Wan Resipi blong Stap Lanem Samting

I Kam long Rosmeri Takerei

Hem we i raet, i stap long Yuta, YSA.

Traem ol fofala step ia blong mekem toktok blong God i swit gud long sol blong yu.

Pikja

recipe for learning

Taem mi bin yangfala, mi spendem plante aoa blong stap lukluk mama blong mi insaed long kijin. Bae hem i kukum ol gudfala kaekae, bred, kuki, mo pae blong famli blong mifala. Afta sam taem, mi bin stat blong ridim ol resipi, blong folem ol instraksen, mo kukum kaekae. Mi no nidim blong dipen long mama blong mi—mi save mekem miwan.

Semmak olsem we yumi lan blong kuk, yumi lanem gospel mo developem testemoni blong yumi taem yumi mekem. Afta we Lihae i talem long famli blong hem long saed blong drim blong hem abaot tri blong laef, Nifae i talem se hem i bin wantem blong “luk, mo harem, mo save long ol samting ia” hemwan (1 Nifae 10:17). Long nara toktok, long Nifae, i no bin inaf blong lisin nomo long testemoni blong Papa blong hem. Hem i bin wantem blong lanem wanem we papa blong hem i bin save finis.

Resipi blong lanem gospel i gat samfala samting nomo blong mekem. Yu save yusum ol fofala tingting ia blong helpem yu blong lanem gospel wetem famli blong yu, long jos, o long taem we yuwan i stap stadi.

1. Rere blong lanem samting.

Statem stadi blong yuwan wetem wan prea. Askem Papa long Heven blong helpem yu blong andastanem wanem we yu stap ridim finis. Raetemdaon wan o tu kwestin, mo lukaotem ansa blong hem. Tabu Spirit bae i testifae long trutok taem yu stap ridim, tingting hevi, mo prea (luk long Moronae 10:5).

Rere blong lanem gospel long Jos taem yu stap ridim lesen bifo yu go long Jos. Ol lesen we oli stap long Come, Follow Me (Kam Folem Mi), yu save faenem olgeta long LDS.org, mo tu insaed long Gospel Library (Gospel Laebri, long fon).

2. Tekpat long wanem we yu stap lanem.

Ridim samting blong yu andastanem. Namba blong ol pej we yu stap ridim, sapos yu stap rid hariap, i no impoten bitim wanem we yu stap andastanem taem yu stap rid. Maet yu mas ridim bakegen ol sentens ia plante taem. Yusum wan diksonari blong lukluk gud ol toktok we yu no save. Eksampol. ?Dispensesen i minim wanem? Yu save yusum Guide to the Scriptures (Gaed long Ol Skripja) blong faenem mining blong hem.
Askem ol kwestin long saed blong wanem nao yu stap ridim. Maet yu stap askem yuwan: ?Wanem nao i bin stap hapen long Jerusalem long taem we Lihae mo famli blong hem oli aot long Jerusalem? ?From wanem ol pipol oli no bin lisin long Lihae?
Traem blong ansarem ol trifala kwestin ia long saed blong eni tijing blong gospel: ?From wanem tijing ia i bin impoten long ol pipol ia long tetaem ia? ?Olsem wanem tijing ia i blong yumi praktisim tedei? ?Olsem wanem nao tijing ia i blong mi?
Lukaotem ol paten, rod we i semmak, o samting we i joen. Eksampol. ?Wanem nao ol paten o rod blong folem, long wei we Nifae i fesem wanem i bin kam agensem hem? ?Olsem wanem nao wokbaot blong famli ia long waelples i semmak long wokbaot blong ol man Isrel taem oli bin aot long Ijip?
Raetemdaon ol filing mo tingting we oli kam long yu insaed long wan jenol. “Taem yu stap raetemdaon ol impoten tingting ia, plante taem, bae moa tingting i kam. Mo tu, save ia we bae yu kasem, bae i stap wetem yu long ful laef blong yu” (Rijad G. Skot, “To Acquire Knowledge and the Strength to Use It Wisely,” Liahona, Ogis 2002, 12, 14). I moa gud blong reatemdaon wanem nao ol impoten tingting ia i minim long laef blong yu.
Droem wan pikja. Wan nara wei blong raetemdaon wanem we yu stap lanem i blong droem samting ia. Wan taem, taem mi bin stap visitim wan fren long famli haos naet, bubuwoman blong hem i bin serem sam stori blong hem abaot fet mo prea. Bifo lesen i stat, fren blong mi i givim pepa mo kala pensel long ol yang pikinini blong hem, blong oli save dro ol stori taem bubuwoman blong olgeta i stap talem ol stori ia. Blong dro ol pikja, i mekem se oli stap lisin, mo oli stap askem kwestin tu taem stori i stap go, blong andastanem gud samfala pat blong stori.

3. Stadi mo laef folem gospel evri dei.

Blong stap lanem samting, i nidim man i hadwok smol; yumi nidim blong praktisim tingting blong yumi blong stap andastanem samting (luk long Mosaea 12:27). Elda M. Rasel Balad blong Kworom blong Olgeta Twelef Aposol i talem kaonsel ia long yumi, “blong yumi mas putum wan taem mo wan ples blong stadi long ol skripja evri dei, nating we hem i blong sam minit nomo” (“When Shall These Things Be?”) Ensign, Dis. 1996, 60). Taem yumi stap stadi oltaem, fasin blong lanem samting i kam isi moa. Eksampol. Mi faenem se taem mi stap ridim ol japta blong Aesea long Buk blong Momon (be i no blong skipim olgeta), nao mi stat blong andastanem olgeta.

Taem i kam blong lanem gospel, hem i no inaf blong save samting long waes blong yumi. Yumi nidim blong mekem tu wanem we yumi lanem. Taem yumi stap tekem aksen long trutok we yumi lanem, Tabu Spirit i konfemem hemia long yumi, mo long wei ia, testemoni blong yumi i stap gro. Taem yumi stap laef folem trutok ia oltaem, yumi stat blong mekem wan jenis, blong jenisim laef blong yumi long Jisas Kraes.

4. Serem wanem we yu stap lanem.

Taem yumi stap tokbaot long ol narawan abaot wan prinsipol blong gospel wetem ol toktok blong yumiwan, hem i helpem yumi blong tingbaot prinsipol ia mo filim Spirit, we i stap mekem testemoni blong yumi i kam strong moa. !Plante taem, wan gud taem blong serem samting i long taem blong famli haos naet! Yu save serem ol samting we yu lanem tu taem yu toktok wetem ol fren long skul, o wetem ol memba blong famli long taem blong kakae.

Taem yumi stap folem ol fofala simpol step ia, mo stap strong blong luklukgud blong save Sevya, yumi gat promes ia se “bae [yumi] kam blong save ol sikret blong God, tru long paoa blong Tabu Spirit” (1 Nifae 10:19).