An Kraist ewe Achasefan Ina Ewe Pisekin Pwarata Ussun An Kot Tong

Weweiti pwe Samach Won Nang a fangeno Noun we Anamon pwe epwe wor ach manau fochofoch me ewe tufichin aani ewe manau esemuch a anisikich ach sipwe mefi an Kot ewe tong ese much me anonnon fan itach. Ach ewe Chon Amanau a pwan tongeikich.

“Io epwe tongeni aimufesenikich seni ewe tongen Christ? …

Ua nuku pwe ese wor mettoch epwe tongeni aimufesenikich seni an we tong; esap ren mano are manau, esap ren ekkewe chon nang are ekkewe setan, esap non ei fansoun are ewe fansoun epwe feitto,

“Esap ekkewe mettoch asan are ekkewe mettoch fan fonufan, ese wor mettoch non forian kewe meinisin epwe tongeni aimufesenikich seni ewe tongen God, iei ach tong non Christ Jesus ach Samol. Romans 8:35, 38–39

Elter D. Todd Christofferson seni ewe Mwichen Engon me Ruemon Aposel a apasa: Ren an Jises Kraist ewe Angangen Achasefan, “Ewe riaffou an ewe Chon Amanau non Gethsemane me An ewe metek won ewe irapenges ra angasakicheno seni ach kewe tipis ren an etiwa ewe mochen pwe angangen etipisi a nom woch. A anapano umoumoch me omusano ekkewe ra aier. Ewe Achasefan an Jises Kraist a pwan awesano ach kewe niwinimangen tipis ren an echikara me angasakich seni ekkewe riaffou sia nonnom non. ‘Iwe nengeni, I epwe riaffouni ekkewe metekin aramas meinisin, ewer, ekkewe metekin meinisin forian kewe, mwan, fefin, me semirit, ekkewe chon ewe faminien Adam’ (2 Nifai 9:21; pwan nengeni Alma 7:11–12).”¹

Kraist a fen “makkei [kich] won kumuchun [poun] kewe” (Isaiah 49:16). Linda K. Burton, Peresetenin Mwichen Fin Anisi Unusan, a apasa, “Ena wachimuken fofforun tong a fori ach sipwe fotopukutiw non ach tekisosonun iotek ne kinisou ngeni Samach won Nang ren nafochun an tong ngenikich a tinatiw Noun we Anamon mi unusoch an epwe riaffou fan iten ach kewe tipis, ach netipechou, me ekkewe mettoch meinisin ese ounusochu non pusin manauach.”²