Ang Pagkahimong usa ka Tinuod nga Bayani sa Buhat
Ang pagpadayon sa unahan dili usa ka tan-awunon nga kalihokan. Bangon ug padayon!
Hunahunaa ang inyong paborito nga bayani sa buhat. Karon, na! Nakahunahuna ba kamo og maisug, mapangahason nga pagpanlimbasog sa pagbuntog sa malisud nga oposisyon? O tingali usa ka suabe nga tigpanimpalad nga may hapsay nga hinapay sa buhok? Nakahunahuna ba kamo og bisan kinsa gikan sa mga kasulatan?
Unsa man ang mahitungod nilang Nephi, Noah, Abish, o ni Pedro? Wala sila makigbatok sa kasundalohan uban sa ilang mga komo ug sa inantigo nga sinultihan, apan sila ang matawag ninyo nga tinuod nga mga bayani sa buhat. Ilang gigamit ang hugot nga pagtuo, misalig sa Dios, ug mipadayon. Milihok sila.
Inyo bang gilikayan nga makatuman tungod kay wala kamo makadawat og klaro, anam-anam nga direksyon? Tingali adunay usa ka tawo sa inyong klase o korum nga wala na mosimba. Nagduhaduha ba kamo sa pagtabang kanila tungod kay dili mo sigurado unsaon pagbuhat niini? Importante ang pagdasig, ug kinahanglan kanunay nato kining tinguhaon. Apan wala kana magpasabut nga maglingkod ug maghulat lang sa usa ka mensahe sa text gikan sa usa ka anghel una pa kita mobuhat og maayo. Ang Langitnong Amahan gusto nga imong higalaon kana nga tawo. Gusto Niya nga kita dili maglipud-lipod ug mobuhat!
Unsa kaha kon sila si Nephi, Noah, Abish, o ni Pedro naghulat lang? Silang tanan adunay malisud nga mga butang nga buhaton. Unsa kaha kon sila mipili nga maglinkod ug nagpahayahay lang hangtud makadawat sila og dugang nga instruksyon. Lahi ra unta kaayo nga mga butang ang nahitabo …
Hulat lang ug Tan-awa?
“Ako maghulat sa pagbuhat sa mga butang ang ang Ginoo nagsugo, kay ako nasayud nga ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila, mao nga walay koy buhaton nga bisan unsang butang hangtud masayud ko sa eksakto kon unsa ang paagi” (non-existent nga bersyon sa 1 Nephi 3:7).
Sa kaulahian human ang pamilya ni Lehi mibiya sa ilang panimalay sa Jerusalem, ang Ginoo mimando sa mga anak ni Lehi sa pagbalik ug kuhaon ang mga palid gikan ni Laban. Apan sa atong nahibaloan, Siya wala naghatag kanila og bisan unsang mga timailhan kon unsaon sa pagbuhat niana. Ang nahibolan lang ni Nephi ug sa iyang mga igsoon mao nga ang Ginoo nagsugo nila sa pagkuha sa mga palid. Nabati naba ninyo sukad nga wala moy ideya kon unsay buhaton sa mga butang nga gipabuhat diha kaninyo? (Tingali mao kana ang usa ka rason nga sila si Laman ug Lemuel nagmulo!) Anaa ra kadto ni Nephi ang paggamit sa iyang hunahuna ug pagpakita og hugot nga pagtuo ug sa pag-adto ug pagbuhat. Apan unsa kaha kon nagpabilin lang siya ug nag-usik sa panahon? Unsa kaha kon si Nephi mibalibad sa paglihok hangtud ang Dios mihatag niya og usa ka plano? Ang pagkuha sa mga palid malisud! Siya ug ang iyang mga igsoong lalaki misulay sa makaduha ug napakyas! Unsa kaha kon si Nephi miyaka lang diha sa may paril sa Jerusalem ug naghulat sa Dios sa pagsulti niya kon unsay buhaton?
Ang mga palid tingali anaa pa sa panudlanan ni Laban. Maayo gani nga si Nephi wala naghulat.
Hinoon, giubanan siya sa Espiritu, “wala masayud sa sinugdanan sa mga butang nga ako mobuhat. Bisan pa niana ako mipadayon” (1 Nephi 4:6–7; empasis gidugang). Wala siya basta lang naghulat; wala niya tuguti ang mga butang nga wala niya masayri mopugong kaniya. Nakahibalo siya nga ang Dios maghatag og paagi, ug husto siya. Sa higayon nga milihok si Nephi, miaksyon, ug mipadayon sa unahan, ang Ginoo migiya kaniya ug mitabang kaniya.
Apan ngano man?
“Ug si Noe mikwestyon sa tanan nga ang Ginoo misugo kaniya” (non-existent nga bersyon sa Genesis 7:5).
Usahay ang Dios maghatag og eksakto nga mga instruksyon. Si Noe ang labing maayong ehemplo. Sa dihang misugo ang Dios kang Noe sa paghimo og arka, ang Dios mihatag og mga sukod, mipasabut unsa nga mga materyales ang gamiton, ug gani mihatag ni Noe kong si kinsa ang mamahimong pasahero sa arka. Lagmit nakadawat kamo og piho nga mga pag-aghat nga sama niana, ug kitang tanan nakadawat og piho nga mga sugo sa mga barunganan diha sa Alang sa Kalig-on sa mga Kabatan-onan nga pamphlet. Apan bisan kon nahibalo kamo sa eksakto kon unsa ang angay ninyong buhaton, magduha duha paba gayud gihapon kamo? Natintal naba kamo sukad sa pagkwestyon sa Ginoo imbis mosunod Kaniya?
Unsa kaha kon si Noe nakadungog sa Ginoo ug dayon miingon, “Apan ngano man? Wala ko makasabut niini.” Unsa kaha kon naglubog lang siya ug mibalibad sa paglihok hangtud nga iyang nasabtan pag-ayo kon ngano ang Ginoo magpadala og lunop, naghunahuna sa makadiyot kon ang mga instruksyon gikan ba gayud sa Dios?
Diha gayud ang lunop, apan aduna kahay arka? Ug naunsa kaha ang kaliwatan sa katawhan? Usa gayud kadto ka maayong butang nga si Noe wala naglubog lang ug mikwestyon sa tanang butang.
Hinoon “gibuhat ni Noe sumala sa tanan nga gisugo sa Ginoo kaniya” (Genesis 7:5). Wala siya mikwestyon, milihok siya uban sa hugot nga pagtuo. Kon sa husto nga kinaiya, ang mga pagkwestyon maayo nga butang. Makatabang kini nato sa paglambo ug maggiya kanato ngadto sa mas daghang kamatuoran. Apan kon mobalibad kita sa pagbuhat sa bisan unsang butang hangtud makadawat kita sa mga tubag nga atong gusto, ang mga pagkwestyon makapugong kanato. Si Noe adunay mga pangutana, apan wala niya kini tuguti nga makapungong kaniya. Bisan kon kini ingon og dili kasagaran, gihimo niya ang barko diha sa mamala, mipundok sa tanang mga hayop ug gipasulod niya ang iyang pamilya ngadto sa arka. Ug sa dihang misugod na sa pag-ulan, tingali nalipay siya pag-ayo nga iyang gibuhat ang ingon. Si Noe milihok uban sa pagtuo, ug ang Dios mipanalangin kaniya ug sa tibuok niyang pamilya.
Padaplin ug Tan-awa?
“Sa diha nga siya nakakita nga ang tanan nga mga sulugoon ni Lamoni nangatumba sa yuta, … siya nasayud nga kini mao ang gahum sa Dios; ug nagdahum nga … ang pagtan-aw niini nga talan-awon … mohimo sa [uban] sa pagtuo diha sa gahum sa Dios, busa siya mipadaplin ug nanghinaut nga adunay laing tawo nga mopundok sa mga tawo” (non-existent nga bersyon sa Alma 19:17).
Si Abish usa ka babaye nga Lamanite. Siya nakabig ngadto sa Ginoo sulod sa daghang katuigan, apan tungod kay siya nagpuyo uban sa mga Lamanite nga wala nagtuo, iyang gitago ang iyang patuo. Sa dihang nagtudlo si Ammon ni Haring Lamoni sa ebanghelyo, ang hari ug ang iyang mga sakop sa panimalay nabuntog sa gahum sa Ginoo. Si Abish miila niini isip usa ka oportunidad alang sa iyang mga higala ug mga silingan aron makita ug makatuo sa gahum sa Dios. Anaa ra kadto niya kon pundukon ba ang mga tawo aron sa pagsaksi sa milagro.
Apan unsa kaha kon wala lang niya buhata? Human sa mga katuigan nga nagtago sa iyang pagtuo, nagdagan ngadto sa mga kabalayan aron sa pagsulti sa tanan tingali medyo makahadlok! Naaghat naba kamo sukad sa pagsulti apan gibati nga nahadlok mahitungod niini? Ang pagpakigbahin sa inyong pagtuo mahimong lisud! Unsa kaha kon si Abish mipadaplin lang ug nanghinaut nga ang mga tawo sulagma lang nga makasaksi? O nga dunay laing tawo nga makasulti?
Kon mao, walay magkapundok sa pagtan-aw ni Haring Lamoni ug sa iyang mga sakop sa panimalay nga nangatumba sama nga sila nangamatay o nga sila milagruso nga naulian. Wala unta sila didto aron makapaminaw ni Haring Lamoni, sa rayna, ug ni Ammon nga nagtudlo sa ebanghelyo.
Maayo nalang kay wala siya mipadaplin lang. Hinoon siya “midagan ngadto sa usa ka balay ug ngadto sa lain nga balay, nagpahibalo niini ngadto sa mga katawhan” (Alma 19:17; empasis gidugang). Aduna siyay pagpamatuod sa Ginoo, ug wala niya itugot nga ang kahadlok makapugong kaniya. Wala siya naghulat sa laing tawo nga mosulti. Sa dihang nakahigayon siya, wala siya magduha-duha—midagan siya! Si Abish milihok, ug ang Ginoo mipanalangin kaniya nga makita ang daghan sa iyang katawhan nga nakabig ngadto sa ebanghelyo (tan-awa sa Alma 19).
Paminaw ngadto sa Kalibutan?
“Ug [si Jesus] miingon, Umari ka. Ug sa dihang si Pedro milingkod sa sakayan, siya wala molakaw ibabaw sa tubig, aron sa pag-adto ni Jesus” (non-existent nga bersyon sa Mateo 14:29).
Isip usa ka mananagat, si Pedro nasayud og daghan mahitungod sa mga sakayan. Sama pananglit, si Pedro nakahibalo nga kon naay dakong unos sa dagat, magpabilin kamo diha sa sakayan. Nasayud siya nga ang mga tawo kinsa motikang ngadto sa tubig mounlod Mahunahuna ba ninyo kon unsa kaha ang iyang hunahuna sa dihang nakita niya si Kristo nga naglakaw sa tubig?
Apan unsa kaha kon nagpabilin lang siya diha sa sakayan? Ang tanan nasayud nga ang tawo dili makalakaw sa tubig. Unsa kaha kon gitutokan lang ni Pedro kon unsa ang “nasayran” sa kalibutan? Usahay ang pagtulon-an ni Kristo ug sa Iyang mga propeta ingon og nahisupak kon unsa ang gisulti sa kalibutan. Ug ang kalibutan madanihon ug sayon paminawon. Unsa kaha kon si Pedro miingon ni Kristo nga ang paglakaw sa tubig dili syentipikanhon o dili makatarunganon? Unsa kaha kon si Pedro nahadlok pag-ayo sa pagtikang ug sa paglakaw ngadto kang Kristo?
Wala unta niya masinati ang usa ka talagsaong kasinatian uban sa Agalon. Wala unta siyay kahigayunan sa pagpalig-on sa iyang pagtuo, ug mahimong siya naghunahuna mahitungod sa iyang pagtuo sa umaabut kon gikinahanglan niyang makatuman og usa ka butang. Maayo nalang nga si Pedro wala nagpabilin sa sakayan. Bisan paman sa mga balud, sa unos, ug sa iyang kasinatian sa dagat, si Pedro gustong mokawas sa sakayan ug maglakaw ngadto kang Kristo. Bisan paman sa tanang butang nga “nahibaloan” sa kalibutan, si Pedro milakaw sa tubig. Bisan sa iyang kahadlok, anaa si Kristo sa paggunit kaniya (tan-awa sa Mateo 14:28–31).
“Ako?” Usa ka Bayani sa Buhat?
Kamo gipadala dinhi aron mamahimong bayani sa buhat sa inyong kinabuhi nga puno sa aksyon! Wala kana nagpasabut sa pag-ambak gikan sa nabungkag nga building o pag-iskapo sa pagginukdanay sa sakyanan. Nagpasabut kini sa paghimo og mga pagpili, paglihok, ug sa pagpadayon.
Ang Ginoo nagtudlo nga kita “ang mga tawo kinahanglan nga matinguhaon nga moapil diha sa usa ka maayo nga katuyoan.” Wala siya mag-ingon sa eksakto kon unsa kanang maayong tinguha apan hinoon gusto nga kita “mobuhat og daghan nga mga butang diha sa ilang kaugalingon nga gawasnon nga kabubut-on, ug magpahinabo sa daghan nga pagkamatarung” (D&P 58:27). Kana nagpasabut nga Siya misalig kaninyo sa paghimo sa inyong kaugalingong mga desisyon ug modesider kon sa unsang paagi nga inyong mapahinabo ang pagkamatarung. Sa kanunay, ang tabang moabut human nato gipakita ang atong hugot nga pagtuo ug mihimo sa unang mga lakang.
Ang Ginoo kanunayng anaa aron sa paggiya kanato kon nagkinahanglan kita niini, apan kon kamo mobalibad sa pagbuhat ug sa pagpadayon sa unahan sa inyong kaugalingon ug molaum sa Dios nga magsulti kaninyo sa matag butang nga buhaton, kamo mahimong usa ka “tapulan ug dili maalamon nga sulugoon” (tan-awa sa D&P 58:26). Ug kinsa ang gusto nga mahimong tapulan nga sulugoon kon kamo mahimong usa ka bayani sa buhat?