Relief Society no Botae

Linda K Burton, Wiadze Mfɛndzanan Relief Society President akã dɛ: Relief Society no botae nye dɛ “ɔbɛyɛ mbaa ahoboa ama onnyiewiei nkwa ne nhyira horow no.”¹ Yedua gyedzi, ebusua, nye mboa do na yɛdze yɛ hɛn “afamudze tsitsir wɔ edwuma no mu.”²

Carole M. Stephens, Ɔpamfo a Odzi Kan wɔ Wiadze Mfɛndzanan Relief Society Presidency mu no akã dɛ Relief Society “yɛ honam afamu nye sunsum mu edwuma” “Ɔno nye dza Agyenkwa ne nda mber mu no mbaa no yɛɛ na ɔno nye dza yɛkɔ do yɛ.”³

Sɛ yɛhwɛ Samaria ɔbaa no a nna ɔwɔ bura no ho no a, ogyaa n’ehina no wɔ hɔ na otuu mbireka kɛkãa kyerɛɛ binom dɛ Jesus yɛ nkɔnhyɛnyi no (hwɛ John 4:6–42), anaa yɛhwɛ Phebe a, ɔsom nkaafo enyigye mu n’abrabɔ nyina a (hwɛ Romefo 16:1–2), yehu Agyenkwa no ne nda mber mu no mbaa a wɔyɛɛ fasusu dɛ wɔdze enyimia bɛba Christ nkyɛn. Ɔno nye Onyia a obue hɛn kwan a ɔkɔ onnyiewiei nkwa no (hwɛ John 3:16).

Sɛ yɛhwɛ hɛn nkyerɛbaa edzikamfo wɔ Nauvoo, Illinois a, wɔboaa ano wɔ Sarah Kimball ne fie wɔ afe 1842 mu dɛ wɔrekyekyer hɔnankasa hɔn kuw a, yehu Nyankopɔn ne nhyehyɛɛ dɛ Ɔdze Relief Society robɔbɔ adze ma ɔnye asɔfodzi nhyehyɛɛ asaa. Eliza R. Snow kyerɛɛw hɔn kuw ne mbrasɛm ma Prophet Joseph Smith hwɛɛ do. Ohun dɛ nna Asɔr no wɔnnkyekyeree no emudzi mu kɛpeem dɛ wɔyɛɛ mbaa nhyehyɛɛ no. Ɔsee dɛ Ewuradze agye hɔn afɔrbɔ no ato mu mbom biribi wɔ hɔ a oye kyɛn ɔno. Ɔsee dɛ “Merebɛyɛ mbaa nhyehyɛɛ ahyɛ asɔfodzi no ase a ɔbɛfa asɔfodzi no ne nhwɛdo.”⁴

“Relief Society no nnyɛ tse dɛ mbaa kuw bi a wɔrobɔ hɔnho mbɔdzen ayɛ papa wɔ wiadze yi mu. Nna ɔyɛ soronko. Nna ɔyɛ ‘biribi a oye koraa’ osiandɛ wɔhyehyɛɛ no wɔ asɔfodzi tumdzi ase. Ne nhyehyɛɛ no yɛ anamɔn a ho hia wɔ Nyame N’edwuma a ɔrokɔ do wɔ asaase do no mu.”⁵