Mahsen en Presidensi Keieu, Septempe 2016
Mwurin Limpoak, Eri Dah?
Sang President Dieter F. Uchtdorf
Sounsawas Keriau nan Presidensi Keieu
Atail soukohp, President Thomas S. Monson, padahngkiher me “limpoak me keieu wia poahsoan en rongamwahuo.”1
Limpoak inenen kesempwal iei me Sises ketin kahdaniki “kosonned keieu oh laud” oh masanih me koaros kosonned oh mahsen kan en soukohp akan pid limpoak.2
Limpoak me wia poahsoan en soahng koaros me kitail kin wia nan Mwomwohdiso wet. Prokram koaros, mihting koaros, mwekid koaros kitail pid ni atail wia tohnpadahk kei en Sises Krais uhdahn pahn kin poahsoanda sang ni mour wet—pwe ma sohte limpoak mehlel, “limpoak mwakelekel en Kraiso,” sohte kitail mehkot.3
Ansou me kitail pahn esehla soang wet nan atail madmadau oh mohngiong, ansou me kitail kin kasalehda atail limpoak ong Koht oh iangatail aramas akan—eri dah?
Pepehm en pahtou oh poakohng mehtei kan itar? Lohki atail limpoak ong Koht oh mehn mpatail kin kaitarala atail pwukoah ong Koht?
Karasaras en Pwutak Riemen
Ni tehnpas sarawi nan Serusalem, irail samworou lapalap oko oh kaun en mehn Suhs oko kohla rehn Sises pwe ren irehdi Sapwellime mahsen oko. Sounkomouro, ahpw, ketin kasamwoh irail oh mahsaniheng irail soai pwoat.
“Mie ohl men me nainiki pwutak riemen,” E ketin tepikihda. Pahpao tepda mahs rehn pwutak laudo oh ndahng en kohla doadoahk nan mwetuwelo. Ahpw nah pwutako kahng. Mwuri pwutako “koluhla, oh kohla.”
Ohlo eri uhd kohla rehn nah pwutak keriemeno oh ndahng en kohla doadoahk nan mwetuwelo. Pwutak keriemeno ndahng me e pahn kohla, ahpw e sohte kohla.
Eri Sounkomouro ahpw sohpeilahng samworoh ko oh kaun en mehn Suhs oko oh keinemwe, “Ihs rehn pwutak riemenet me kapwaiada nsenen ara pahpao?”
Irail kamehlele me pwutak laudo—me nda me e sohte pahn wia ahpw mwuri koluhla oh kohla doadoahk nan mwetuwelohu.4
Sounkomouro doadoahngki soai pwoatet pwe en kawewe mwahu ehu kosondi kesemwpwal—irail kan me kin peikiong kosonned kan me poakohng Koht ni mehlel.
Ele met iei kahrepen Sises eh ketin mahsanieki aramas oko ren rongki oh idawehnki ahn Parisi ko oh soun koukosonned koasoai ko ahpw ren dehpa idawehn arail karasaras.5 Sounpadahk en palien lamalam pwukat sohte kin kapwaiada oh wia dahme re kosoia. Irail kin perenki koasoaia palien lamalam, ahpw me kapahtou re sohte wewehki kesemwpwalpe.
Wiewia kan oh Komourpatail
Nan ehu keimwseklahn Sapwellimen Sounkomouro padahk ko me E ketin wiahiong Sapwellime tohnpadahk ko, E masanieng irail duwen keimwseklahn Kadeiko. Me suwed akan oh me mwahu kan pahn katorohrpeseng. Me mwahu kan pahn sosohki mour soutuk; me suwed akan pahn wesiklahng nan wasahn lokolok soutuk.
Ia wekpeseng en nan pwungen pwihn riau wet?
Irail kan me kasalehdahr arail limpoak sang ni wiewia komourlahr. Irail kan me sohte kasalehda pahn ale lokolok.6 Wekidekla mehlel ong rongamwahu en Sises Kraiso oh kesempwalpe kan oh kosondi mehlel kan pahn wia kasalepen atail wiewia kan nan atail mour nan rahn akan.
Ni imwilao, sohte wewehki mwahu limpoak ong Koht oh mehtei kan sohte pahn elehieng kitail en warohng kenikenla. Pwe, ni duwen me Sises ketin padahngki, “kaidehn koaros me ndadohngie, Kaun, Kaun, pahn pidelong ong nan wehin nanleng; ahpw ih me kin kapwaiada kupwuren Semei me ketket nanleng.”7
Dahme kin Kohdo mwurin Limpoak?
Pasapeng ong peideko “Mwurin limpoak, eri dah?” kak mengei oh sansalamwahu. Ma kitail poakohng Sounkomouro ni mehlel, kitail pahn kiong Ih atail mohngiong kan oh wia dahme Sapwellime tohnpadahk kan kin wia. Ni ansou me kitail poakohng Koht, kitail pahn nantiheng kolokol Sawpellime kosonned akan.8
Ma kitail poakohng mehlel iangatail aramas teikan, kitail kin sewesehki “me semwehmwe oh me mie arail anahn, me soumwahu oh me ahniki kahpwal en paliwar” pein kitail. Pwe irail me kin wia soangen mwekid en limpoak oh sawas pwukat,10 irail duwehte tohnpadahk en Sises Krais.
Ih met me kin kohdo mwurin limpoak.
Iei met me wia poahsoan en rongamwahu en Sises Krais.
© 2016 sang Intellectual Reserve, Inc. Kolokol pwuhng koaros. Ntingdahr nan USA. Kamanaman ong lokaiahn wai: 6/15. Kamanaman ong kawehwe: 6/15. Kawehwehpen First Presidency Message, September 2016. Pohnpeian. 12869 885
Padahk sang ni Mahsen Wet
Presiden Uchtdorf kawehwe me tohnpadahk mehlel en Sises Krais iei irail kan me kin kasalehda arail limpoak ong Ih oh mehteikan sang ni arail wiewia kan. E padahkihong kitail me “ma kitail poakohng mehlel Sounkomouro, kitail pahn kihong Ih atail mohngiong kan oh wia dahme Sapwellime tohnpadahk kan kin wia. Idek rehn irail kan me ke kin padahkih ia mwomwen limpoak eh sewese irail pwe ren kin wia dahme tohnpadahk kan kin wia. Ke kak ehukihong irail soahng kan me ke wehwehkiher. Ke pil anahne lukeirail en kapakapki en mie limpoak unsek oh kehlail pwe ren kak doadoahk ni limpoak.