Fas Presidensi Mesej, Ogis 2017,
Laef blong Wan Disaepol
Teti yia i pas finis long Gana, wan yang studen blong kolej, nem blong hem Doe i go insaed long wan LDS mitinghaos blong fas taem blong hem. Wan fren i bin invaetem Doe blong kam wetem hem, mo Doe i wantem tumas blong save abaot Jos.
Ol pipol longwe oli naes mo oli soem lav we i mekem hem i no stop blong tingting: ?“Wanem kaen jos ia hemia?”
Doe i laekem tumas mekem se hem i disaed blong lanem moa abaot Jos mo ol memba blong hem, we oli fulap wetem plante glad. Be taem hem i stat blong mekem olsem, ol gudgud famli mo fren oli stat blong agens long hem long evri muv blong hem. Oli talem ol nogud storian abaot Jos blong mekem hem i fraet mo mekem evri samting we olgeta oli save mekem blong stopem hem.
Be Doe i bin kasem wan testemoni.
Hem i gat fet, mo hem i lavem gospel, we i fulumap laef blong hem wetem glad. Mo, hem i kasem baptaes.
Afta, hem i givim hem fulwan long stadi mo prea. Hem i livim kakae mo wantem kasem paoa blong Tabu Spirit long laef blong hem. From samting ia, testemoni mo fet blong Doe i gro moa strong mo moa dip. Long en, hem i disaed blong givim seves olsem wan fultaem misinari blong Lod.
Afta we hem i kambak long misin blong hem, hem i deitem mo maredem wan riten misinari—hem we i bin baptaesem hem sam yia i pas finis—mo afta tufala i sil long Joanesbeg Saot Afrika Tempol.
Plante yia i pas nao afta we Doe Kaku i eksperiensem blong fas taem glad blong gospel blong Jisas Kraes. Long ol taem ia, laef i no bin swit oltaem long hem. Hem i bin stap strong tru ol harem nogud mo ol taem we hem i lusum hop, hemia wetem ded blong tu pikinini—bigfala sore blong ol eksperiens ia i hevi yet long hat blong hem.
Be hem mo hasban blong hem, Antoni, tufala i wokhad blong stap kolkolosap long tufala mo long Papa blong tufala long Heven, we tufala i lavem wetem ful hat blong tufala.
Tedei, 30 yia afta we hem i kasem baptaes, Sista Kaku i finisim nara fultaem misin—be hemia, long saed blong hasban blong hem, we hem i bin stap olsem wan misin presiden long Naejeria.
Olgeta we oli save Sista Kaku oli talem se i gat wan samting i spesel abaot hem. Hem i stap saen. Hem i had blong spendem taem wetem hem mo no filim hapi yuwan.
Testemoni blong hem i strong: “Mi save se Sevya i luk mi olsem pikinini gel blong Hem mo fren blong Hem (luk long Mosaea 5:7; Ita 3:14),” hem i talem. “Mo mi mi stap lanem mo traehad blong stap olsem wan fren blong Hem tu—i no long wanem mi talem nomo, be tu, long wanem mi stap mekem.”
Yumi Ol Disaepol Blong Hem
Stori blong sista Kaku hem i semak long plante narawan. Hem i wantem tumas blong save trutok, hem i pem praes ia blong kasem laet blong spirit, hem i soem lav blong hem long God mo long ol narafala man, mo long laef blong hem, hem i eksperiensem hadtaem mo bigfala sore.
Be nomata long ol samting we oli stap kam agens, nomata long bigfala sore, hem i bin go hed blong muv fored wetem fet. Hem i impoten long hem blong kipim glad ia i stap wetem hem. !Hem i faenem wan rod we i no blong stap strong nomo long ol hadtaem blong laef, be tu, blong gro nomata long olgeta!
Stori blong hem i semmak long blong yu mo blong mi.
I no gat wan taem long wokbaot blong yumi we i smut o i no gat hadtaem.
Yumi wanwan i gat ol wari blong yumi, ol harem nogud blong yumi, mo ol bigfala sore blong yumi.
Yumi save filim tingting i foldaon mo samtaem harem nogud blong yumi i bigwan tumas.
Be olgeta we oli laef olsem wan disaepol—oli stap fetful mo gohed blong muv fored wetem fet; we oli trastem God mo kipim ol komanmen blong Hem;1 we oli laef folem gospel evri dei mo evri aoa; we oli givim seves folem fasin blong Kraes long ol man raon long olgeta, wan gud wok afta long narawan—oli olgeta we smolsmol fasin blong givim seves i mekem wan bigfala jenis.
Olgeta we oli gat moa kaen fasin, we oli stap fogiv moa, mo oli gat moa sore, oli olgeta we oli gat sore ia we bambae oli kasem sore.2 Olgeta we oli mekem wol ia i wan moa gudfala ples, wetem wan aksen blong lav mo kea evri taem, mo oli traehad blong laef long wan wei blong kasem blesing, stap glad oltaem, mo gat pis long laef blong olgeta olsem wan disaepol blong Jisas Kraes, oli olgeta ia we, long en, bambae oli faenem glad.
Olgeta ia bae save se “hem i lav blong God, we i seraotem hemwan i go long evri ples long ol hat blong ol pikinini blong ol man … hem i samting we evri man i wantem moa plante long ol narafala samting … mo hem i wan glad we i bigwan olgeta long sol.”3
© 2017 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/17 Oli letem translesen: 6/17 Translesen blong First Presidency Message, August 2017. Bislama. 97928 852