Melutk er sel ngara Rengul

A domalech el kot e mo meluches ra kired lomalech er ngii er a uriul a kora klebelung, e ng di bebil ra taem e kede omes er kid el uaisei a blekerdeled ra bebil ra tekoi ra klechad.

Sel de chedal a Ikelesia, e ng mo rengii ra teleteled el mo mechesang e ra otutel a prokuram ra ebangkelio, uldasu, molmuut e ra suobel el de semeriar er ngii, ng klou a ultutelel, malechub eng meskid a deuil a rengud. Kede mo rimel el mo meluches a soad el meruul el meliuekl er ngii, meng ual rellid el mo oumerang el kmo kede oltaut er sel rengul a ebangkelio.

Tiang a beot a doruul er ngii.

A irechar el mei e kede mla ngmai a bedochel el losisechakl ma ulekrael er a re profet er a Dios. Kede dirrek el melai a osisechakl ma omsodel ra kekarous el llechukl, babier, ma hong ra Ikelesia. Ngdi beot er kid a melilt ersel soad el tekoi ra ebangkelio, e luchesii a tuted el meliuekl er ngii, e ochotii el kmo kede mla mesang sel rengul a ebangkelio.

Tiang a diak el beches el mondai er chelechal taem. A ngaramong, e a remengeteklel a klechelid a milngoit a klou taem meluches, omechobech, e kautitekangel el kmo ngera er a ikel dart el llach a kot el klou a ututelel.

A tara klebesei e a chelechad er a re melomes ra tekingel a klechelid a millasem loba Ososbel lolsiseb er ngii er tial mondai. Me tulker er Ngii me lolebodeb er tial tekoi el derta er tir a sebecherir el mesang.

“Mastang,” me te uleker er Ngii, “ngera sel kot el klou el ngarbab el llach el lechukl?”

Kede re bekl el chad el medengei sera longer a Jesus: “ Bo le betik a rengum e ra Rubak el Dios er kau e ra rengum el rokir, ma klengar er kau el rokir, ma uldesuem el rokir.

“Tiaikid a kot el ngarbab el llach e kot el klou a belkul.

“E a ongeru el klou a belkul a di uai ngii, Bo le betik a rengum ra ngar bita er kau el ua le betik a rengum er kau.

“A cherrengelel a llach ma osisechakl er a re profet a ultuil e ra ikal eru el llach.”¹

Bo mungil metebengii sel tekoi: “A ultuil ra ikal eru el llach a cherrengelel a llach ma osisecheklir a re profet.”

A Osobel a diak el di lulchotii er kid sel moktek, Ngii a dirrek el milketeklii sel tuted.

Sel dechal a Ikelesia, e kede tibir el nguu el mera klengar er kid a ngklel a Jesus Kristo. Sel bleketakl er sel telbiil a sel klaodengei el kmo kid a mo melasem el mesuub el kirel a Dios, e mo betik a rengud er Ngii, melketek a klaumerang er kid er Ngii, mengull er Ngii, merael er a Rolel, e dechor el diak de mesim el sioning er Ngii.

Sel dolemolem el mesuub e ra Dios e melchesuar er Ngii lou beltik el reng el me er kid, e kede mengai el mo medengei el kmo sel diak a ulebengelel el tengetengel a Jesus Kristo a chedaol el sengk er a Dios. E a beltik el reng er a Dios a meklemelsid el mo merael er sel rael ra meral ouchel reng, el ngii a ngoikid el mora ongasireng el klausubes. Tial teletael a dolmii er kid el mo er ngii a klou el beltik el reng ma klubechub el mo er tirkel ngar bita er kid. Me kid a mo mesuub lomes lengelakl er a ikal domes. Kede mo oltngakl a ikel odubech el rullid el mo oltelechakl malechub e kede merritel ra rebebil el kirel a kngterir, ng tarbecheserir, ngelsengesir, deruchellir ra tekoi el buai, ng klechelid el ngarngii, belurir, malechub e ng chiro ra bedengir.

Kede mesterir a rokui el chad el de kebetech el ngelekel a Demad ra Babeluades—el odam malechub e ng ochedad.

Kede molngeseu ra bebil loba ungil klaudengei ma beltik el reng—molmuut er tirkel diak el beot a dou belti el reng el mo tir. Kede lmangel lobengterir a rengara chelebuul e mengelim er tirkel chelmongel.²

E kid a mo melchesuar el kmo ngdiak a ututelel er kid el meringel lomdasu e ra meral moktek ra ebangkelio.

A ikel eru el meklou el llach e a mokted er kid. A cherrengelel a llach ma osisechakl er a re profet a ultuil er a ikal eru el llach.³ Sel de kengei er tiang, e a rokui lungil tekoi a di ruebet er a urebetellel.

Alsekum e a kot el ngercheled, uldesued, ma blak el reng el dobang a melketek ra beltik el reng er kid el mo ra Ngarbab el Dios e omerk ra rengud el mora rebebil, eng sebeched el mo medengei el kmo kid a mla mesa melemalt el mokted e merael el kirel sel tuted—el mocha meral mesiungel a Jesus Kristo.