ngeyag e yafos nib manemus ngom. Gelngin fare Bayul rok Yesus Kristus niba’ nibe murwel nge fare Kan ni Thothup nib paw’iy, ma rayog ni ngam thamiy e chiney ma gara thamiy u lane bin migid e fayleng e t’ufeg ko tabinaew ni ri ba adag e Chitamangim nge Faak nib T’uf Rok ni ngarim thapeg.

Gube micheg ni nap’an ni gara paer u fithik e yul’yul’ ni fan ko gil’ilungun e celestial, ma ke micheg e profet ni “fane tabinaew e ra mangil nib gel ko rogon ni gabe leam nag” e ram fana’.