Hō’ē misiōnare ’aita e ’apa i’oa

I te fare ha’api’ira’a tē vai ra tā’u hō’ē ’orometua, e fa’ari’ari’a tōna huru i te ta’ata ’ia fa’a’ite atu i te mana’o pāto’i nō ni’a i te hō’ē tumu parau. I te hō’ē mahana ’ua tae mātou i ni’a i te tumu parau nō te mau misiōnare o te feiā mo’a i te mau mahana hope’a nei. ’Ua ’ite na vau ē e pāhonora’a tā’u i tāna mau uira’a, ’ua tae mai rā te mana’o ’eiaha. ’Ua parau noa atu vau i te mea e au iāna i te reira taime.

I te mau hepetoma i muri mai, ’ua feruri noa vau nō ni’a i tā mātou tāuara’a parau. I te hope’a, ’ua tae mai te mana’o ē e hōro’a vau i te hō’ē Buka a Moromona nāna ’e te tahi mau parau ri’i nō ni’a i te ’ohipa misiōnare tei fa’a’ūhia. ’Ua ri’ari’a vau i teie mana’o, ’ua tāmau noa rā te reira. ’Ua ʼite na vau ’o te hō’ē fa’auera’a e ti’a iā’u ’ia pe’e.

E piti ’āva’e i muri iho, tei iā’u ra te Buka a Moromona, ’ua ineine. I te tā’āto’ara’a o te mahana, e au ra iā’u ē tē fa’a’āpo’o ra te buka i ta’u pūtē. Terā toru tetoni vau i te hōro’ara’a i te reira iāna nā mua noa a’e i te fa’afa’aeara’a nō te tau to’eto’e, ’ua riro ïa e taime ri’ari’a mau o tō’u orara’a.

I te mahana ha’amatara’a mātāmua, ’ua nā mua vau i tāna piha, ’ua ri’ari’a rā i te tomo atu i roto. I muri iho ’ua fa’aro’o vau iāna i te pi’ira’a mai iā’u, ’e ’ua hōro’a mai ’oia i te hō’ē tāreta. ’Ua tai’o vau i te reira i roto i te aroā. ’Ua pāpa’i ’oia ē ’ua tuatāpapa « māite » ’oia i te mau vāhi tā’u i rēni, ’e tē ha’amata ra ’oia i te ’ite i te tahi mau tumu i muri mai i tō’u fa’aro’o.

I teienei ’ua ’ana’anatae au i te fa’a’ite i te ’evanelia, ’e ’ua ’ana’anatae rahi atu ā vau e tāvini i muri nei i tō’u Metua i te Ao ra, i roto i te misiōni.