Ku Mu’ i Lamnag Rogon

Bay biyay ni kug fil kanowo’en u langin fare Young Women class ko rogon fare sexual purity—ba topic ni kirkireb e fal’ yangren riy u dakaen e chiya roerad. Dan kug nang urngin ban’en nug fil e rofen nem, machane kug gum nang ni reb fapi leader rog e weliy mornga’agen reb fapi fanow— ni gubin ngiyal’ ma thingar ni par ni yib sexual purity. Thin rok e par rog, mug ta’ar u wan’ug ni ngug par ni aram rogon ni biney e nge mang reb e fanow ni ngug fol riy.

Rebe rran riy ni gube yib u lane bus nga tabinaew ko ba gosgos, bay be’ ulan fare bus ni tabab nag reb e gosgos ni kanog e mog e riyul’ fa ngam rin’ e n’en ni kanog ngom. Ke chachalbay, ere gamad nge ku boech e bitir e gu uned ko fare gosgos. Nap’an ni taw ngog, mani yog ban’en ni ngug rin’ ni gumanang ni dani fel’. Ma biney e ngiyal’ ma dani momaw’ ngog ni ngug dugliy e tafnay rog, ma fare thin ko Young Women leader rog e yib ko tafnay rog, mug dugliy u wan’ug ni rib moem rogon. Mug gurgur nigeg ngug siyeg. Kug mu’ i dugliy u wan’ug ko mang e ngug rin’ ko chi ngiyal’ nem.

Gum nang ni nap’an ni gadaed ra yan nga galasia magdaed rin’ e tin ni kan fil ngodad u rom, ma ran tawa’ath nagdaed ko fare thothup ni nge pi’ gelngin me ayuwegdead ko fare lumel nu fayleng.