Dali, Sunod Kanako—Para sa mga miting sa Melchizedek Priesthood ug Relief Society

Sa Enero 2018, mausab na ang mga miting sa Dominggo para sa Melchizedek Priesthood ug Relief Society. Kini nga mga kausaban maglakip sa mga materyal nga atong gigamit—Ang sunod-sunod nga mga Pagtulun-an sa mga Presidente sa Simbahan pulihan na og mas talagsaong emphasis sa pagkat-on gikan sa mga mensahe sa kinatibuk-ang komperensya, pakigtambag sa usag usa, ug pagtuon sa mga espesyal nga topic nga gipili sa atong kinatibuk-ang mga lider.

Apan ang pinakamakahuluganong kausaban may kalabutan kon unsaon nato sa paggamit kini nga mga materyal aron matuman ang tinuod nga mga katuyoan sa atong mga miting sa Dominggo.

Giorganisar sa Dios ang Iyang mga anak sa pakigsaad ngadto sa mga korum sa priesthood ug Relief Society aron makatabang sa pagtuman sa Iyang buluhaton. Dunay impluwensyal kaayong mahitabo kon magpundok kita ubos sa direksyon niadtong nanaghupot sa mga yawe sa priesthood. Mao nga samtang importante ang instruksyon sa ebanghelyo, ang mga Dominggo nga miting sa Priesthood ug Relief Society mas labaw pa kay sa magklase. Mga miting usab kini sa pagtrabaho diin dungan kitang magkat-on gikan sa mga mensahe sa kinatibuk-ang komperensya, makigtambag mahitungod sa buhat sa kaluwasan, ug mag-organisar aron matuman ang buluhaton. Ang nagsingabut nga kausaban sa 2018 makatabang kanato sa pagtuman niini nga mga katuyoan.

Kini nga kausaban bag-o ba nga kurikulum—o gidugang ra? Ang bag-ong mga materyal susama ra sa usa ka kurikulum, apan pamaagi usab kini aron ang mga korum sa Priesthood ug ang mga Relief Society makapalambo sa ilang partisipasyon sa buluhaton sa Dios ug makab-ot ang lokal nga mga panginahanglan. Kini nga kausaban maghatag og maayong palibut diin mahimo ang pag-ila, pakigtambag ug sa pagkab-ot niana nga mga panginahanglan.

Unsa may atong tutukan atol sa mga miting sa Dominggo? Sugod karong Nobyembre 2017, ang mga isyu sa kinatibuk-ang komperensya sa Liahona ug Ensign maglakip na og mga materyal nga gamiton sa Dominggo nga miting sa Melchizedek Priesthood ug Relief Society. Duha ka binulan nga miting magtutok sa mga mensahe sa komperensya, ug ang mga lider ug mga teacher hatagan og mga ideya nga matabangan ang mga miyembro sa paghisgot ug paggamit niana nga mga mensahe. Ang unang mga Dominggo igahin para sa pakigtambag sa usag usa alang sa pagkab-ot sa lokal nga mga panginahanglan ug ang ikaupat nga mga Dominggo para tun-an ang topic nga gipili sa atong kinatibuk-ang mga lider. Tan-awa ang iskedyul sa binulan nga miting sa pikas kilid niini nga pahina.

Unsay buot ipasabut sa pakigtambag sa usag usa mahitungod sa lokal nga mga panginahanglan? Ang mga korum sa Melchizedek Priesthood ug ang mga Relief Societiy “[mo]lingkod sa konseho [mag-abut alang sa pagtimbang-timbang sa panginahanglanon]” (D&P 107:89) atol sa unang Dominggo sa matag bulan. Ubos sa direksyon sa priesthood o sa mga lider sa Relief Society, ang mga miting sa unang Dominggo gamiton sa pag-ila sa mga lokal nga panginahanglan ug makigtambag sa usag usa kon unsaon sa pagkab-ot kana nga mga panginahanglan. Ang posibling mga topic para sa mga council sa unang Dominggo maglakip kon sa unsang paagi mapalambo ang komunikasyon sa mga sakop sa pamilya, pagserbisyo sa komunidad, ug paggiya sa kabatan-onan sa ward o branch. Sa mosunod nga mga miting, ang korum, grupo, o Relief Society mo-follow up sa mga impresyon ug mga nabuhat.

Kini nga kurikulum parehas ra ba sa Come, Follow Me [Dali, Sunod Kanako] nga para sa kabatan-onan? Bisan og ang mga topic ug materyal sa Dali, Sunod Kanako—Para sa mga Miting sa Melchizedek Priesthood ug Relief Society lahi ra kay sa Come, Follow Me [Dali, Sunod Kanako] para sa kabatan-onan, ang pamaagi sa pagtudlo ug pagkat-on parehas ra. Para sa dugang nga impormasyon mahitungod sa pagkat-on ug pagtudlo sa ebanghelyo, tan-awa sa Pagtudlo sumala sa Pamaagi sa Ginoo diha sa teaching.lds.org.

Dili ko magtutudlo. Kinahanglan pa ba kong mo-subscribe og Liahona o Ensign? Mas nindot ang imong kasinatian kon mobasa ka sa mga mensahe sa kinatibuk-ang komperensya ug dad-on kini sa imong mga miting sa Dominggo. Imong ma-access ang mga mensahe gamit ang internet diha sa conference.lds.org ug sa Gospel Library app o sa pag-subscribe og Liahona o Ensign (tan-awa sa store.lds.org).

Unsa kaha kon dili available sa akong pinulongan ang magasin sa kinatibuk-ang komperensya? Ang mga mensahe sa kinatibuk-ang komperensya anaa sa daghang pinulongan sa conference.lds.org ug sa Gospel Library app, ug ang mga materyal sa kurikulum makita unya sa ComeFollowMe.lds.org. Kon walay bag-ong mga materyal sa kurikulum sa imong pinulongan diha sa internet o sa magasin, tan-awa sa Instructions for Curriculum, 2018 para sa dugang nga impormasyon.

Kanus-a man ta magsugod og tuon sa bag-ong mga mensahe sa kinatibuk-ang komperensya? Magsugod ka og tuon sa mga mensahe sa Oktubre 2017 nga komperensya inig ka Enero 2018. Human niana, ang imong lokal nga lider mohukom kon kanus-a sugdan ang paggamit sa mga mensahe gikan sa sunod nga komperensya—malagmit inigka Mayo ug Nobyembre sa matag tuig.

Kinsay mopili kon asa nga mga mensahe sa kinatibuk-ang komperensya ang atong tun-an? Makigtambag sa usag usa ang imong mga lokal nga lider kon asa nga mga mensahe sa komperensya ang mas gikinahanglan sa inyong korum, grupo, o Relief Society. Ang high priest group, elders quorum, ug Relief Society sa mao ra gihapong ward o branch pweding magtuon og managlahing mensahe aron makab-ot ang managlahing panginahanglan.

Sugod sa Enero 2018