Ewe Manamanen ewe Puken Mormon

Pwi me fefinei kewe, ua kapwong ngeni kemi ren tong non ach pwan chufengen sefan non ei mwichenapen ewe Mwichefenin Jises Kraist ren Aramas mi Pin non Fansoun Soponon. Me mwen ai upwe poputani ai poraus, upwe akkom atoura porausen nimu minafo tempel repwe kauta non ekkei neni: Brasília, Brazil; greater Manila, Philippines, area; Nairobi, Kenya; Pocatello, Idaho, USA; and Saratoga Springs, Utah, USA.

Ei soran ua poraus usun ewe Puken Mormon me watten auchean me ren kich chon ewe Mwichefen ach sipwe anneani, ekipwichi, me apwonueta masouan non manauach. Porausen auchean an epwe wor ach pwisin kapasen pwarata usun ewe Puken Mormon esap fen namotungau.

Sia manau non ew fansoun watten osukosuk me tipis. Met epwe tumunu kich seni ewe watten tipis me ngau non fonufan ikenai? Ua apasa sefani pwe ew kapasen pwarata usun ewe Chon Amanau, me an kapas allim epwe tumunukich. Ika ouse akanneani ewe Puken Mormon iteitan ran, ouse mochen oupwe poputa. Ika oupwe anneani fiti iotek me ennetin mochen sinei ewe ennet, ewe Ngun mi Fel epwe pwarata ngenikemi usun ennetin pungun. Ika mi ennet—me ua pwarata non wenechar pwe mi ennet—iwe Joseph Smith i emon soufos me a kuna Kot ewe Sam me Noun we At, Jises Kraist.

Pokiten ewe Puken Mormon mi ennet, Ewe Mwichefenin Jises Kraist ren Aramas mi Pin non Fansoun Soponon mi ewe Mwichefenin ewe Samon won fonufan, me ewe pristut mi pin an Kot mi niwin sefan fan asengesin feiochun Noun kewe aramas.

Ika ese mwo wor ami kapasen pwarata mi pochokun usun ekkei mettoch, oupwe fori met mi namwot pwe oupwe fen angei. Mi fokkun auchea pwe epwe wor ami kapasen pwarta non ekkei fansoun weires, pun kapasen pwarata an pwan emon esap fen naf ngonuk. Nge nupwen oupwe angei, ew kapasen pawarata a murinno an epwe pochokun me manau non anneasochis mi soposop ngeni ewe mochenin Kot me non iotek iteiten ran me anneani kewe pukefel.

Chiechiei mi achengicheng non ewe angangen ewe Samon, uwa tingor ngeni emon me emon kich pwe sipwe anneani me ekieki ewe Puken Mormon fiti iotek iteiten ran Ren ach fori ei, sipwe tufich rongorong ngeni ewe Ngun mi Fel, pworacho ngeni sossot, nikitu ngeni tipemwaramwar me niuokus, me angei aninnis seni nang non manauach. Ua pwarata ekkei ren unusan netipei, non itan Jises Kraist, amen.