Ewe mi Pung Epwe Manau ren Nuku

Mi wor ew tutunap an chon Jew usun emon chon for sop ewe ese nuku non Kot. Non ew ran upwen ra fefetan me emon sense, a apasa, “Mi wor och mettoch use tongeni weweiti. Awor ach namanam ren ngorowun ier. Nge ekis meinisin sia nenengeni mi wor ngau, nonnomungaw, chofona, mettoch ese pung, metek, echik, me fitikoko. Ussun nikinikin pwe manaman ese mwo nge aochuono ewe fonufan. Iwe ua eisinuk, met ochun?”

Ewe sense ese pwonueni ren ukukun och fansoun nge a soposopono ne fetan me ewe chon for sop. Amuchunon ra fetan ngeni ew nenien kukunou ikewe ekkewe semirit, ir mi nimengaw ren toputop, ra kukunou non ewe puun.

“Mir wor och mettoch use weweiti.” ewe sense a apasa. “Nengeni ekkenan semirit. A fer wor ach sop non ngorowun ier, nge ekkenan semirit ir mi chok nimengaw. Met ochun sop?”

Ewe chon for sop a apasa, “Nge sense, ese och ach sipwe tipingeni sop ika pwata ekkei semirit mi nimengaw. Sipwe aea sop me mwen epwe tongeni pwonueta popun.”

Ewe sense a amenimen me apasa, “Ewer pungun.”

Ewe Aposel Paul, a apasa sefani an emon soufosun non ewe Testamen Sofo porous, a ammwochu met wewen ach sipwe chon nuku nupwen a makkei, Ewe mi pung epwe manau ren nuku (Rome 1:17).

Menin non ei mecheresin porous sia weweiti sokofesenin ew namanam mi apwangapwang me ese wor uwan me ew mi wor an manaman ne siwini manau.

Nge ren ach sipwe weweiti met wewen ach sipwe manau ren nuku, mi auchea sipwe weweiti met nuku.

Achifoua mi nap seni nuku. Ina unusochun apinukunuk non Kot fiti foffor.

A nap seni chok anean.

A nap seni chok ach mwomwot, uchiki mokurach, me apasa pwe sia tipew ngeni. Nupwen sia apasa “ewe mi pung epwe manau ren nuku” sia apasa pwe wewen sia emwen me aurour me ren ach nuku. Sia mokutukut non ew napanap mi fifis fansoun meinisin ren ach nuku—esap ren ach aneasochis non ach sise ekiekiochu nge ren apinukukun me ennetin tong fan iten ach Kot me fan iten mirit mi auchea I a fen pwar ngeni Noun kewe.

Mi auchea Nuku epwe fiti foffor; ika esap ina iwe ese wor manauan (nengeni James 2:17). Iwe esap wesen nuku. Ese wor ren ewe manamanan an epwe siwini emon aramas, ika ewe fonufan.

Mwan me fefin non nuku ra apinukunuk non Semer won Nang—mi umoumoch pwan mwo fansoun ese fat, pwan fansoun tipemwaramwar me osukosuk nupwen resap kunaochu ika weweitiochu.

Mwan me fefin ir chon nuku ra achocho ne fetan won ewe aanen chon kuno me achocho ne appiru ewe minen appiru an ar we Chon Amanau mi achengicheng, Jises Kraist. Nuku a amwasanga me, ennetin, pesei kich ach sipwe sukchochou netipach ngeni nang me ach sipwe achocho ne achouano anisi anisata, me afeiochu chiechiach aramas.

Namanam ese fiti foffor a usun efou sop a chok nonnom non porun. Menin epwe wor tufichin mi amwarar, nge ennetin a chok kukkun pochokunan an epwe asokano mettoch tori chok an epwe apwonueta ennetin popun. Ewe kapas allimen Jises Kraist mi niwinsefanito a ew kapas allimen foffor. Ewe Mwichefenin Jises Kraist a aitikich ennetin namanam usun ew porousen apinukunuk, nuku, me tong ennet, mi pachenong anisi ekkoch non aanen pekin ngun me inis.

Ekkoch maram ra no, punuwei we, Harriet, me ngang aua sai fiti ekkkoch noum kewe semirit non ewe kinikin Mediterranean area. Aua churi ekkoch nenien ekkewe chon su seni nenier me chungeni ekkewe famini seni fonu mi tatakis ren maun. Ekkei aramas esap ir chon ach we namanam, nge ir pwiich me fefinach me ra mwitir mochen ach aninis. Netipem ra fokkun chung nupwen aua kuna ren mesem ifa usun ewe fofforun nuku an ekkewe memper non ach we Mwichefen ra awora aninis, ngaseno, me apinukunuk ngeni aramas mi nom non osupwang, ese pwan nifinifin met ar namanam, ir chon ia, me ar sinei non pekin sukun.

Nuku mi pachengeni foffor mi fifis fansoun meinisin a aurano netip ren kirekiroch, ewe mokur ren mirit me weweoch, me ewe ngun ren kinamwe me tong.

Ach nuku a tongeni afeiochu me pesekich non wenechar me ekkewe ir mi nom unukuch.

Ach nuku a tongeni amasoua ewe fonufan ren och me kinamwe.

Ach nuku a tongeni siwini koput ngeni tong me chon koum ngeni chiechioch.

Ewe mi pung, mwirin, a manau ren an foffor non nuku; ra manau ren ar apinukunuk non Kot me fetan non aanan we.

Iwe ina ewe sokkun nuku a tongeni siwini emon me emon, famini, muu, me ewe fonufan.