O Le Auala e Faia ai Keriso ma Totonugalemu o o Tatou Olaga

Ata

holding the Book of Mormon

Na maua e Iesu le lotogatasi atoatoa ma le Tama, e ala i le gauai atu o Ia lava, i le tino ma le agaga, i le finagalo o le Tama. Na fetalai Iesu e faatatau i Lona Tama, e faapea, “Ou te faia pea lava o mea lelei ia te ia” (Ioane 8:29). Ona o le finagalo o le Tama, sa gauai atu ai Iesu e oo lava i le oti, “ua tofatumoanaina le loto o le Alo i le finagalo o le Tama” (Mosaea 15:7). O Lona taulai atu i le Tama o se tasi lea o mafuaaga autu na manino ma mamana ai le galuega a Iesu. Sa leai ma se faaluafesasi ma se femoumouai i Lona mafaufau.

I lea lava ala e tasi, e mafai ai foi e oe ma au ona tuuina Keriso i le totonugalemu o o tatou olaga ma lotogatasi ai ma Ia e pei ona tasi o Ia ma le Tama (tagai Ioane 17:20–23). Tatou te amata i le aveesea o mea uma mai i o tatou olaga ona toe tuu lea i ai ma faatulaga faatasi i le faasologa o mea e faamuamua faatasi ai ma le Faaola i le totonugalemu. E muamua lava ona tatou faatulagaina mea e mafai ai ona manatua pea o Ia—tatalo e le aunoa, suesueina ma le mafaufau loloto i tusitusiga paia, suesue ma le mafaufau loloto i aoaoga faaaposetolo, sauniuniga faalevaiaso e fetagofi atu ma le agavaa i le faamanatuga, tapuaiga i Aso Sa, tusitusia ma le manatuaina o mea e aoao mai e le Agaga ma aafiaga ia i tatou i le avea ai ma soo. O loo i ai ma isi mea o le a oo atu i lou mafaufau e faapitoa lava ona fetaui ia oe i lenei taimi o lou olaga. A lava loa le taimi ma auala mo nei mataupu, mo le faatotonugalemuina o o tatou olaga ia Keriso, ma ua faatulaga lelei, ona mafai loa lea ona tatou amata faaopoopo atu i ai isi tiutetauave ma mea e i ai le taua pe a faatagaina ai e le taimi ma punaoa, e pei o tiutetauave faaleaoaoga ma faaleaiga, ma mea e fai e fiafia i ai le tagata lava ia. I lenei ala o le a le tuleia ai i fafo e mea lelei ia mea taua mai i o tatou olaga, ma o mea e itiiti le taua o le a tuualalo ifo le faamuamua pe aveesea atoa lava.

E ui atonu e le faigofie, ae mafai ona tumau pea lo tatou fetaomi atu i luma ma le faatuatua i le Alii. E mafai ona ou faamaonia i le aluga o taimi o le a tuputupu ae lo tatou manao ma le gafatia e manatua pea ma mulimuli i le Faaola. E tatau ona tatou galulue ma le onosai e tau i le faaiuga ma tatalo e le aunoa mo le iloatino ma le fesoasoaniga faalelagi tatou te manaomiaina (tagai 2 Nifae 32:9).