Pagmugna sa Atong Malipayong Pagtapos

Imahe

man and woman on a train

Paghulagway pinaagi ni Joshua dennis

Namiyembro ko sa Simbahan sulod sa 10 ka tuig sa dihang akong nadawat ang kompermasyon nga kinahanglan mangita na ko og usa ka kompanyon. Nakasabut ko sa doktrina sa celestial nga kaminyoon, ug kinasingkasing ko nga nag-ampo nga maangkon ang ingon nga kaminyoon ug makahimo og usa ka pamilya. Wala ko kahibalo kon unsaon nga makakita ko og usa ka babaye nga Santos sa Ulahing mga Adlaw didto sa Samara Russia, diin ako nagpuyo, apan misalig ko sa Ginoo nga motabang nako (tan-awa sa 1 Nephi 3:7).

Niadtong 2009 gidapit ko sa pag-apil sa sunod sunod nga mga komperensya sa single adult nga ipahigayon sa 10 ka mga siyudad sa tibuok Russia Samara Mission. Naglaum ko nga kining mga kalihokan tingali mao ang pamaagi nga akong ikahimamat ang akong kompanyon sa kahangturan.

Nalipay kaayo ko nga nagtambong sa mga komperensya, diin malampuson kini sa daghang paagi, apan mga bulan ang milabay ug wala lang gihapoy bisan usa nga relasyon sa pakigdate ang milambo.

Nagsugod nako og kabalaka ug mihangyo sa Ginoo nga tabangan ko. Agi og tubag, mga hunahuna misantop sa akong ulo nga nagpasidaan nako nga basin matintal ko sa pagpadayon og mga relasyon nga gawas sa Simbahan.

Nakahibalo ko nga ang mga propeta nagtudlo nga kita kinahanglan nga magminyo sa templo, ug nakahibalo ko nga imposible nga maangkon ang kahingpitan sa kalipay kon ang akong kapikas ug ako wala mahiusa sa pagpaningkamot sa pagsunod sa Manluluwas. Nagpadayon ko sa pag-ampo aron maangkon ang espirituhanon nga kusog sa pagharong sa ingon nga mga tintasyon ug aron maangkon ang tabang sa Ginoo sa pagsunod sa Iyang plano alang kanako.

Sa kasamtangan, nagsugod ko sa pagpangandam alang sa akong regular nga pagbyahe ngadto sa Helsinki Finland Temple, diin mopuyo ko og usa ka semana.

Diha sa tren nakailaila nako ang tulo ka laing mga byahero, lakip sa usa ka babaye nga gihinganlan og Mariya, kinsa akong nahibaloan nga single. Makabibihag ang iyang kaanyag sa pamarug ug sa espirituhanon, ug naghunahuna ko nga nganong wala pako sukad nakahibalag og babaye nga sama niya. Naghunahuna ko sa akong bag-uhay lang nga pasidaan mahitungod sa pagkatintal sa pagpadayon sa pakigrelasyon gawas sa Simbahan.

“Paglig-on,” hunahuna nako. “Pagmatinud-anon sa imong mga barunganan. Makaplagan nimo ang usa ka takus ug maanindot nga sister sa Simbahan.”

Naghunahuna ko nga basin nalang mahimo kong usa ka maayong misyonaryo nga miyembro ug tingali ipakigbahin ang ebanghelyo diha niya, ug kay nagkinahanglan og pagdasig, akong gikuha ang akong kopya sa Basahon ni Mormon aron magbasa, naghunahuna kon makamatngon ba siya. Sa akong kasurprisa, si Mariya mikalit og ingon, “Mura og kahibalo nako kon asa ka paingon!”

Pagtan-aw nako niya naggunit siya sa iyang kopya sa Basahon ni Mormon. Miyembro usab siya sa Simbahan ug paingon usab siya ngadto sa templo.

Pagkasunod buntag mipadayon mi sa among byahe ngadto sa Helsinki nga nagbus. nahibaloan nako nga si Mariya taga Voronezh, usa ka siyudad sa Russia Moscow West Mission. Nakagusto dayon ako kaniya ug matinguhaong nag-ampo alang sa direksyon. Agi ug tubag, nakasinati ko og maayong pagbati sa akong kasingkasing.

“Ginoo, usa lang gyud mi ka semana sa templo,” nag-ampo ko. “Palihug tabangi kami nga magkaila-ila og mas maayo sa matag usa niining panahona.”

Ug nahimo gayud namo kini. Tali sa mga session sa templo, manglakaw mi, mangaon, miadto sa tindahan, ug nagkaistoryahanay. Pagtapos sa semana, namauli nami—si Mariya ngadto sa Voronezh ug ako sa Samara. Apan mibyahi kami ngadto sa among matag usa ka mga siyudad aron magkailhanay pa gayud og mas maayo ang usag usa, ug niadtong Septyembre 14, 2010, naminyo mi sa bag-ong gipahinungod nga Kyiv Ukraine Temple.

Si Mariya ug ako karon nagpuyo sa Voronezh ug nagmalipayon. Nakasabut mi nga ang mga fairy tale tapuson sa mga pulong nga “ug sila nagpuyo nga malipayon human sa tanan” Sa tinuod nga kinabuhi kita makamugna og atong kaugalingon nga malipayon nga pagtapos pinaagi sa padayon nga pagmatuod sa atong kamatinud-anon ngadto sa Ginoo pinaagi sa pagsunod sa atong mga pakigsaad sa templo, padayon sa pagbuhat sa pagpalig-on sa atong kaminyoon, ug pagpaningkamot aron mahisama ni Jesukristo.

Mapasalamaton kami sa among milagroso nga panagtagbo ug hinaut nga ang among istorya makatag og paglaum ug maghatag og kusog ngadto sa uban kinsa nagpangita sa ilang mga kompanyon sa kahangturan. Ang ubang mga istorya mahimong dili motapos sama sa amoa, apan si Mariya ug ako nasayud nga bisan unsa pa man ang mga hagit, ang Ginoo makadungog sa among mga pag-ampo. Siya nahigugma sa matag usa kanato ug nagpakabana sa matag usa kanato. Kon ato Siyang tugutan, Siya mogiya sa atong mga dalan ug itugot nga ang tanan nga mga butang maghiusa sa paglihok alang sa atong kaayohan (tan-awa sa D&P 90:24).