President a Odzi Kan na n’Apamfo Amandzɛɛbɔ, Dzifuu 2017
Osũanyi n’Abrabɔ
Mfe eduasa a wɔabɛsen kɔ wɔ Ghana no, yɛ ber a odzi kan a nsɔwdo skuulnyi akataasia bi a wɔfrɛ no Doe tuu n’anan sii LDS nhyiamu-dan mu. Nyɛnko bi na ɔtoo nsa frɛɛ Doe dɛ ɔnye no nkɔ, nna Doe so pɛ dɛ ohu mbrɛ Asɔr no tse.
Nkorɔfo a nna wɔwɔ hɔ no yɛɛ no awaawaa etuu ma ɔyɛɛ no nwanwa dɛ, “Ebɛn asɔr na ɔtse dɛm yi?”
Iyi maa Doe n’enyi gyee ma ɔbɔɔ adwen pɔw dɛ obosũa Asɔr no na no mu mba a, enyigye ahyɛ hɔn mã no ho nsɛm. Mbom ɔhyɛɛ ase ara dɛ ɔreyɛ dɛm no, ebusuafo no a wɔsɛ bi na anyɛnkofo hyɛɛ ase dɛ wɔrokõ tsĩa no wɔ biribiara mu. Wɔkãa nsɛm bɔn pii faa Asɔr no ho na wɔyɛɛ dza wobotum biara dɛ wɔdze besianka n’adwen.
Naaso nna Doe enya dasegye.
Oenya gyedzi, na ɔdɔɔ asɛmpa no a ɔdze enyigye rehyɛ n’abrabɔ mu no. Ntsi, ɔhɛɛn enuma esubura no mu.
Ɔno ekyir no, ɔdze noho hyɛɛ adzesũa na mpaabɔ mu. Ɔkyeen kɔm na ɔhwehwɛɛ Sunsum Krɔnkrɔn no ne nhyɛdo wɔ n’abrabɔ mu. No nsunsuando no, Doe ne dasegye na ne gyedzi nyinii ma ɔhyɛɛ dzen na ɔdɔɔ bun mu. Ewiei no ɔbɔɔ adwen pɔw dɛ ɔbɔsom etuhoakyɛ asɛmpakã dwumadzi ama Ewuradze.
Ofii asɛmpakã dwuma no, ɔnye asɛmpasomafo a ɔasom ewie no faa anyɛnkoyɛ ma wɔwaree—kor noara a onumaa no mfe kakra a abɛsen no—na ekyir no wɔsɔɔw hɔn ano wɔ Johannesburg South Africa Temple.
Mfe pii abɛsen fitsi ber a Doe Kaku nyaa Jesus Christ n’Asɛmpa ho enyigye ho sũahu no. Dɛm mber no mu no, nnyɛ aber biara na abrabɔ ayɛ dɛwdzi ama no. Woetsim wɔ akoma yaw na abagura a wɔayɛ ne kyɛfa mu, a ɔahwer mba beenu—a dɛm sũahu no ho yaw a ɔdɔ bun mu no da ho twuw n’akoma mu.
Naaso ɔno na no kun, Anthony, wɔaper dɛ wɔbɔtwe aben hɔn ho na hɔn Ɔsor Egya dɔfo a, wɔdze hɔn akoma nyina dɔ no.
Ndɛ, mfe 30 ekyir a ɔhɛɛn enuma esubura mu no, Akyerɛbaa Kaku ewiei etuhoakyɛ asɛmpakã dwumadzi kor so ndaansa yi—dɛm aber yi ɔnye no kun soomee a, nna kun no yɛ asɛmpakã president wɔ Nigeria.
Hɔn a wonyim Akyerɛbaa Kaku kã biribi soronko fa no ho. Ɔhyerɛn. Ɔyɛ dzen dɛ enye no bedzi nkitsaho mber kakra a ɔwo ankasa nnkenya ahomkã.
Ne dasegye si pi, ɔkã dɛ: “Minyim dɛ Agyenkwa no hu me dɛ Ne babaa na Ne nyɛnko (hwɛ Mosiah 5:7; Ether 3:14). “Na emi so murusũa ara yie dɛ mebɛyɛ Ne nyɛnko na morobɔ mbɔdzen so—nnyɛ wɔ dza mekã nko ho, mbom wɔ dza meyɛ so ho.”
Yɛyɛ Esuafo
Akyerɛbaa Kaku n’asɛm no tse dɛ nkaafo dodowara hɔn dze. Nna ɔwɔ pɛ dɛ obohu nokwar no, ɔyɛɛ edwuma a wɔdze nya sunsum ne kan no, ɔkyerɛɛ no dɔ maa Nyankopɔn na ne mfɛfo, na kwan no do no, ohyiaa nkõdzen pii na awerɛhow.
Mbom mbrɛ wɔkõe tsĩaa no biara no, awerɛhow biara mu no, ɔkɔr do kɔr kan wɔ gyedzi mu. Na dza ohia tsitsir ara no, n’enyigye annka ekyir. Nnyɛ kwan a ɔdze betsim wɔ abrabɔ no nkõdzen ber nko na ohunii, mbom ne nyina ekyir no, ɔkɔr do yɛɛ prɔmprɔm.
N’asɛm no tse dɛ wodze na medze.
Ɔnntɔ kã dɛ hɛn akwantu no bɛyɛ tromtrom anaa nsɔhwɛ biara nnyi do.
Hɛn nyina yɛwɔ hɛn akoma mu yaw, hɛn nkõgu na hɛn awerɛhow.
Yebotum mpo enya abagura atsenkã ma ɔtɔfabi a ɔabor hɛn do.
Naaso hɔn a wɔbɔ osũanyi abrabɔ no—wotsim nokwar mu na wɔkɔ do kɔ kan wɔ gyedzi mu, hɔn na wɔtwer Nyankopɔn na wosie Ne mbrasɛm;1 hɔn a wɔdze asɛmpa no bɔ bra da biara na dɔnhwer biara mu, hɔn a wɔsom hɔn a woetwa hɔn ho ehyia dɛ mbrɛ Christ bɔsom no, wɔyɛ ndzeyɛɛ pa nkorkor no—nye hɔn a hɔn ndzeyɛɛ nketseabaa no ɔtɔ dɛ ɔdze nsonsonee kɛse ba no.
Hɔn a wɔyɛ ayamuyie kakra no, wɔdze bɔn kyɛ ara yie na wɔyɛ ehumbɔbɔr kakra no nye hɔn a wobenya ehumbɔbɔr.2 Hɔn a wodua tsema na ɔdɔ ndzeyɛɛ a wɔyɛ no nkorkor no, na wɔbɔ mbɔdzen dɛ wɔbɔbɔ bra a ɔyɛ nhyira, abodwee na asomdwee dɛ Jesus Christ osũanyi no, wɔma wiadze yi yɛ tsenabea pa no, hɔn na ewiei no wobenya enyigye.
Na wobohu dɛ “Nyame no dɔ no a ɔhɛnhɛn adasamba akoma mu no … ɔyɛ adze pa a ɔsom bo kyɛn adze nyinara … na ɔma ɔkra enyigye mbordo.”3
© 2017 by Intellectual Reserve, Inc. All rights reserved. Wɔakora do tumdzi nyina. USA na wotsintsimii. First Presidency Message, August 2017 ne nkyerɛasee. Fante. 97928 502