T’ufeg Nib Machalbog E Be Chuweg Urngin E Murus

U ra’ay e duw kakrom u North America, bay ban’en ni buch ni kanoeg fare “Mo’od nib Gaa’ ngay” ni yan u barba’ e naam nga barba’. Ni n’en ni yima rin’ e woed ni ngan pug e gidii e u nap’an e tin nib thothup ban’en ni ka yad be mol.

Joseph Smith e ri unan’ ko pi n’en ni rung’ag ko ba preacher ni ma un ko re mo’od ney. Iraray reb i fan ni turguy ni nge gay Somoel u gelngin e meybil rok’ ni kari mus rogon riy.

Pi tamachib ney e bay reb e yalen rorad ko machib, ni ke sug ko thamtham, ni ra taw nga napan e mo’olung ma woed nib sug nga marangagen e tini baray nib tamdag nu tharmiy ni be son nag e pi tadenen.¹ Tin ni yad be fill ban’en e dar karang e chuchuw ko gidii—ya be karang e murus. Ya ngongol roraed e ngar karinged e murus ko gidii’ ni nge un ko fare galasia.

Kakrom, e digow ni kan ngongoliy e nge yag ko gidii’ ni ne mithmith. Galabthir e ma tay e digow nga laniyan e bitir roraed, gidii’en e murwel nge ta muruwel roraed, nge polictician nge girdii ni ma towal.

Gidii’ ni ba salap u rogon e market e manang fan gelngin e murus ni yaed ma rin ma ku yad ma rin’. Aray fan boech e milwol ko advertising ni ma weliy thibngin ni fa’anra dab ni chuw’iy e cereal rorad fa fa’an gara pag rebe video game ni kab bi’ech fa cell phone, ma gadad ra par niba kireb rogon e par rodad, ma gara yim’ ni yigo gur ma gab kireban’.

Gadad be minmin e ko re n’ey ma gadad be lemnag ni dab da fol gad ko tinem e gathibthib, machane bay bochi ngiyal ni gadad ma rin’. Rib kireb, bay bochi ngiyal ni gadad ma rin’ ni boed rogon e pin’ey ni bochan e ngad guyed rogon ni ngan rin’ ni boed rogon ni gabadag.

Re milwol rog ney e la’agruw fan e dobaaq: Bin som’on e nge pii’ e athamagil ngodad ni ngad guyed ma gadad lemnag ni gadad ra karing e digow ngak boch e girdii’—ma ku arogon gadad. Bin la’agruw e ngug weliy u rogon rebe kanawo’ nib fel’.

Som’on, e ngad sap gad ko re magawon ney e fithik e magar. U rogon, mini’ rodad e dawori yib e magar ni nge abich nib fel’ rogon, fa nge tay e seat belt, fa nge exercise boech, fa nge kunuy e salpiy, fa nge kalngan’ ko denen?

Ri ba riyul ni murus e ba gel gelngin ni ra magawon nag dad u rogon e mithmith nge wok rodad. Machane re magawon ney e bochi ngiyal nib toy’ar. Murus e rib papay gelngin ni nge piliyeg gumircha’en dad, ma dabi piliyeg dad ni ngad manged e girdii’ ni ba adag e tin nib fel’ ma ba adag ni nge fol rok e Chitamangidad nu Tharmiy.

Girdii ni ba murus e ra yoeg me rin’ e tin nib fel’, machane dabi thamiy e tin nib fel’. Yad ra lemnag ni yad e dariy fan rad nga bayang nge gamingin, ma ku rayog ni nge damumuw. Ma napan e ra n’uw napan mu n’en ni ra rin’ e dabki pagan’ ngak beq, kireb laniyan, ma ra ta cham.

Machane, re kanawo’ ney nib dalib ko lane yafas nge yal’uweg e dariy yarman Be kireb anug ngay ni ngug rung’ag rebi gothoen e Galasia ni be rin’ e biney e ngongol—ni demutrug ko lane tabinaw, murwel rok u Galasia, u tamurwel, fa u rogon e madaq rodad ngak boche girdiiq.

Bochi bo’or, e girdii ni ra fek ko bin baray e kanawo’ ni pardeq, machane danir guy u fithikey. Yad be duguliy u rogon e birorad e motochiel, machane napan ni ra dabi fol beq ko pi nochi motochiel ney, ma yira yoeg e thin nib tagan, mani kireb nag e tafnay rorad, ma bochi ngiyal ni yira pardeq.

I Samol e yoeg ni “napan ni … ni ngad filed rogon e ngongol u daken e pi ya’al ko pi bitir ko girdii, u rogon gubin mit e kireb, … fare tharmiy e kar chuw rad nge pi ya’al ko fare Samol e yad be kireban’.”²

Bay bochi ngiyal ni ma yib e lumel ngodad ni ngad dugliyed e ngongol rodad ni nge mich uwan’ dad ni ra tomur ma ngad turguyed rogon. Ma gadad ra lemnag ni ngad pow’iyed, gathibthib nag, ma gadad be mangach ya ireram e bin ni ra fel’ ngak boch e girdii. E gathi arogon, machane fare Somoel e ke weliy ni “fare wamangin e Kan Thothup e t’ufeg, nge falfalan’, nge gapas, nge gumaen’, nge gol, nge fel’ ngak e girdii’, nge yul’yul’, nge sobutaen’, [nge] t’ar laniyan’.”³

Nap’an ni gu nang marunga’gen e Chitamag nu Tharmiy ni bo’or, ma aram e kari yo’or ni kug guy rogon fani fel’ nge rogon ni be yal’uweg pi fak. Gathi ke puwan’, togopluw, fa tay tapgin banen. ⁴ Rogon fan— muruwel Rok nge fal’ngin— e nge fil ngodaed, fek daed ngalang, ma nge powiy’daed ko Tirok ni gubin.⁵

Got ke weliy rogon ngak Moses ni ma “runguy and gol, guman’, ma ba sug ko fel’ nge yul’yul’.”⁶

T’ufeg ko Chitmangdaed nu Tharmiy ni fan daed, fapi bitir Rok, e ri ba gaa’ ko lowan’ rodad ningad nanged fan.⁷

Biney e be yip fan ni Got ba’adag fa be fek owchen ko pi ngongol nib kireb ko motochiyel Rok? Danga’, ri danga!

Machane ba’adag ni nge thilyeg rogon e wok rodad ni gathi kemus. Ku ba’adag ni nge thilyeg rogon e par rodad. Ba’adag ni nge thilyeg gumircha’en dad.

Ir e ba’adag ningad gayed ngad koeled fare lay I wasey, me mochaq nage digow rodad, ma gadad yan nga m’on nge nga lang u daken e re wo’ ney nib achig. Ir e ba’adag ni ngad rin’ed e pin’ey ni fan ngodad ni bochan e gadad ba tu’uf rok ma ireram e kanwo’ ko falfalan’.

Ere, uw rogon ni Got e nge yal’uweg pi fak ni ngar leked ko tiney e rran rodad?

Ke pii’ Fak!

Got e pii’ fak ni kari mus, Yesus Kristus, ni nge dag ngodad e wo’ ni fel’.

Got e ma pi’ e athamgil u fithik e, gum’aen’, sumunguy, sobutaen’ nge t’ufeg ni yul’yul’.⁸ Got ba paer u to’obdaed. Gadad ba tu’uf rok, ma napan ni gadad ra paraw, ma ba’adag ni ngad ssak’iy gad nga lang, ngadi athamagil gad, ma gadad gel niged gadad.

Ir e yap rodad.

Ir e bin nib fel’ e athap rodad.

Ri ba’adag ni nge suguy dad ko mich.

Be pagan’ ngodad ni ngad nanged fan e dalib rodad ma ngad ngongoliyed e tin nib yal’uw banen.

Ireray e kanawo’ nib fel’!⁹

Reb i rogon wo’en Mo’oniyan’ ni ba’dag ni ngad kireb niged beq e ngad paged gadad ngad uned ngak nge ngongol rok satan u lane fayleng.

Arragon e fayleng rodad ko somm’on, ma ku bayi ulul I yan ni aram rogon, kireb. Ba yo’or e gidii’ ni dariy’ tapgin e gafgow ni yad be tay ni bochan boch banen ko yafas ni ke yib rok e girdii. Fatin kireb nge denen ko tiney e rran e ba mit ma ba makar murus.

Machane gubin e pin’ey ma, dab gu thiliyeg rogon e par rog ko chiney nga rebe par ko ngiyal ni kakrom ko fayleng. Kan taw’athnagdaed nib gaa’ ni dariy folan ko tiney e rran ko, fla’ab, lowaen’, nge fel’ rogon. N’en riy, e kani taw’ath nag dad ko gosgoson e gospel ku Yesus Kristus, ni ke pii’ ngodad e puf ko pi magawon nu fayleng ma ke dag ngodad rogon ni ngad paged nge rogon ni ngad poloeq gad riy.

Nap’an ni gura lamneg e pi ta’wath ney, ma gub’adag ni ngug garbog nga but’ ngug pining e magar ngak’ e Chitmangdad nu Tharmiy ko fare tu’ufeg rok’ ngak’ pifak ni dariy numungin napan.

Dar ich uwunug ni Got e ba’adag pi fak ni ngar rus gad fa ngar uned ko tin tagan banen nu fayleng. “Got e gathi ke pii’ ngodad a ya’al ko murus, ya gelngin, nge tu’ufeg, nge tafinay nib fel’.”¹⁰

Ke pii’ ngodad urungin ekanawo’ ni ngad falfalan’ gad. Kemus ni ba t’uf ni ngad pir’eged ma gadad nang ko bogi mang. Fare Somoel e ke puguran ngodad ni “dab murusgaed,” ma “ma ngam falfalan’ gad,” ¹¹ ma ngam “dab mu rus, pi fakag.”¹²

Pi walageg ni pumoon nge ppin, gadad e “pi fak e saf” rok Samol…Gadad e Gidii’en Got ko tin tomur erran. Ni gadad be fek u daken fithngn dad ni ireram e mich ni ngad sap gad nga m’on ko wub ni bayi tay fare Tabiyul ma ngad faleged rogodad nge fare fayleng ni nge yib ngodad. Machane, ngad rin’ed e tin nike yoeg Got ma nge tu’uf pi walagdad rodad. Ngad rin’ed e pin’ey u fithik e pagan’, nge sobutan’, ni dabin sap nga but’ ngak bochi rabaq e taliw fa ba ulung I girdii. Pi walageg ni pumoon nge ppin, kani pii’ gelngin dad ni ngad filed e thin ku Got nge rogon e monon ni ma tay e Kan, “ni ngad nanged e pow ko ngiyal’, nge pow ko wub ko fare Fak e Girdii.”’¹³

Aram fan, ni ngad nanged, maranga’gen e tin ni ba mom’aw ko fayleng, ma ngad nanged marunga’agen fapi mom’aw ko tiney e rran. Machane dani yip fan ni ngad karinged e tomal ni marus ngodad nge ngak bochi gadad. Ma ngad lemnaged e pi momaw’ rodad, ni dabi fel’ ni ngad sap gad ko fal’ngin, nge fani fel’, nge gelngin Got, ni nge mich u wan’dad ma gadad fal’eged rogodad ni ngari felan’ gumircha’en dad ko wub rok Yesus ni ir Kristus?

Nge fapi girdii’ rok ni kan michmich ngorad, dab da pared ni ke m’ay gelngin dad ko murus ni bochan e bay boch banen niba kireb ni bayi buch. Ya, rayog ni ngadarod nga m’on u fithik e mich, gelngin, turguy, nge pagan’ ku Got u napan ni gadad ra madaaq nage pi magawon nge pi n’en ni be buch nga m’on.¹⁴

Gathi gadad be yan ko woq ko pi gachalpen ni yigo gadad. “Samol ni Got …e be un ngodad; dabi pag dad, fa digey dad.”¹⁵

“Samol e ra un ngodad ko cham, ma gure gara kol e gapas.”¹⁶

U fithik e murus, ma ngad gayed rogon ni ngad gel niged gadad, ma gadad un ko mich, ma nge pagan’ dad e fithik e mich ni “ni dariy mit e talin e cham ni ran fek ngom ni gara m’ing riy.”¹⁷

Gadad ma par u ba ngiyal u fithik e gafgow nge wagay? Ri arogon.

Got e ke yoeg ni, “U lane fayleng ma thingar mu thamiyed e wagagay: machane ngam falfalan’ gad; ni kad paged e tin nu fayleng banen.”¹⁸

Rayog ni ngad gayed rogon ni ngad murwel gad ko mich rodad me mich uwan’ dad maa gadad rin ni woed rogon? Rayog ni ngad pired u fithik e pi mich nge tin ni kad micheged? Rayog ni ngad fol gad ko pi motochiel rok Got ni demutrug rogon e pi n’en ni be buch? Arogon rayog rodad!

Ya Got e ke micheg ngodad, “Gubin banen ma nge murwel u ta’abang ni fan ngom, ni fa’an [gara] yan gab yal’uw.”¹⁹ Machane, thingar da paged e digow ma gadad par u fithik e falfalan’, tamraq, athap, nge pagan’ nib gaaq ni Samol e bay rodad.

Pi tafagar rog, pi walageg ni pumoon nge ppin ku Kristus, fa’an ni gadad ra nang ni gadad be par u fithik e murus nge kankanan, fa kad pir’eged ko thin rodad, pangin dad, fa wok rodad e ir e be karing e murus ngak bochi gadad, ni gube meibil u gelngin e ya’al rog. Fa’an gama paer ulane murus fa kirebaen’, fa gama nang fan e thin, laniyaen’um, fa ngongol ba gay e marus nga reb, Gube meybil ni gelngin gumircha’eg ni ngad chuw gad ko biney e murus ya fare: tu’ufeg rok Kristus nib machaelboeg, bachane “t’ufeg nib polo’ be chuweg e murus.”²⁰

Tu’ufeg rok Samol nib fel’ e ba gel ko pi lumel ni ma yib ni ran madad ngay, gathibthib, karing lungun, fa togopluw.

Tu’ufeg rok Kristus nib fel’ e ra ayuweg dad ni nga darod u fithik e sobutan’, gelngin, nge mich ni gadad be leak fare Tabiyul rodad ni kari mus. Fare tu’ufeg rok Kristus e ma pii gelngin dad ni ngad gel niged gadad u fithik e pi murus rodad ma gadad yung e pagan u fithik gelngin nge fani fel’ rok e Chitamangdad nu Tharmiy nge ngak fak, Yesus Kristus.

U lane tabinaw, u tamurwel rodad, u rogon e murwel ko Glasia, u lan gumircha’dad, e ngad paged e tu’ufeg rok Kristus ni nge yoen’ loen e murus rodad. Tu’ufeg rok Kristus e ra yoen’ loen e murus u fithik e mich!

Fare tu’ufeg rok e ra ayuweg dad ni ngad nanged, pagan’, ma nge yibe mich rodad nga fal’ngin e Chitamangiydad nu Tharmiy, rogon e tanam rok, rogon e gospel rok, nge rogon e pi motochiel rok.²¹ Got ni ma tu’ufeg nge pi walagdad e ra pilyeg rogon e fol rodad ko pi motochiel rok Got ni nge tibe taw’ath riy ma gathi pi tomal. Tu’ufeg rok Got e ra ayuwegdad ni ngad pired ni gadad ba gol, ma n’ag fan, ma runguy, ma kari tayan’ ko murwel ku Got.

Napan ni gadad ra suguy gumircha’en dad ko t’ufeg rok Kristus, ma gadad ra qod ni gadad ba thothup ma gadad be yan ni gadad ba falfalan’, mich, na’ab, ma yibe qod u fithik ra’en nge runguy rok fare Tabiyul ni karimus, Yesus Kristus.

Gube yoeg e pin’ey, ni fare Apostle John, “Dariy e murus ko[Kristus} tu’ufeg.”²² Pi walageg ni pumoon nge ppin, pi tafager, Got e ma nangem nib fel’ rogon. Ri gab tu’uf rok nib gel. Manang ko mange ra buch rom nga m’on. Ba’adag ni “dab mu rus, kemus ni e mich uwunum”²³ ma “ngarim par u fithik e tu’ufeg rok nib[gel].”²⁴ Ireray e meibil rog nge taw’ath rog u fithngan Yesus Kristus, arogon.