Pinaagi sa Pagtuon ug pinaagi sa Hugot nga Pagtuo

Si Phoebe Carter mibiya sa iyang balay sa Maine, USA, aron makig-uban sa mga Santos sa Ohio niadtong mga 1830. Miingon siya: “Nahibulong ang akong mga higala sa akong gihimo, ako usab, apan sa sulod kanako may nag-ingon nga padayon lang. Ang kasubo sa akong inahan sa akong pagbiya daw dili nako maantus; ug kon dili tungod sa espiritu nga akong gibati nasayop unta ko sa kaulahian.”³

Gisunod ni Phoebe ang Propeta nga si Joseph Smith ug nakig-uban sa mga Santos sa Ohio ug dayon sa Utah, diin didto siya namatay nga usa ka matinud-anong Santos sa Ulahing mga Adlaw ug asawa sa Presidente sa Simbahan nga si Presidente Wilford Woodruff (1807–98).

Isip usa ka estudyante sa kolehiyo, si Marion G. Romney (1897–1988) nakahukom nga dili magmisyon tungod sa pinansyal nga sitwasyon sa iyang pamilya. Sa usa ka okasyon, hinoon, nakadungog siya ni Elder Melvin J. Ballard (1873–1939) nga namulong. Ang usa ka biyograpiya naghisgut, “Wala kaayo mahibalo si [Marion] nga ang iyang kinabuhi, sa mubo kaayong panahon, hapit na mausab sa hingpit.”

Ang istorya nagpadayon: “Sa unang higayon si Marion … hingpit nga nakasabut kon [sama sa] unsa ang mahimong ubos sa impluwensya sa inspirasyon. Usa ka hait, makatandog nga pagbati mipuno sa iyang kalag. Siya … sukad wala pa matandog og sama niana, sa pagpaminaw sa mga pulong niining pinakabag-o nga Apostoles. …

“… Ang kasanag sa panagway sa Apostol ug sinseridad sa [iyang] pagpamatuod mipuno kaniya og dili kapugngang tinguha nga magmisyon. … Nasayud siya nga ang iyang mga plano alang sa dugang nga edukasyon kinahanglan nga dili lang una idayon.”⁴

Dayon, si Marion miadto sa Australia, diin matinud-anon siyang miserbisyo. Wala madugay nahimo siyang usa ka bantugan nga Apostol ug usa ka sakop sa Unang Kapangulohan.

Ang katapusang istorya naggikan ni Presidente Boyd K. Packer (1924–2015), Presidente sa Korum sa Napulog Duha ka mga Apostoles, mahitungod sa epekto sa edaran nga magtutudlo ngadto kang William E. Berrett. Ang magtutudlo, kinabig gikan sa Norway, dili maayong mo-Iningles. Bisan sa mga limitasyon sa maong magtutudlo, nahinumdom si Presidente Packer, si Brother Berrett mipamatuod sa iyang magtutudlo, “Hilabihan kahugot sa iyang pagtuo.”⁵

Wala madugay, si William nahimong dako-dako sa seminary, institute, ug sa mga eskwelahan sa Simbahan.

Alang kang Phoebe, Marion, ug William, ang pagpamati sa lunsay nga pagpamatuod nahimo nga elemento nga nakausab sa ilang kinabuhi sa hangtud. Mahitabo sab kana nganha sa inyong mga tudloan. Hinoon, tungod sa mga reyalidad sa kalibutan karon, ang lunsay nga pagpamatuod mahimong dili na igo. Si Phoebe, Marion ug William limpyo ug putli ug gawasnon gikan sa pornograpiya ug pagkakalibutanon sa dihang gitudloan sila sa dinasig nga mga misyonaryo, mga magtutudlo, ug mga lider. Ang Espiritu dali ra nga misulod sa ilang malumo ug putling kasingkasing.

Karon ang istorya lahi na kaayo. Ang pipila sa inyong mga estudyante naapektuhan na sa pornograpiya ug pagkakalibutanon sa dili pa mosulod sa inyong mga klase.

Usa pa lamang ka henerasyon ang milabay nga ang pag-access sa atong kabatan-onan sa impormasyon kabahin sa atong kasaysayan, doktrina, ug mga binuhatan limitado lamang ngadto sa mga materyal nga giimprinta sa Simbahan. Gamay rang mga estudyante ang nakasugat og lahi nga mga interpretasyon. Kadaghanan, ang atong kabatan-onan protektado sa ilang panimuyo.

Ang kurikulum nato niadtong higayuna, bisan og maayo ang tuyo, wala moandam para sa mga estudyante sa karon—diin ang mga estudyante dunay akses diha dayon sa computer sa lahi-lahing panan-aw mahitungod sa Simbahan. Karon unsay ilang makita sa ilang mga device maingon og makahagit sa pagtuo labaw kay sa makadugang og pagtuo. Daghan sa atong kabatan-onan mas hanas sa Google kay sa ebanghelyo, mas ganahan sa internet kay sa inspirasyon, ug mas importante ang Facebook kay sa pagtuo.

Imahe

man typing on a computer

Tungod niini nga mga hagit, ang Board of Education sa Simbahan bag-o lang miaprubar og bag-ong inisyatibo sa seminary nga gitawag og Doctrinal Mastery. Gibase sa pamaagi sa Scripture Mastery, kining bag-ong inisyatibo magtutok sa atong mga estudyante sa pagpalig-on sa ilang pagtuo kang Jesukristo ug madugangan ang ilang abilidad nga masunod ug ma-apply ang ebanghelyo sa ilang kinabuhi. Pinaagi sa paggamit sa mga kasulatan ug sa pulong sa mga propeta, makat-unan nila unsaon sa paglihok uban sa pagtuo kang Kristo sa pag-angkon og espirituhanong kahibalo ug panabut sa Iyang ebanghelyo. Ug may oportunidad sila sa pagkat-on unsaon sa pag-apply ang doktrina ni Kristo ug mga baruganan sa ebanghelyo diha sa mga pangutana ug mga hagit nga ilang madungog ug makita kada adlaw sa ilang mga higala ug sa social media.

Kini nga inisyatibo dinasig ug tukma sa panahon. Duna kini talagsaong impluwensya sa atong kabatan-onan. Hinoon, ang kalampusan sa Doctrinal Mastery, ug sa uban pang mga programa sa pagtuon sa Church Educational System, mag-agad og dakong bahin diha sa atong mga magtutudlo.

Kay naa kini nga mga hagit, unsa man ang mga oportunidad ug responsibilidad sa mga magtutudlo sa ebanghelyo sa ika-21 nga siglo? Dayag lang nga kamo nga mga magtutudlo kinahanglan nga mohigugma sa Ginoo, sa Iyang Simbahan, ug sa inyong mga estudyante. Kinahanglan nga ihatag sab ninyo ang lunsay nga pagpamatuod sa sinserong paagi ug kanunay. Dugang pa, labaw kay sa bisan kanus-a sa atong kasaysayan, ang inyong mga estudyante nagkinahanglan usab nga mapanalanginan pinaagi sa doctrinal ug historikal nga sulod ug kinatibuk-ang kahulugan pinaagi sa pagtuon ug pagtuo inubanan sa lunsay nga pagpamatuod aron masinati nila ang hingkud ug malungtarong pagkakabig sa ebanghelyo ug tibuok kinabuhi nga pasalig kang Jesukristo. Ang hingkod ug malungtarong pagkakabig nagpasabut nga “[mag]pabilin sa sakayan ug manggunit” sa tibuok nilang kinabuhi.⁶

Imahe

woman in Sunday School class

Aron kamo makasabut sa doktrinal ug historikal nga sulod ug kinatibuk-ang kahulugan sa mga kasulatan ug sa atong kasaysayan, kinahanglan ninyong tun-an ang “pinakamaayong mga basahon,” sigun sa gisugo sa Ginoo (D&P 88:118). Ang “labing maayo nga mga basahon” naglakip sa mga kasulatan, mga pagtulun-an sa modernong mga propeta ug mga apostoles, ug pinakamaayong LDS scholarship nga anaa. Pinaagi sa makugihon ninyong paningkamot sa pagkat-on pinaagi sa pagtuon ug pagtuo, matabangan ninyo ang inyong mga estudyante sa pagkat-on og mga kahanas nga gikinahanglan sa pag-ila tali sa kasaligang mga impormasyon nga makabayaw nila ug sa dili hustong mga interpretasyon sa doktrina, kasaysayan, ug mga binuhatan nga makalaglag kanila.

Tudloi sila bahin sa mga hagit nga ilang atubangon kon magsalig lang sila sa Internet pagtubag sa mga pangutana nga may mahangturong mga kahulugan. Pahinumdumi sila nga si Santiago wala moingon nga, “Ug kon aduna man kaninyoy nakulangan ug kaalam, paadtoa sila sa Google!” (tan-awa sa Santiago 1:5).

Ang maalamong mga tawo dili magsalig sa internet aron masusi ug matambalan ang emosyunal, mental ug pisikal nga suliran, ilabi na sa makahulga sa kinabuhi nga mga hagit. Hinoon, moadto sila sa mga eksperto sa panglawas, sa lehitimo ug lisensyadong mga mediko. Gani, ang mabuot nga mga tawo mangayo og ikaduhang opinyon.

Kon kana man ang maayong paagi sa pagpangita og tubag sa emosyunal, mental, ug pisikal nga mga problema, mas labaw pa kon ang kinabuhing dayon maoy isyu. Kon dunay butang nga hulga sa espiritwal natong kinabuhi, sa pinakabililhon natong mga relasyon sa pamilya, ug sa pagkahisakop sa gingharian, kinahanglang mangita kita og mahunahunaon ug matinud-anong mga tawo nga motabang kanato. Ug, kon mahimo, mangayo kita og tabang niadtong nakadawat og tukma nga training sa akademik, kasinatian, ug kahanas.

Ingon ani gyud ang akong buhaton kon magkinahanglan kog tubag sa kaugalingon nakong pangutana nga di nako matubag. Magpatabang ko sa akong Kaigsoonan sa Korum sa Napulog Duha ug gikan sa uban nga eksperto sa natad sa kasaysayan ug doktrina sa Simbahan.

Ang mga magtutudlo sa ebanghelyo kinahanglang lakip sa mag-una—nga dili kapamilya sa inyong mga estudyante—sa pagpaila sa awtorisadong mga tinubdan sa mga hilisgutan nga dili kaayo pamilyar o hilisgutan nga kontrobersyal aron matimbang-timbang sa mga estudyante ang bisan unsay ila unyang madungog o mabasa batok sa mga butang nga natudlo na kanila.

Mohatag kita og medikal nga pagbakuna sa bililhon natong mga misyonaryo sa dili pa sila magmisyon aron mapanalipdan sila batok sa mga sakit nga makadaot kanila. Sa samang paagi, sa dili pa ninyo ipadala ang inyong mga estudyante sa kalibutan, bakunahi sila pinaagi sa paghatag og matinud-anon, mahunahunaon, ug tukmang interpretasyon sa doktrina sa ebanghelyo, mga kasulatan, atong kasaysayan, ug sa mga topic nga usahay masaypan sa pagsabut.

Sa pagngalan og pipila ka mga hilisgutan nga dili kaayo pamilyar o hilisgutan nga kontrobersyal, gihisgutan nako ang bahin sa dinaghan nga kaminyoon, mga bato sa manalagna, lahi-lahi nga istorya bahin sa Unang Panan-awon, ang proseso sa paghubad sa Basahon ni Mormon o ang Basahon ni Abraham, isyu kabahin sa pagkalalaki ug pagkababaye, kaliwat ug ang priesthood, ug sa Langitnong Inahan.

Ang paningkamot sa pagbakuna sa atong kabatan-onan kadaghanan anaa kaninyo mga magtutudlo sa Church Educational System. Uban niana nga panghunahuna, gahini og panahon ang pagpamalandong sa inyong mga oportunidad ug mga responsibilidad.

Ang mga lider sa Simbahan karon hingpit nga nahibalo sa walay limit natong access sa impormasyon, ug naghimo kita og dili ordinaryong paningkamot aron mahatag ang tukmang kahulugan ug panabut sa mga pagtulun-an sa Pagpahiuli. Usa sa nag-unang ehemplo niini nga paningkamot mao ang 11 ka mga Gospel Topic essays sa LDS.org⁷ nga naghatag og balanse ug kasaligang interpretasyon sa mga kamatuoran alang sa mga kontrobersyal ug dili pamilyar nga hilisgutan nga may kalabutan sa Simbahan.

Importante nga mahibaloan ninyo ang sulod niini nga mga essay. Kon duna moy mga pangutana mahitungod niini, palihug pangutan-a ang usa nga nakatuon ug nakasabut na niini. Sa laing pagkasulti, “pangitaa ang pagtulun-an, gani pinaagi sa pagtuon ug usab pinaagi sa hugot nga pagtuo” (D&P 88:118) samtang i-master ninyo ang sulod niini nga mga essay.

Kinahanglan usab nga inyong mapamilyar ang Joseph Smith Papers [Mga Papeles ni Joseph Smith] nga website,⁸ sa seksyon sa Church history sa LDS.org, ug ubang mga kapanguhaan pinaagi sa matinud-anong mga LDS scholars.

Ang paningkamot nga makita ang tanan ug ang espirituhanong pagbakuna pinaagi sa pagtuon sa doktrina ug kasaysayan, uban sa nagdilaab nga pagpamatuod, maoy pinakamaayong tambal aron matabangan ang mga estudyante nga makalikay ug makasugakod sa mga pangutana, pagduha-duha, ug kakulang sa pagtuo nga ila unyang atubangon niining kapanahunan sa impormasyon.

Kon kamong mga magtutudlo maningkamot nga mas masabtan ang atong kasaysayan, doktrina, ug mga buhat—mas maayo kay sa nahimo ninyo karon—maandam kamo sa paghatag og mahunahunaon, mainampingon, ug dinasig nga tubag sa pangutana sa inyong mga estudyante.

Imahe

youth Sunday School class

Usa ka paagi nga mahibaloan ninyo unsay pangutana sa inyong mga estudyante mao ang pagpaminaw gayud kanila. Ang tanang maayo nga mga magtutudlo kinahanglang maayo nga mga tigpaminaw. Agig dugang sa pagpaminaw sa inyong mga estudyante, awhaga sila sa pagpangutana ninyo sa klase man o sa pribado sa bisan unsang topic. Usa sa pinakaimportanting pangutana nga tingali ipangutana sa inyong mga estudyante mao ang “Ngano?” Kon pangutan-on kamo uban sa sinserong tinguha nga makasabut, ang “Ngano?” maoy maayo kaayong pangutana. Kini ang pangutana nga gustong madawat sa mga misyonaryo gikan sa ilang mga investigator. Nganong ania kita dinhi? Nganong ang dautang mga butang mahitabo man sa buotan nga mga tawo? Nganong kinahanglan man kitang mag-ampo? Nganong kinahanglang sundon nato si Kristo? Kasagaran ang “ngano” nga mga pangutana moresulta ngadto sa inspirasyon ug pagpadayag. Ang pagkahibalo sa plano sa Langitnong Amahan alang sa kaluwasan motabang kaninyo sa pagtubag sa kadaghanan sa “ngano” nga mga pangutana.

Ania ang katapusang pahinumdom bahin sa pagtubag og mga pangutana. Importante nga matudloan ang mga estudyante nga bisan og daghan ang mahatag sa ebanghelyo, kondili man tanan, ang uban sa pinakaimportanting pangutana dili matubag dinhi sa mortalidad tungod kay kulang kita sa impormasyong gikanahanglan alang sa tukmang tubag. Sigun sa atong nakat-unan sa Jacob: “Tan-awa, mahinungdanon ug kahibulongan ang mga buhat sa Ginoo. Unsa ka pagkatulukibon ang giladmon sa mga misteryo diha kaniya; ug kini dili mahimo nga ang tawo makakaplag sa tanan niya nga mga paagi. Ug walay tawo nga masayud sa iyang mga paagi gawas kon kini ipadayag diha kaniya” (Jacob 4:8; see also D&P 101:32–34).

Karon motanyag ko og usa ka pulong sa pasidaan. Palihug hibaloi basin og magtuo unya kamo, sama sa kadaghanan sa inyong mga estudyante, nga kamo eksperto sa kasulatan, doktrina, ug kasaysayan. Ang bag-ong pagtuon nagpakita nga “kon ang mga tawo nagtuo nga daghan silag nahibaloan sa usa ka hilisgutan mangangkon sila nga nakasabut lapas sa ilang nahibaloan, gani ngadto sa punto nga magpakaaron-ingnon sila nga makamao … ug maghimo-himo og mga impormasyon.”⁹

Naila kini nga nanubrang pagpangangkon, kini nga tintasyon kinahanglang likayan sa atong mga magtutudlo sa ebanghelyo. Walay problema ang pag-ingon nga, “Wa ko kahibalo.” Hinoon, kon masulti na kana, duna kamoy responsibilidad sa pagpangita sa labing maayong mga tubag sa mahunahunaon nga mga pangutana nga ipangutana sa inyong mga estudyante (tan-awa sa D&P 101:32–34).

Samtang magtudlo mo sa inyong mga estudyante ug motubag sa ilang mga pangutana, mopasidaan ko ninyo ayaw isugilon ang mga istorya nga giingon nga makapasiugdag pagtuo o tabi-tabi apan wala mapamatud-i o mga napapas nang panabut ug pagpasabut sa atong doktrina ug gipanghimo kaniadto. Kanunay nga maalamon nga himoong usa ka batasan ang pagtuon sa pulong sa buhing mga propeta ug mga apostoles; updated kanunay sa bag-ong mga isyu sa Simbahan, polisiya, ug mga pamahayag pinaagi sa mormonnewsroom.org ug LDS.org; ug konsultahon ang mga buhat sa lehitimo, mahunahunaon, ug matinud-anong mga LDS scholars sa pagsiguro nga dili ninyo matudlo ang dili tinuod, gipapas na, o mga katingad-an, ug lahi.

Ang mga author sa pagtuon sa nanubra nga pangangkon nakabantay nga “ang kalagmit sa nanubrang pagpangangkon, ilabi na sa pangangkon nga siya eksperto, … makabugnaw sa mga tawo gikan sa pag-edukar sa ilang kaugalingon sa mga butang nga gikonsiderar nila nga sila maalamon.”¹⁰

Agi og dugang sa pagkahimong tibuok kinabuhi nga tigkat-on, kinahanglan nga nagbuhat sab kamo sa mga butang nga nagtugot sa Balaang Espiritu nga maglihok diha kaninyo. Kanang mga butanga naglakip sa sinserong inadlaw nga pag-ampo, tinuorayng pagpuasa, regular nga pagtuon ug pamalandong sa kasulatan ug sa pulong sa buhing mga propeta, paghimo sa Igpapahulay nga kahimut-an, pag-ambit sa sakrament uban sa pagpaubos ug paghinumdom kanunay sa Manluluwas, pagsimba sa templo kanunay kon mahimo, ug, sa katapusan, pagtabang sa mga timawa, kabus, ug nagsubo—sa naa man sa duol ug tadlas sa kalibutan.

Aron matuman sa tukma ang inyong mga oportunidad ug responsibilidad, kinahanglan ninyong buhaton kon unsa man ang inyong isangyaw!

Pagmaisugon sa pagpangita og tambag ug koreksyon gikan sa inyong kasaligan: kapikas, lider sa priesthood, o mga supervisor. Pangutan-a sila kon asa kamo pwede nga molambo sa inyong personal nga pagkadisipulo. Likayi gayud ang mga butang nga makapalayo sa Espiritu.

Dugang pa, akong isugyot nga personal ninyong interbyuhon ang inyong kaugalingon usahay ug ribyuha ang 2 Nephi 26:29–32, Alma 5:14–30, ug Doktrina ug mga Pakigsaad 121:33–46. Sa paghimo niini matabangan kamo sa pag-ila sa matang sa mga tintasyon nga atubangon natong tanan. Kon may angayan usabon sa inyong kinabuhi, sulbara kini.

Likayi ang tintasyon nga magduda sa motibo sa inyong mga kauban sa trabaho. Hinoon, susiha og maayo ang inyong kasingkasing ug siksika ang kaugalingon ninyong mga tinguha ug motibo. Niana lamang ang Manluluwas makausab sa inyong kasingkasing ug mapahiangay ang inyong mga tinguha ug mga motibo ngadto sa Iyaha.

Ang nagtubo nga henerasyon kinahanglang masayud, makasabut, mohangup, ug moapil sa plano sa Dios alang sa kaluwasan. Ang pagkasabut sa plano mohatag nila og balaang panabut diin makita ang ilang kaugalingon isip mga anak sa Dios, nga makatabang sa pagsabut sa matag doktrina, buhat, ug polisiya sa Simbahan.

Ang mga magtutudlo sa ebanghelyo karon kinahanglang modawat sa oportunidad ug responsibilidad sa pagtudlo sa kabatan-onan sa ika-21 nga siglo sa saktong mga baruganan kabahin sa plano, lakip sa balaanong tinugutan nga doktrina sa kaminyoon ug sa tahas sa pamilya sigun sa gipasabut sa pamahayag kabahin sa pamilya.¹¹

Ang doktrina sa mahangturong kaminyoon ug pamilya maoy mahinungdanong bahin sa plano sa Dios sa kalipay. Naglakip kini sa kaugalingon natong na-sealed sa templo nga mga pamilya nga kabahin sa mahangturong pamilya sa Langitnong Amahan mismo sa celestial nga gingharian. Tungod kay kini direktang may kalabutan sa kaugalingon Niyang pamilya ug sa kaugalingon Niyang espiritung mga anak, gitudloan kita sa Genesis nga ang “lalaki ug babaye iyang gibuhat sila.” ug gisugo niya si Amahang Adan ug Inahang Eva nga “dumaghan kamo, ug pun-on ninyo ang yuta” (tan-awa sa Genesis 1:27–28).

Ginaingon nga ang plano sa kalipay magsugod ug matapus sa pamilya. Sa pagkatinuod, nagsugod ang pamilya didto pa sa premortal nga kalibutan, diin nagpuyo kita nga mga sakop sa pamilya sa atong langitnong mga ginikanan. Ug unya sa katapusan, ang mga pasalig sa pamilya ug mahigugmaong mga relasyon dili lamang magpadayon kondili magkadaghan pa pinaagi sa proseso sa pagpanganak (tan-awa sa D&P 131:1–4; 132:19).

Ang gikinahanglan gayud aron makonektar kining tanan—diin ang plano sa Dios ug atong destinasyon mag-agad ug magsentro—mao ang atong Manluluwas, si Jesukristo. Ang maulaon Niyang sakripisyo naghimong posible sa tanang butang, apan dili limitado sa mahigugmaon, mapinanggaon, ug mahangturong kaminyoon ug pamilya.

Imahe

Portrait of Jesus Christ

Gitudlo sa Ginoo kanato nga walay dili minyo nga tawo, bisan sa iyang pagkamatarung, ang makabaton sa tanan nga ihatag sa atong Langitnong Amahan para sa Iyang mga anak. Ang dili minyo nga indibidwal katunga ra sa pormula, dili makapuyo sa kinatas-ang dapit sa ginghariang celestial (see 1 Mga Taga-Corinto 11:11; D&P 131:1–4).

Kinahanglang masabtan sa inyong mga estudyante nga ang katuyoan sa mortalidad mao ang pagkahimong sama sa Dios pinaagi sa pag-angkon og pisikal nga lawas, mogamit sa kabubut-on, mobuhat sa mga tahas nga kanhi naa lamang sa atong langitnong mga ginikanan—mga tahas sa bana, asawa, ug ginikanan.

Gipaniguro sa mga propeta nga ang tanang takus ug mosalig ni Ginoong Jesukristo apan wala ma-seal sa usa ka kapikas o walay mga anak niining kinabuhia moangkon niana nga mga oportunidad sa kalibutang moabut.

Tudloi ang mga kabatan-onan nga sa Simbahan sa Ginoo, adunay dapit alang sa pagsimba, pagserbisyo, ug paglambo isip mga igsoon sa ebanghelyo. Pahinumdumi sila sa gitudlo ni Lehi—nga ang tumong sa Dios ug paglaum alang kanato mahimong maglangkob sa mosunod: “Si Adan napukan aron ang mga tawo mahimo; ug ang mga tawo naingon, nga unta sila makabaton og hingpit nga kalipay” (2 Nephi 2:25).

Gusto sa Langitnong Amahan nga dawaton nato ang Iyang depinisyon sa kaminyoon ug sundon ang Iyang unang sugo nga “dumaghan kamo ug pun-on ninyo” (Genesis 1:28)—dili lang sa pagtuman sa iyang plano apan sa pagpangita usab og kalipay nga gidesinyo sa Iyang plano nga ihatag ngadto sa Iyang mga anak.

Isip mga Church educators, tabangi ang atong mga batan-on nga makabaton og tin-awng panabut sa plano sa Dios sa kalipay diin ang tinuod nga kalipay maggikan sa Iyang mga anak. Tabangi silang mahibalo, mohangop, moapil, ug manalipud niini. Sa 40 ka tuig nakong kasinatian isip General Authority, nahingawa ko sa daghang miyembro sa Simbahan, batan-on ug mas gulang, kinsa dayag nga wala makasabut sa plano para sa mahangturon ug balaan nilang destinasyon.

Mao nga, kaubanan kong mga magtutudlo, kinahanglan natong pangitaon ug ikalipay kining mga oportunidad sa pagpasabut, sa doktrinal ug sa espiritwal, nganong mituo kita nga ang pagkahibalo sa dakong plano sa Dios sa kalipay makatubag sa daghang “ngano” nga tingali ipangutana kanato. Ang pagpahayag sa atong gituohan bahin sa premortal nga kinabuhi diin nagpuyo kita isip espiritwal nga mga anak sa Langitnong Amahan ug Langitnong Inahan magtugot nato sa pagpasabut nganong gimugna kini nga yuta. Usa sa mahinungdanong katuyoan sa mortal nga kinabuhi mao nga mahimo natong masunod kana nga kasinatian sa pamilya nga kita mismo, dinhi niining kinabuhia isip mga ginikanan kay sa mga anak lamang. Ibahandi ang inyong mga nasabtan sa doktrina ug katuyoan sa plano sa Langitnong Amahan para sa mahangturon natong kalipay. Ug ipadayon ang pagtudlo niini.

Busa, sa pagtapos ug pag-summarize, ang mga punto nga akong gipakigbahin kaninyo mao ang:

• Tudloi ang mga estudyante nga ihiusa ang pagkat-on pinaagi sa pagtuon ug hugot nga pagtuo uban sa lunsay nga pagpamatuod.

• Tudloi ang mga estudyante nga magpabilin sa sakayan ug manggunit!

• Tudloi ang mga estudyante nga ikontrolar ang ilang mga mobile device ug tutokan ang pagkakonektar ngadto sa Espiritu Santo kay sa Internet.

• Bakunahi ang mga estudyante sa mga kamatuoran sa plano sa kaluwasan nga makita diha sa ebanghelyo ni Jesukristo.

• Hinumdumi nga ang “Ngano?” mahimong usa ka mahinungdanon nga pangutana nga mopadulong sa pagsabut sa ebanghelyo.

• Isuhito og maayo ang mga sulod sa Gospel Topics nga mga essay.

• Ayaw pagsobra sa pagpangangkon ug ayaw kahadlok nga moingon og, “Wala ko kahibalo.”

• Pagmahimong tigkat-on sa tibuok kinabuhi.

• Pagtinguha og tambag ug pagkorihir gikan niadtong inyong gisaligan.

• Ikonsiderar ang paghimo og panagsa nga personal nga interbyu aron sa pagribyu sa inyong espirituhanong pagpangandam, sa inyong kakugi, ug sa inyong kaepektibo.

• Itudlo nga ang plano sa kalipay magsugod ug motapus diha sa pamilya. Hinumdumi sa kanunay ang plano sa kaluwasan.

• Itudlo nga ang kaminyoon ug pamilya nagdala og mahangturong kalipay.

Hinumdumi, ang paghiusa sa pagkat-on pinaagi sa pagtuon, pinaagi sa hugot nga pagtuo, ug pinaagi sa lunsay nga pagpamatuod moresulta sa tinuod ug dugay ug malungtarong pagkakabig. Labaw sa tanan, ang lig-on nga pagtuo diha sa Pag-ula ni Ginoong Jesukristo mahinungdanon sa atong espirituhanong kalig-on ug paglambo.

Hinaut nga makaplagan ninyo ang kalipay ug kalinaw nga naggikan sa pagkasayud nga pinaagi sa inyong pagtudlo, nakatandog kamo og kinabuhi ug nakabayaw og usa sa mga anak sa Langitnong Amahan sa panaw pabalik sa Iyang presensya.