Kisiniei kan oh Padahk kan en Peik

President Thomas S. Monson mahsanih ehupako duwen ansou ehu me e esehla kesempwalpen peik. Ni ansou me e sounpar waluho, ah peneinei pwarek imwarail kisin ihmwo nan nahna ko. Ih oh kempoakepao mwatiada wasa dipwidipw ieu pwe ren saunda ehu kisiniei. Ira song rekipweliada dihpw ko, wirahdeki oh sohnekieng uwen ara kak, ahpw ihte me ira wiahda iei kisin mwutindipw ieu. President Monson kawehwehda, “Oh eri dahme I leme me wia kaweid keieu mwahu kodohng nan ahi lamalam me mahkiher sounpar waluh. I ndalahng Danny, “Ihte me kita anahne iei isikada dihpw kat. Kita pahn isikadahte pwonopwon ieu nan dihpw kat!”

Tehn e ese me e sohte mweimweieng doadoahngki masis, e tang pwuralahng ni kisin ihmwo pwe en ale ekei, oh ih oh Danny eri saunda kisin kisiniei ehu nan wasa dipwidipwo. Ira kasik me e pahn pein kunla, ahpw e ouddahte wiahla ehu lapalahn kisiniei me keper. Ih oh Danny tangala repen sawas, oh sohte pwand aramas laud kei tangpene pwe ren kakunla kisinieio mwohn eh lella nan tuhke ko.

“Ngehi oh Danny esehla ekei padahk apwal ahpw padahk kesempwal kan rahno—kaidehn me keieu tikitik me iei kesempwalpen peik,” President Monson uhsehla. (Tehk “Obedience Brings Blessings,” Liahona, Mei 2013, 89–90.)

Duwehte President Monson, kumwail iangehr alehdi kasukuhl me pid peik ni wiepe me apwalo? Dahme kumwail kasik me kumwail kak wia pwe kumwail en ahniki nsenamwahu sang ni peik nan ehu ansou me kohkohdo?