O Leo o Le Au Paia o Aso e Gata Ai
O Se Vaitau mo Talafaasolopito o Aiga
Ata na tusia e Wilson Ong
I le avea ai ma se tina o ni afafine se toalua, e tele lava ina ou faia ni alofaga e faapea e le mafai ona ou auai i nisi o mea ou te fiafia i ai ona e le o so’u “vaitau” e faia ai. O se tasi o na mea o galuega o talafaasolopito o aiga.
E ui sa ou auai i le faavasegaga o igoa o se gaoioiga fiafia o le Sapati i le tuanai, ae sa ou iloaina ai lo’u faia o ni alofaga e faapea e leai so’u taimi po o se malamalama e opomauina ai a’u galuega o talafaasolopito o aiga i lena taimi.
Sa suia lo’u loto i se tasi o taeao po i ni nai masina talu ai a o ou nofonofo ai i totonu o le malumalu. A o ou iloiloina igoa o e ua maliliu i luga o kata o le malumalu, ma tatalo ina ia latou taliaina sauniga o le malumalu na faatinoina mo i latou, sa ou mafaufau lava ia te au, “Ai lava se manaia pe ana faapea o tagata nei o lo’u lava aiga? Ou te fia faia le galuega mo i latou.” Sa faamautu mai e le Agaga ia te au afai o o’u manaoga ia, o le a fesoasoani mai la le Alii ia ou faia au galuega o talafaasolopito o aiga, ae patino lava i le aso Sapati. E mafai ona fesoasoani mai o Ia ia te au ia maua le taimi ma le malamalama e faataunuu ai Ona faamoemoega.
I lena Aso Sa, sa ou alu ai i le fale ma alu i totonu o le FamilySearch.org. Sa faafuasei ona tafe mai ou loimata ina ua ou vaaia igoa o ou tuaa. Sa oo ina malosi atu lou sootaga ma i latou. O mea na faaopoopo atu i lo’u alofa mo i latou o ata patino ma pepa o faamaumauga, ia sa lei leva atu ona faaopoopo i ai e lo’u tinamatua, ma na pei ua toe ola mai ai tagata o lo’u aiga mo au. Sa ou lagonaina le olioli i le faaaofiaina ai o la’u tama e lua tausaga le matua, lea sa aoao e iloa ata o le tama o lona tama matua ma le tina o le tinamatua o lona tinamatua, ma ta’uina o la igoa. Sa ou lagonaina le auala lea na faamatalaina e Peresitene Russell M. Nelson, Peresitene o le Korama a Aposetolo e Toasefululua: “Ua maua i le Sapati se avanoa matagofie e faamalosia ai sootaga faaleaiga. O le mea moni lava, e finagalo le Atua ia i tatou uma, o Lana fanau, ina ia toe foi atu ia te Ia o ni Au Paia ua maua faaeega paia, faamauina i le malumalu o ni aiga, i o tatou tuaa, ma i a tatou fanau” (“O Le Sapati o se Aso Fiafia,” Liahona, Me 2015, 130).
Talu mai lena uluai aafiaga, ua faaauau ai lava ona ou auai i galuega o talafaasolopito o aiga i le aso Sapati. Ua faamanuiaina au e faia galuega faalemalumalu mo nisi o tagata o lo’u aiga ua maliliu. O se faamanuiaga faapitoa, o le iloaina lea o ou aiga ma le mauaina o se mafutaga vavalalata atu ma ou matua matutua e le o ni tagata o lo tatou faatuatuaga. Ua faamalosia ai lo’u naunautaiga e tausi a’u feagaiga ma tumau e oo i le iuga ina ia mafai ai ona avea au ma se sootaga malosi i lo’u aiga e faavavau.
E ui e anoanoai pea galuega e fai, ae ou te faafetai i lo’u Tama Faalelagi mo le faateleina o lo’u malosi ina ia mafai ai ona ou auai i Lana galuega, aemaise lava i Lona aso. Mo a’u, o le Sapati o se aso fiafia moni lava.