Te tāvinira’a a te mau peropheta ’e te mau ’āpōsetolo nā te ao ato’a nei

’Ua pi’ihia te mau peropheta ’e te mau ’āpōsetolo ’ei mau « ’ite pāpū nō te i’oa nō te Mesia i roto i te ao pā’āto’a nei » (PH&PF 107:23). Teie te tahi o tā rātou mau ’ohipa mai te ’āmuira’a rahi nō ’ēperēra ra.

’Ua fa’ahanahana hau noa te peresideni Thomas S. Monson i te 90ra’a o tōna matahiti i Utah (Marite), i te 21 nō ’ātete ra. ’Ua fa’ahiti fa’ahou ’oia i tōna hia’ai tahito ē, te tao’a hōro’a rahi roa a’e nōna, ’o te haerera’a ïa te ta’ata « e ’imi i te hō’ē ta’ata e fifi nei ’e ’aore rā, tē ma’ihia ra ’e ’aore rā, tē vai ’ōtahi ra, ’e e rave i te hō’ē ’ohipa nōna i teie mahana ».

I Hamilton (Niuterani,) ’ua ha’amo’a te peresideni Henry B. Eyring i te fare rahi i Temple View, tei riro i nā mua a’enei e ’āua fare ha’api’ira’a tuatoru a te ’Ēkālesia i Niuterani. I muri mai i te mata’i rorofa’i Irma, ’ua tere ’oia nā Porto Rico ’e Saint Thomas, ’e ’ua fārerei ’oia i te mau melo o te ’Ēkālesia e tauturu ra i te tāmāra’a i Florida (Marite).

’Ua tere te peresideni Dieter F. Uchtdorf nā Texas (Marite), ’e ’ua ’ite ’oia i te mau pupu feiā mo’a i Houston tē ’ohipa ra ’e tō rātou ta’ata tupu i muri mai i te mata’i rorofa’i Harvey, ’ua nā ’ō ’oia ē, e peu mātau te « tauturura’a i te vāhi e nehenehe e tauturu » nā te feiā mo’a nā te ao ato’a nei.

’Ua hōro’a te peresideni Russell M. Nelson i te tāvana rahi nō Nebraska (Marite), i te hō’ē buka ’ā’amu ’utuāfare, ’ua fārerei ’oia i te mau feiā fa’atere ’e te mau misiōnare i New York (Marite) ’e ’ua parau ato’a ’oia i te mau pīahi Institut nō Utah ē, « ’ua ’ī te Bibilia i te mau parau tohu nō ni’a … i te Fa’aho’i-fa’ahou-ra’a ».

’Ua fārerei Elder Dallin H. Oaks i te mau melo nō te fenua Tāpōnē ’e Korea, ’e ’ua parau ’oia : « Tē māna’ona’o nei te Fatu i tāna mau tamari’i. ’Ua ’ite ’oia i tō rātou orara’a ’e tō rātou mau māna’ona’ora’a ’e tē fa’a’ite hua nei ’oia i tōna here ». I roto i te hō’ē fa’anahora’a Mata ’e Mata i Korea, ’ua pāhono ’oia i te mau uira’a a te feiā ’āpī. ’Ua fārerei ’oia i te fa’aterehau ha’apa’o i te ha’uti Olympic i Tokyo i 2020. ’E i te anira’a a te peresideni nō Peru, ’ua fārerei rāua ’e ’ua fāri’i ho’i Elder Oaks i te ha’amāuruurura’a a te peresideni nō te tauturu a te ’Ēkālesia i roto i te vai pu’e.

I Utah, ’ua fa’aitoito Elder Ballard i te feiā ’āpī pa’ari ’ia fa’atura i te Sābati ’ei « taime fa’ahiahia ’e te hanahana » ’e ’ia tuatāpapa rātou i te mau parau tumu niu ’e te mau ha’api’ira’a tumu o te ’Ēkālesia. ’Ua parau ’oia i te mau rave ’ohipa hiero ē e fa’a’ohipa-ato’a-hia i te mileniuma te mau hiero i patuhia i teienei. Rāua Elder Ronald A. Rasband, ’ua tere rāua nā Texas nō te fa’aitoito i te feiā tāmā i muri mai i te mata’i rorofa’i ’e te vai pu’e.

’Ua fāri’i Elder Robert D. Hales i te fēti’a a te peresideni nō te pionie fa’anu’u nō 2017 (Pioneers of Progress President’s Award) mai roto mai i te hō’ē fa’anahora’a ta’ata i Utah. ’Ua parau ’oia : « Te roa’ara’a i te tauturu i te tahi ’e te tahi, i te fa’ateitei i te tahi ’e te tahi, i te ha’apūai i te tahi ’e te tahi, e hīro’a rahi roa ïa, ’ia mana’o vau, nō te rirora’a ’ei pionie ».

I Rusia ’e Ukraine, ’ua ha’api’i Elder Jeffrey R. Holland ē, ’ua ’ōpuahia te mau tāmatara’a nō te orara’a nei, nā te ’evanelia rā e hōro’a i te hi’o-fa’aātea-ra’a, te tīa’ira’a ’e te fa’aitoitora’a. I te piti o te rurura’a i Windsor nō ni’a i te hāmani-’ino-ra’a i te feiā fa’aro’o i Peretāne, ’ua parau ’oia ē, nā te fa’aro’o e tauturu i te ta’ata e rave rahi e ti’a mai mai te ti’ara’a tītīhoria nō te turu i te sōtaiete. I muri mai i terā rurura’a, ’ua hōro’a ’oia i te tahi parau tauturu i te mau melo o te ’Ēkālesia, i te mau peresideni misiōni ’e te mau misiōnare i Pōtītī ’e Pāniora.

’Ua tere Elder David A. Bednar i e toru fenua nō Afirika Tō’o’a o te rā, ’aita i terehia a’enei e te hō’ē ’āpōsetolo : i Senegal, i reira tōna pūpūra’a i te hō’ē pure ha’amo’ara’a ; i Guinea ; ’e i Mali. ’Ua fārerei ato’a’ ’oia i te mau melo nō Nigeria ’e Ghana. I roto i te hō’ē purera’a ’ati ti’a i te ao tei ha’apurorohia mai North Carolina (Marite) mai, ’ua fa’aitoito ’oia i te feiā ’āpī pa’ari ’ia riro ’ei « ave fifi tū’atira’a » i ni’a i tā rātou fifi ’utuāfare mure ’ore.

’Ua fārerei Elder Quentin L. Cook i te mau melo ’e te mau misiōnare i Taiwan, Hong Kong, Inidia ’e Thailand, ma te parau ē « ’ua ’ana’anatae te mau melo i te ’Ēkālesia, i te fa’atumura’a i ni’a i te hiero ’e te ’ohipa misiōnare ». I New Jersey (Marite), ’ua paraparau ’oia i te rurura’a Seymour Institute Seminar nō ni’a i te ti’amāra’a i te pae fa’aro’o. ’Ua nā ’ō ’oia : « E ti’a ia tātou ’ia tāmau noa i tā tātou tauto’ora’a faufa’a rahi nō te ha’amara’ara’a i te morare ’e nō te pārurura’a i te mau ’utuāfare ». I California (Marite), ’ua fa’aitoito ’oia i te mau melo pupu pāruru ’ia tāpe’a i te fa’aro’o ’e te ’aifāito i roto i tō rātou orara’a ’e ’ia pāruru i te ti’amāra’a i te pae fa’aro’o.

I Ecuador ’e Colombia, ’ua ha’api’i Elder D. Todd Christofferson ē, e riro te ti’aturira’a i te ti’a-fa’ahou-ra’a o te Mesia i te tāmāhanahana ’e te turu ia tātou. I Inidia, ’ua fāri’i mai ’oia i te hō’ē Fēti’a nō te hau i roto i te ao nā ni’a i te i’oa o te ’Ēkālesia ’e ’ua hōro’a ato’a atu i te tahi Buka a Moromona reo Nepali i te peresideni ’e te mono peresideni nō te fenua Nepal ’e i te ’āma’a nō Kathmandu.

Ma’a ’āva’e nā mua i te mau mata’i rorofa’i ’e te mau vaipu’e, ’ua tere Elder Neil L. Andersen nā Porto Rico, Haiti, ’e te Rēpupirita Tominita, ’e ’ua paraparau ’oia nō ni’a i te fa’arava’ira’a iāna iho, te ha’api’ira’a ’e te fa’aineinera’a ’ia fāri’i i te mau ha’amaita’ira’a o te hiero. I te ’āru’i LDS Family Education Night i te fare ha’api’ira’a teitei Arizona State University i Arizona (Marite), ’ua fa’aitoito ’oia i te feiā mo’a ’ia « ha’amatara i tā tātou mau ’ūputa, ’ia māramarama i te ti’aturira’a o te tahi atu mau ta’ata [’e] ’ia ha’api’i rahi atu ā nō ni’a ia rātou ». ’Ua ha’amau Elder Andersen i te 100ra’a o te titi i Firipino ’e ’ua ha’amo’a i te pū ha’api’ipi’ira’a misiōnare nō Manila tei fa’a’ā’anohia.

I Afirika ’Apato’a ’e i te Rēpupirita manahune o Tōneto, ’ua parau Elder Ronald A. Rasband ē, ’ia hi’ohia nā hiero e toru i matara ’e nā hiero e pae e hāmanihia ra ’aore tei fa’aarahia, « tē fa’aineine ra te Fatu i te nūna’a Afirika ’ia fāri’i i te tā’āto’ara’a o tāna mau ha’amaita’ira’a ».

’Ua tere Elder Gary E. Stevenson nā Vanuatu, Auterāria, Niuterani, Pōrīnetia farāni, ’e i Brigham Young University–Hawaii i Hawaii (Marite). ’Ua parau ’oia : « ’A … hi’o ai tātou i tā tātou mau tāmatara’a nā roto i te tīti’a o te ’evanelia, e ’ite mai tātou i te mau pāhonora’a e fa’atae mai i te pōpou ’e te ’oa’oa ». ’Ua fārerei ’oia i te peresideni ’e te fa’aterehau mātāmua nō Vanuatu, nā reira ato’a te ari’i ’episekōpo nō Pape’ete (Tahiti).

’Ua tere Elder Dale G. Renlund e pae fenua i tiunu ra : Guatemala, Costa Rica, El Salvador, Nicaragua, ’e Honduras, ’e ’ua fa’anaho ’oia i te titi mātāmua reo Q’eqchi’ i Guatemala ’e ’ua ’āmui i te hō’ē rurura’a nō ni’a i te mau ti’āmāra’a i te pae fa’aro’o ’e i te hō’ē ’āmuira’a feiā āpī. I ’ātete, ’ua rave ’oia ’e tāna vahine ’o Ruth L. Renlund, i te fa’anahora’a Mata ’e Mata mātāmua mai Accra (Ghana) atu, ’e i te ’āva’e setepa ra, ’ua fa’aitoito ’oia i te mau pīahi nō Brigham Young University–Idaho i Idaho (Marite), ’ia tūru’i i ni’a i te ha’api’ira’a tumu o te Mesia.