Tin nib yal’uw era par u fithik e mich

Immoey ba yat ko Jewish ni kakrom ni mornga’agen beq ni ma faleg e soap ma dani mich Got u wan’. Me rebe rran ni yow be yan ba rabbi, me ga’ar, “Baray ban’en ni dagur nang fan. Ke yo’or rabaq e taliw ni ke bukun e biyuq e duw. Machane gubin yang ni gara sap ngay ma bay mo’oniyan, wagay, malifith, buchan’, amith, uyngol, nge cham. Be yani m’ug ni dariy e mon’og ko taliw u fayleng. Ere gube fithem, mang fal’ngin?”

Me par fare rabbi ni ku dani fulweg laman machane ku yow be yan fare tafaleg soap. Dariy nap’an ma yow taw nga tagil e fafal ni ba sug ko bitir, nib thiy ko ab, ni yad be fafal u fithik e but’.

“Baray ban’en ni dagur nang fan,” fare rabbi e be non. “Musap ko pi bitir ni baram. Bay e soap ni ke bukun e biyuq e buw, machana pi bitir ni baram e ri yad ba makalit. Ere mang falangin e soap?”

Me ga’ar fare tafaleg soap, “Ma rabbi, dani fel’ ni ngam tay e kireb nga daken e soap ko pii bitir nem nib makalit. Soap e ngan fanay u m’on ni nge yib fan.”

Me siminmin fare rabbi me ga’ar,”Ri arogon.”

Fare Apostle Paul, e weliy ban’en ko profet ko bin kakrom a m’ag, me ngocheg fan ni be nib mich uwan’ u nap’an ni yoloey, “Tin nib yal’uw era par u fithik e mich” (Romans 1:17).

Ere susun ni re thin nem ma kad nanged e thil ko taliw nib tororuw ma dar mon’og nge ko bine taliw ni bay gelngin ma be pilyeg e yafas ko girdii.

Machane ra ngarim nang fan ko uw rogon ni ngan par u fithik e mich, ma gadad ra nang ko mang e mich.

Mich e bo’or fan ko nangan’. Boed ni ngari pagan’um ku Got un ko wok.u rogon e wok rom.

Boed ni nge gel ko rogon ni gabe lemnag.

Boed ni ba gel ni kay gum par nga but, ngad gochum gad, ma gadad be yoeg nib mich uwan’ dad. Nap’an ni gadad ra yoeg “tin nib yal’uw e ra par u fithik e mich,” gadad be riyul’ nag nibe pow’iy dad ma gadad be laek u rogon e mich rodad. Gadad ma mithmith u rogon ni ba m’ag ko mich rodad—gathi rogon ni yigi be mithmith ni dariy e fol ko lem machane u fithik e nangan’ nge gelngin e adag ngak e Got rodad nge pii llowan rok ni ke pii ngak pifak ni dariy pilwon.

Mich e thingari un ko wok; fa’an ra dangay ma dariy ban’en ni aram rogon (muguy ko James 2:17). Gathi ireram e mich. Dariy gelngin ni nge thilyeg ta beq, mu pag ni gangin e fayleng.

Pumoon nge ppin ni bay e mich rorad ni be pagan rad ko runguy ko Chitamangiy nu Tharmiy ni ku nap’an e tururuw, nge nap’an e tamrwar nge lumel ko ngiyal ni dar yog ni ngar guyed nib fel rogon ma dar yog ni ngar nanged fan nib fel’ rogon.

Pumoon nge ppin ko mich e yad ma yan u kanawo’en e pi tamachib ma yad be athamagil ni ngar leked kanawo’en e Ta’athapeg rodad, Yesus Kristus. Mich e ma piliyeg ma, rima, pii e athamgil ngodad ni ngad sulsul gad nga gumircha’dad ma ngan gel gad ni ngan ninged, ma gadad chibiy, ma gadad yibiliy pii girdii rodad.

Taliw ni dariy ban’en nibe rrin’ ni boed e soap ni be par u tafen. Ra moq falangin nib fel’, machane bin riyul’ e bay gelngin nib war ni nge pilyeg ir nge yib fan nib gaq. Fare gospel ku Yesus Kristus ni ke sul e ire ram e gospel nibe mon’og. Fare Galasia ku Yesus Kristus e be fil ngodad ni bin riyul’ e taliw e milwol ko athap, mich, nge folan e dowef, ni kub mu’un rogon i ayuweg bochi gadad u fithik e kan nge gubin banen.

U fatini baram e pul ni ke yan, ma ppin rog, Harriet, nge gag e gu warod nga bochi malekag nge ku boch e bitir romow aray ko Mediterranean. Ma kug warod ngug lekag ned boech e refugee camp ma kagamad magaq nag boche tabinaw urom u boch e nam ni ke wereg e mal. Pi girdii ney e gathi chongin e mich romad, machane yad pii walagdad ni pumoon nge ppin ma kari t’uf e ayuw rorad. Ri gu thamiyew nga gumircha’en mow u nap’an ni gu nangew ko som’on gelngin fani gel e mich romow ko chonggin e Galasia ni yad be pii e ayuw, t’ufeg, nge athap ko pi walagdad ni ke t’uf rorad, ni demuturug ko mang taliw, nge ggin bay riy, ara skul rorad.

Mich e kani qing ko ngongol ni ke sug u gumircha’ey ko runguy, ma lolgey e ke sug ko nanga’, ma ya’al e ke sug ko gapas nge t’ufeg.

Mich rodad e taw’ath nag me dag e wok ni fel ngak boch e girdii u charen dad nge ngodad.

Mich rodad e ra suguy e fayleng ko fel’ nge gapas.

Mich rodad e ra piliyeg e fananikan ko adag and pi t’ogor ko fager.

Fapi yal’uw, e, yad be par ni yad be murwel u fithik e mich; yad be par ni be pagan’ rad ku Got ma yad be yan u kanawo’en.

Ireram rogon e pii mich ni ra piliyeg beq, tabinaw, nam, nge fayleng.