Ngkedel sel de Ungil Loutekangel

Se er ak kekerei el chad, e ak milesiou er a Ikelesia el counselor el mora mellomes a rengul el district president. Ng mle blechoel el melasem el olsisechakl er ngak. Ak medengelii sel losisechakl el ta er a taem e ng uldersii el me er ngak: “Sel mesa ta er a chad, e momekereu er tir el di uai sel le ngara meringel el chelebuul, seikid e ke blechoel ngara llemalt er a bek el taem.” Sel taem e ak ulemdasu el kmo ng mle mekngit a uldseuel. E chelechang, ruriul er a okeim el rak, e ak mocha medengei el kmo ng meral mle ungil medengelii a beluulechad me a klechad.

Kede re bek el chad el obangel a ongarem— a le bebil er a taem, el chetiteuokel el ongarem. Kede medengei el kmo a Rubak a mechikid me kede soiseb er a ongarem me bode meketiit e de mecherungel me bol sebeched el mobengkel el mo cherechar.

A Rubak a ulsisechakl er a Profet Joseph Smith er a Liberty Jail el kmo a ngkedel sel le kengei lotekangel ongarem a mo ngosuir el nguu a diak a ulebengelel el klengar.

A Dios a mle yaksok er ngii a el mo budech a rengul ea ringel ma ongarm el ngarngii a di mo telkib el taem.

Me alsekum eng moungil loutekengelii, e a Dios a nguu el morebab; e ngii a mo mesisiich er a rokui el cherarou el mo er ngii. (D&C 121:7–8).

Ng betok el tekoi a subechid er tial klengar meng ual meringel er kid a mo ungil otekangel. Tia sebechel uaisei el mora telungalek el ultuil er a dellemelir e lak a chull. Te locha mo melchedech, “Tiang mo oingerang el di doutekangel el uaisei?” Ng kora mo uaisei el teletael el mora ngeasek el chelbangel a di merael mo betok el mekikiongel er a klechad me a ngibesereng el tir omtok. Ng kora mo uaisei el teletael el mora kekerei el chad el mengisemuk el mo melai er a skulel malechub eng osisechakl lousbech er ngii el kirel a ureor el mo mesiou er a bechil me a delengcheklel. Ng kora mo uaisei el teletael el mora chad el diak el sebechel metik er a urerel malechub eng mla mo diak a urerir le siobai el mla mechesimer. Ng kora mo uaisei el teletael el mo er tirkel chelbangel a secher me a chelitechetul a bedengir, el locha dubech sel dirk lengeasek malechub e te cheuodelang malechub eng dubech el mo er tirkel betik er a rengrir.

Engdi a oubeltikelreng el Dios a dimlak el beskid a ika el skeng el kuk diomes alsekum meng sebeched el lotekangel a ongarem ng bai omes alsekum meng sebeched el moungil lotekangel me deluut el mengai el moungil.

A Kot el Presidency a ulsisecheklii a Elder Parely P. Pratt (1807–57) sera le direk el beches el chedal a Chelechad er a Teruich ma terung el Apostol: “ Kau a mla soiseb er a ureor el lousbech er a mui el luldesuem; … meng mo blengtangt a klungiolem. … Ng kirem el lotekau a betok el meringel e lureor, ma betok el longarm me ke mo ungil blengetanget. … Tiang a usbechall er a Demam er a Babeluades; a sers a kloklel; a ureor a urerel; e Ngii a mo … oyeng er kau … e mo kiderau.”¹

Ngara babier er a Hebru, e a Paulus a melekoi er a redechel sel de dungil loutekangel: “Chelechang eng diak a ngerroil el domes eng kora ungil, ngbai meringel: engdi a uriul eng mekdebechii a redechel a budech er a llemalt elmo er tirkel mlo meketiit” Hebru 12:11.

A ikal longarem ma chetiteuokel el tekoi a meskid a techall el mo mesuub e mukeroul, e aikang a dirrek el ngmodech a blekerdeled. Alsekum eng sebeched e lobult el mora Osobel sel de chermang, e a rengud a sebechel mo klikiid sel doutekangel.

Ma leuaisei, e a kot el tekoi el bo dodengelii a mo blechoel el meluluuch (mesa D&C 10:5; Alma 34:19–29).

Sel longerung el tekoi a mo melasem el mellemolm loltirakl a llach—a le blo el ultok, ongarem, malechub eng uldikel el meliuekl er kid (mesa Mosiah 4:30).

Sel longedei el tekoi el doruul er ngii a mo mesiou er a Rubak (mesa D&C 4:2; 20:31).

Sel dosiou er a Mastang, e kede mo medengelii e betik a rengud er Ngii. Kede mong, alsekum e kede mellemolm el ngara nglunguuch e mekedung el mesiou, lomuchel el mesa chimal a Osobel me a klisichel a Chedaol Reng er a chelsel a klengar er kid. Te betok er kid a ngar ngii a taem eng mla mesiou el uaisei e melchesuar er seikid el deleongel. Alsekum e komes el bedul sel taem, e kemo medengei el kmo ng mle ngar ngii a milngodech er kau. Sel ngibesereng el mo meruul a mekngit a kora mla mo kekerei. Sel reng el mo meruul a ungil a klungang. Tirke lungil el medengelkau e betik a rengrir er kau a locha mla melekoi el kmo: “Ke mla mo chubechub el chad e mengai el klunga a rengum. Ke kora dikea muai kau.”

Ke ngedecha el chad. Kulebult lokiu sel Tngakireng er a Jesus Kristo le kau el mle ultuil er Ngii er a taem el bla er a ongarem.

Ak yaksok er kau el kmo a Rubak a mo ngosukau er a taem el mngara ongarem sel sekum kosiik e mesiou er Ngii e a rengum a mo mengodech er a omerrolel a taem. Ak melsemai er kau me mnguu a klaumerang er kau lotilii er ngii er a bekl el ongarm el omsiseb er ngii.

Ak medengei el kmo a Dios el Chedam a ngar e Ngii a orrenges e onger a bek el nglunguched. Ak medengei el kmo a Ngelekel er a, Jesus Kristo, a tilngetengii a klengar er ngii el kirel a kengtid el rokui e Ngii a soal kid el rokui a debo er Ngii. Ak medengei el kmo a Demad me a Ngelekel a omes er kid e mla kutmeklii a rael el kired el moungil loutekangel me deluut el mo remei.