Reprofet Lomekrael er Kid

Sesei el rak er a memong, e ak dilengchokl er a tara delmerab er a chelsel a Salt Lake Temple el ngii el delmerab a bek el sandei e a First Presidency me a Chelechad er a Teruich me a teru el Apostol a ta el bo el kebetech er a chelsel. A kulemes el bedul bab er a kboub el chemau a First Presidency, e mlo ngellomel lomes a siasing er a re bek el mla Merredel er a Ikelesia.

Tia er a kngellomel lomes, er tirkal luleak kuchei er ngak—lomuchel er a Profet Joseph Smith(1805–44) el mei er a President Gordon B. Hinckley(1910–2008)—e ak mlo melbedebek el kmo, “Ak meral ngara omereng el saul el kirel a chedaol ulekrael er a dersta er tir.”

Tirka meral chetengakl el chad el dimlak el mesim, e dimlak le touchakl, e dimlak el kimer. Te meral chedal a Dios el chad. Sel kuk kulbedebek er a reprofet er chelechal taem el tir a ble kudengelterir er betik a renguk er tir, e ak mo dobedebek a klengar tir, me a blekerdelir, me a chedaol lomekellomes el osischeklir.

A President Heber J. Grant (1856–1945) a mle Merredel er a Ikelesia er ak mechell. Sel kulbedebek er a klengar ngii me a osischeklel, e a kumerang el kmo a tal blekeradel lulechotii a President Grant a telkangel—el telkangel er a ikel tekoi el ngii a ungil e chetengakl.

A President George Albert Smith (1870–1951) a mle Merredel er a Ikelesia er a taem el kusiou el bisop er a ward er ngak er a Salt Lake City. Ng miltebengar el kmo ngarngii a mesisiich el mekemad er a omengurs er a delongelel a Rubak me a cherarou. “Omko ko melemolem el bereked er a Rubak,” ngii a ulsisechakl, “e ko mo ngara cheungel a derderel e mo diak er a rengmiu a meruul a mekngit.”¹

Ak mlokedong el mo mesiou el chedal a Chelechad er a Teruich me a Terung er se er a 1963 lokiu a President David O. McKay (1873–1970). Ngii a ulisechakl el kirel omelatk el kirir a rebebil e mle ulecholt er a teletelel a klengar ngii. Ng millekoi el kmo, “A Meral Klekeristiano a beltik el reng lulecholt er a omeruul.”²

A President Joseph Fielding Smith (1876–1972), el tara kmal meduch er a omeluches el chad er a Ikelesia, a ulkerebai osisechakl er a ikelesia er a klengar ngii. Ng mle mesisiich el menguiu chedaol llechukl e kmal mle mui a klemedengei er ngii er a osisechakl me a suobel er a chelsel er a ngii di el chad el kudengelii.

A President Harold B. Lee (1899–1973) a milesiou el merredel er a stake er ak kekerei el buik. Sel kot el soal tekoi a kmo “Bom dechor er a chedaol basio, e lak ko mesim.”³ Ng milngelechel er a Resanto el mo ultuil, e lorrenges, er a odbechel Chedaol Reng.

A kumerang el kmo a suobel er a klengar er a President Spencer W. Kimball (1895–1985) a sel blak el reng er ngii. Ng meral mle mui, e diak el mesim a blak el reng er ngii el mo er a Rubak. Ng dirrek el kmal mle blak a rengul loltirakl er a ebangkelio.

A President Ezra Taft Benson (1899–1994) er a bo Lorredel er a Ikelesia,e ng milkedongak el mo Ongeru el Counselor ngii er a First Presidency. A beltik el reng a mle kerebai lurrekodel er ngii, e ulecholt er sel kmal soal tekoi, el ngii a le dilii Osobel” “Ngera el teletelel a chad a kiriu loltirakl er n gii? Me ak dmu er kemiu el kmo, ko mo uai Ngak.”⁴

A President Howard W. Hunter (1907–95) a ngii a mle blechoel lomes er a klungiolir a rebebil. Ng millemolem el mesisiich; e millemolem el ngariou a rengul. Ng chetengakl el techall el kulesiou el Ongeru el Counselor ngii.

A President Gordon B. Hinckley a ulisechakl er kid el meruul el mo er sel kot el tkul er bab el sebeched. Ng ulechais er a mesisiich el olchotel a klaumera er ngii el kirel Osobel me a Urerel. Ng ulisechakl er kid loba beltik el reng. A omesiungek el First Counselor ngii a kmal mle chetengakl e klengeltengat el mei er ngak.

A Osobel oldurokl er a reprofet le Ngii el betik a rengul er kid. Tial merael mei el klou el ongdibel er a Ongeteruich el buil, e a re General Authorities er a Ikelesia a lmuut el mo er ngii a techellir el mo ouchais a Tekingel. Aki olsingch el kirel tial ngerachel loba dmolech el blak el reng me a ngariou el reng.

Kede meral ngeltengat el mla moluut el Ikelesia er a Jesus Kristo a ngara beluulechad e ngii el Ikelesia a dechor er a dodai er a chedaol ocholt. A melemolem el chedaol ocholt a ngii a klengar er a ebangkelio er a Jesus Kristo.

Bo dekeldmokl el mo ngmai a chachisois el chedaol ocholt el kired er chelechal merael mei el klou el ongdibel. A rengud bo le mui er a dmolech el blak el reng sel dodars a chimad lolchotel a kengei me a odubech el kirir a re ngar el profet me a re apostol. Bo de mukrael, mo selbechakl, e mechelaod, e bo de mesisiich sel dorrenges a klemechir. E deluut el mo kldmokl el smisichii a blak el reng er kid el mo er a Rubak el Jesus Kristo—me a ebangkelio er Ngii me a Urerel e bo de kiei el blak a rengud loltirakl a Llechul e dolemolem el meruul a Soal.