Kasem Taem Yumi Mit Bakegen
Ol Bigfala Waes Man blong Jos blong Lod
I kamaot long “He Slumbers Not, nor Sleeps,” Ensign, Mei 1983, 5–8. Oli jenisim fasin blong raetem toktok blong i folem standet blong tedei.
God i stap wivim bigfala mat blong Hem folem bigfala plan we Hem i gat.
Foto i kam long Meri Yusunian, Miusiom blong Jos Histri i glad blong serem foto ia
Ol bigfala waes man blong oganaesesen blong wok ia mo blong ol man we oli stap singaotem olsem lida, i wan pruf blong hemia. Ol Jeneral Atoriti, evriwan oli wanwan man, mo wanwan i gat wanwan fasin blong hem. Wanwan i karem samting i kam long responsabiliti blong hem, mo i tekem fulap defren kaen eksperiens mo bakgraon. Taem ol poen oli kam antap blong toktok raon long olgeta long ol liding kaonsel blong Jos, wanwan i fri blong talemaot tingting blong hem. Taem wan i stap mo i stap lukluk fasin blong wok ia i hapen, bae i laekem tumas blong witnesem paoa blong Tabu Spirit we i stap lidim olgeta man ia. Wanwan i talem ol defren tingting be oli no talem ol defren tingting ia long fasin we i strong, mo long en, ol tingting oli kam sopsop mo evriwan i joen wan. “Haos blong mi i wan haos blong oda,” Lod i talem (luk long D&C 132:8). Taem mi stap luk fasin blong wok ia i hapen, oltaem fet blong mi i kam niu bakegen. …
Sam oli stap talem wari blong olgeta se Presiden blong Jos, plante taem, i wan olfala man, mo mi stap ansa oltaem: “!Hemia wan blesing!” Wok long dispensesen ia, i kam antap tru long fasin we Profet Josef Smit i stap olsem wan tul long han blong God. Long tetaem ia, hem i yangfala mo strong; man ia, tingting blong hem i no bin stap long ol kastom blong taem blong hem. Maen blong hem i yangfala, mo i wan tingting we Lod i save trenem, i save tantanem olsem klei blong mekem pot, long stat blong wok blong Hem.
Man we i bin kam biaen long Josef i bin yangfala tu taem hem i mas tekem bigfala responsabiliti blong lidim wan ful grup blong ol pipol oli krosem ol waelples blong stap olsem paeonia blong wan niufala graon.
Be ol stamba blong doktrin blong yumi oli stanap strong nao, mo yumi stanap strong olsem wan pipol, hemia kasem taem we Lod i talem se yumi mekem samting i defren. Yumi no nidim ol niufala rod. Yumi nidim blong putum ful tingting long ol tabu prinsipol we oli stap talem finis. Yumi nidim blong stap tru long lida blong yumi, we God i bin jusum finis. Hem i profet, sia mo reveleta blong yumi. Bambae yumi neva stap mo no gat wan profet sapos yumi laef long wan wei we i klin inaf blong gat wan. Hem i no nid blong hem i yangfala. Hem i gat mo bambae hem i gohed blong gat ol yangfala man blong travel raon long wol blong mekem wok blong seves blong Hem. Hem nao i prisaeding hae pris, hem nao i man we i holem evri ki blong tabu prishud, mo hem i voes blong revelesen we i kam long God i go long ol pipol blong Hem.
I gat wan olfala proveb we i talem: “Yut blong tekem aksen. Olfala blong gat waes.”
Long maen blong mi, mi harem se hat blong mi i harem gud mo i gat pis blong save se blong fesem fiuja, bae yumi gat wan Presiden we God i bin disiplinim hem, i tijim hem, i traem hem mo i testem hem; we hem i mekem tru fasin blong hem i strong long wok, mo hem i tru long wok we hem i bin mekem tru long ol yia blong seves, we fet blong hem i gro bigwan, mo hem i stap kolosap nomo long God from hem i bin lanem hemia ova long plante, plante yia. …
Yumi no nid blong fraet from fiuja, sapos yumi hang strong long ol prinsipol we God i talemaot.