Parofita me ra Liutaki Keda

Ena vica na yabaki sa oti, au a dabe voli ena dua na rumu ena Vale Tabu e Salt Lake, era dau sota kina na Mataveiliutaki Taumada kei na Kuoramu ni iApositolo Le Tinikarua, vakadua ena dua na macawa. Au vakaraica na lalaga eratou dau qarava yani na Mataveiliutaki Taumada, ka vakaraica sara vakamalua na kedrai taba o ira yadua na Peresitedi ni Lotu.

Ena noqu vakaraici ira vakamalua, era veiliutaki e liu vei au—mai vua na Parofita o Josefa Simici (1805–44) vei Peresitedi Gordon B. Hinckley (1910–2008)—au vakasamataka, “Sa ka levu na noqu vakavinavinaka ena nodra veituberi yadua.”

Oqo eso na turaga era sega ni yavalati rawarawa, era tudei tu ka sega ni dau druka. Era tamata ni Kalou. Niu vakasamataki ira na parofita ena gauna oqo au kilai ira ka lomani ira, au vakananuma na nodra bula, nodra itovo kei na nodra vakavuvuli veivakauqeti.

E Peresitedi tu ni lotu ena gauna au a sucu kina o Peresitedi Herber J. Grant (1856–1945). Niu dau vakasamataka na nona bula kei na nona ivakavuvuli, au vakabauta ni dua na ka e kilai tani kina o Peresitedi Grant na nona dau vakaraitaka tu na gugumatua—nona gumatuataka na veika vinaka ka vakaturaga.

E Peresitedi tu ni lotu ena gauna au a Bisopi kina ena noqu tabanalevu mai Salt Lake City o Peresitedi George Albert Smith (1870–1951). E dikeva o koya na nodrau veidre voli tiko na Turaga kei vunica. “Kevaka mo na tiko ena nona yasana na Turaga,” e vakavulica o koya ni, “ko na sotava tiko na nona veivakayarayarataki, ka o na sega ni vinakata mo caka cala.”¹

Au a kacivi meu veiqaravi vakaleweni Kuoramu ni iApositolo Le Tinikarua ena yabaki 1963 mai vei Peresitedi David O. McKay (1873–1970). A vakavulica o koya na nodra nanumi na tani ena nona bulataka na nona bula. “Na vakabauta dina Vakarisito,” a kaya o koya, “sai koya na loloma e cakacakataki.”²

E dua vei ira a bau vakasakiti na nona dau volavola ena Lotu, a dau idusidusi tu ena nona bula na yavu ni kosipeli o Peresitedi Joseph Fielding Smith (1876–1972). E dau wilika vakawasoma o koya na ivolanikalou ka kila vinaka sara na vakavuvuli kei na vunau e kunea ena kena veidraunipepi mai vei ira kece na tamata au kila.

E a veiqaravi vaka noqu peresitedi ni teki ena gauna au se cauravou lailai kina o Peresitedi Harold B. Lee (1899–1973). A dau cavuta vakalevu o koya na malanivosa oqo “Ia mo dou tudei ena vanua tabu ka kakua ni yavalati rawa.”³ E dau vakauqeti ira na Yalododonu me ra dau tudei ka tu vakarau me ra na kidava na nona dau vakasolokakana mai na Yalo Tabu.

Au vakabauta e dua na ivakavuvuli veidusimaki ena bula nei Peresitedi Spencer W. Kimball (1895–1985) na nona dau yalodina. E taucoko ka matata na nona, yalodina vua na Turaga. E yalodina talega o koya ena bulataki ni kosipeli.

Ena gauna e Peresitedi kina ni Lotu o Peresitedi Ezra Taft Benson (1899–1994), a kacivi au meu nona Karua ni Daunivakasala ena Mataveiliutaki Taumada. E nona idusidusi na loloma, ka umani taucoko tu ena nona ivosavosa taleitaki, ka cavuta na iVakabula “A cava na ivalavala sa kilikili kaya kei kemudou? Au sa kaya vakaidina vei kemudou, mo dou vakataki au.”⁴

O Peresitedi Howard W. Hunter (1907–95) e dua e dau raica na veika e vinaka ena nodra rawaka na tani. Ia e dau vakarokoroko ka yalomalua o koya. E ka talei vei au noqu veiqaravi voli vaka nona Karua ni Daunivakasala.

A vakavulica vei keda o Peresitedi Gordon B. Hinckley meda cakacaka ena noda vinaka duadua. E dau wasea eso na ivakadinadina kaukauwa me baleta na iVakabula kei na Nona itavi. A vakavulici keda ena loloma o Koya. E ka taleitaki kau kalougata niu a veiqaravi voli vaka nona Matai ni Daunivakasala.

Na iVakabula e dau talai ira mai na nona Parofita baleta ni lomani keda o Koya. Ena gauna ni koniferedi ena Okotova, o ira na Vakaitutu Raraba ni Lotu ena soli tale vei ira na gauna talei me ra wasea na Nona vosa. Meda torova yani na itavi oqo ena yalo e vakarokoroko kei na yalo malumalumu.

Eda kalougata ni sa vakalesui mai ki vuravura na Lotu i Jisu Karisito ka yavutaki tu na Lotu ena vatu ni vakatakila. E vakabulai tu na kosipeli i Jisu Karisito ena kena drodro tikoga mai na ivakatakila.

Meda vakarautaki keda meda ciqoma na noda ivakatakila yadua e dau lako yauyau mai ena gauna ni koniferedi raraba. Me vakasinaiti tiko na yaloda ena gugumatua ni da laveta na ligada meda tokoni ira na parofita kei na iapositolo bula. Mena vakararamataki na noda rai, laveti cake, lomavinaka ka vaqaqacotaki ena noda vakarogoca na itukutuku. Meda na qai rawa ni yalataki keda tale vua na Turaga o Jisu Karisito kei na—Nona kosipeli kei na Nona cakacaka—ka meda bula tu ena noda maroroya na Nona ivakaro ka cakava na Lomana.