Mbabun
Ber a Me Nyɛnko Wui
Ɔkyerɛwfo no tse Utah, USA.
Mehyɛɛ nsɔwdo skuul ase no, me nyɛnko ne tsir honee na adzekyee no owui. Nna ɔwɔ mu dɛ meyɛ Asɔrba dze, naaso mokɔr do dzii aper. Nna wɔakyerɛkyerɛɛ me m’abrabɔ nyina mu dɛ mubotum adan Ɔsor Egya na Agyenkwa no dze enya biribiara, naaso nna munndua dza ɔtse dɛm mu pɛn.
Musũi ndɔnhwer pii, a nna morobɔ mbɔdzen ahwehwɛ adze bi—biribi ara—ma ɔama me asomdwee. Anafua no a owui ekyir no, mefaa asɔrdwom buukuu no. Ber a murubuebue nkrataafa no, migyinaa “Abide with Me; ’Tis Eventide” do (Asɔr Ndwom, nkanee 165). Nyiyimu a otsĩa ebiasa no tɔɔ mo do:
Enye me ntsena; adzesaa aba,
Mebɛyɛ ankonam anafua no
Sɛ menntum nye wo enndzi nkɔmbɔ a,
Anaa mennhu kan wɔ wo mu a.
Musuro wiadze no sum no,
Nkyɛ abɛtsena me fie.
O Agyenkwa, nye me ntsena anafua yi;
Hwɛ, adzesaa aba.
Nyiyimu yi maa me asomdwee dodow. Afei muhun dɛ nnyɛ dɛ Agyenkwa no botum nye me atsena dɛm anafua no nko, mbom nna Onyim dza meretse no ne nkã pɛpɛɛpɛ so. Minyim dɛ ɔdɔ a metsee no wɔ asɔr ndwom no mu no ammboa me anafua no pɛr, mbom ɔdze me edua nsɔhwɛ pii bi mu a meetum asɔw.