Erisio-isop Christ Edi Idiongo eke Ima Abasi

Ndifiok ete ke Ete nnyin ke Enyong okono Ikpong-ikpong Eyen Emi Enye Obonde man otodo nnyin ikpenyene ikpokidem-unana-mkpa ye ndaha ndisim nsinsi uwem anam nnyin ikop anana-adanga ye ayanga-ifiok ima emi Abasi enyenede ono nnyin. Andinyanga nnyin amama nnyin nko.

“Anie edidianare nnyin ke ima Christ? …

“Koro mmotim mbure mfiok nte, mkpa ye uwem, ye mme angel ye mbong, ye nkpo eke odude ke emi, ye nkpo eke edidide, ye mme odudu,

“Ye ukong ye utungo, ye nkpo efen ekededi eke ebotde, idikemeke ndidianare nnyin ke ima Abasi, emi odude ke Christ Jesus Obong nnyin” (Romans 8:35, 38–39).

Elder D. Todd Christofferson eke Eboho mme Apostles Duopeba eketing abanga Erisio-isop Jesus Christ ete ke: “Ndutoho Andinyanga ke Gethsemane ye ufen Esie ke cross ama afak nnyin osio ke idioknkpo man oyuho se utip-ikpe okpoyomde oto nnyin. Enye ayak mbom ye erifen-nno ono mbonowo emi edikabakere-esit. Erisio-isop Jesus Christ nko oyuho ison emi utip-ikpe ekenimde ono nnyin ke ndikok nnyung nno nnyin usiene ke suto ndutoho emi nnyin ikpeyode ke unana-ntak. ‘Koro sese, Enye okobo ubiak ke ntak mme owo, edi ntre, ubiak emi enyenede kpukpru nkpo emi odude uwem, erenowo, nnwan, ye ndito-owong, emi etode ubon Adam’ (2 Nephi 9:21; se nko ke Alma 7:11–12).”¹

Christ ama “akap [nnyin] esin ke eka-ubok [Esie]” (Isaiah 49:16). Linda K. Burton, Akwa Adaibuot eke Relief Society, eting ete ke, Edinam oro emi akande-kpukpru-nkpo akpana anam nnyin owo kiet-kiet itongo-edong nnyin ke akam nsuhoreidem ke ndikom Ete nnyin ke Enyong ke ndima nnyin ke Enye ndino Ikpong-ikpong ye edisana Eyen Esie emi Enye Obonde edibo ndutoho ke mme idioknkpo, ubiak-esit nnyin, ye kpukpru nkpo eke mifonke ke uwem owo nnyin kiet-kiet.”²