Usa ka Lahi nga Pasko

Imahe

A Different Christmas

Hapit na ang Pasko, apan si Diego wala pa ganahi. Mao kini ang unang Pasko sukad nagbuwag ang iyang mga ginikanan. Ug dili na parehas ang gibati. Siya ug ang iyang igsoong lalaki, si Samuel, dili gani makakita ni Mama niining Paskoha.

“Lahi na ang tanan,” miingon si Diego ngadto ni Papa.

“Nasayud ako.” Subo ang mga mata ni Papa. “Usahay mausab ang mga butang sa dili pa kini mahimong mas maayo.” Nahilum siya og kadiyot, dayon mipahiyom. “Ang Pasko lahi karong tuiga, apan wala kana magpasabut nga dili kita magmalipayon. Magsaulog gihapon kita sa pagkatawo sa Manluluwas.

Miyango si Diego. Lisud nga dili makakita ni Mama, apan tingali ang Pasko mahimo gihapon nga maayo, sama sa gisulti ni Papa. Gusto si Diego nga motabang nga kining Pasko mahimong magmalipayon.

Miadto siya sa iyang kwarto aron maghunahuna. Usahay alang sa Pasko maghimo sila og proyekto sa pagserbisyo isip pamilya. Unsay ilang mahimo niining tuiga?

Gitan-aw ni Diego ang palibut sa kwarto. Nakakita siya og awto-awto nga wala na niya dulai. Iya kining gipunit ug gipatuyok ang mga ligid. Kini maayo pa kaayo. Tingali siya ug ang Papa ug si Samuel makahatag og mga dulaan ngadto sa mga bata nga walay dulaan! Nakakita siya og lain pang mga dulaan ug gibutang kini sa bag uban sa awto-awto.

Sa dihang nahuman na si Diego, iyang gidala ang bag ngadto sa kwarto ni Samuel. “Makatabang ba ko nimo sa paglimpyo sa imong kwarto?” nangutana siya. “Surprisa kini ngadto ni Papa.”

Mitan-aw si Samuel gikan sa litrato nga iyang gidrowing. “Sigurado.”

Nagtinabangay ang duha ka batang lalaki sa paglimyo sa kwarto ni Samuel. Gisultihan siya ni Diego mahitungod sa plano. Nakakita sila og pipila ka mga dulaan nga wala dulai ni Samuel ug gidugang kini ngadto sa bag.

Sa nahuman na sila, ilang gidala ang bag sa silong. “Pa,” miingon si Diego, “nakakita na mi og mga dulaan nga wala na namo dulai. Mahimo ba namo kining ihatag ngadto sa mga bata nga walay mga dulaan?”

Nasurprisa si Papa ug nalipay. Nindot kana nga ideya! Dad-on nato kana ngadto sa gipuy-an sa mga walay balay karong hapon.”

Ang pagbisita sa pinuy-anan sa mga walay balay makalingaw. Sila si Diego ug Samuel nakadula sa ubang mga bata samtang si Papa nakig-istorya sa mga dagko.

Sa ilang pagpauli, si Papa nangutana kon unsa pa ang ilang mahimo aron mahimong espesyal kini nga Pasko.

“Sa miaging Pasko nagluto mi og pagkaon alang sa among mga silingan,” miingon si Diego.

“Mahimong buhaton nato kana,” miingon si Papa. “Mamalit ta og mga kinahanglanon nga himoon og mga biskwit.”

Nagtuo si Samuel nga ang mga biskwit usa ka nindot nga ideya.

Ang mga batang lalaki mitabang ni Papa sa pagpamalit sa mga sagol didto sa tindahan. Didto sa balay naghimo sila og dough ug giporma nga bitoon ug kahoy. Sila si Diego ug Samuel mi-frost og yellow ug green sa mga biskwit. Dayon nagdala sila og gamay nga mga bag sa mga biskwit ngadto sa ilang mga silingan.

Pagkahuman sa adlaw, si Diego gikapoy apan malipayon. Siya ug si Samuel ug si Papa nakabuhat sa mga butang isip pamilya ug nakatabang sa uban. Sakto si Papa. Ang Pasko lahi, apan nindot gihapon kini.