Ol Trifala Sista

Fas sista, i luk hemwan olsem se oli stap mekem nogud long hem—olsem wan we oli mekem samting long hem.¹ I luk se wan samting folem wetem wan moa samting we i stap hapen long hem we i mekem se hem i no glad. Wetem kaen tingting ia long laef, hem i givim spes blong nara man i kontrolem hem long wei we hem i stap filim mo mekem samting. Taem yumi mekem hemia, oli pulum yumi i go folem evri kaen win blong tingting—mo tedei bitim bifo wetem sosol media, ol win oli blo olsem win blong hariken.

Ol dia sista. ?From wanem bae yufala i sarenda long hapines blong yufala long wan, o long wan grup blong ol pipol, we oli no kea long yufala, o long hapines blong yufala nating?

Sapos yu luk se yu stap wari abaot wanem ol nara pipol oli stap talem abaot yu, bae mi givim wan meresin from: Tingbaot se huia yu. Tingbaot se yu yu kamaot long laen blong king blong kingdom blong God; yu gel blong Papa mo Mama long Heven we oli rul long ful yunives.

Yu gat spirit bladmak blong God. Yu gat ol presen we i spesel, we oli kamaot taem oli krietem yu, mo oli kam gud moa long taem blong laef blong yu bifo laef long wol. Yu pikinini blong Papa we i stap long Heven we i gat sore mo i no gat en, we i Lod blong Ol Pipol, i Man blong Rul long Ol Heven mo Ol Wol, i Wan ia we i krietem yunives, i sendem ol sta oli fulumap bigfala spes antap, mo i putum ol planet oli tantanem olgeta long ples blong olgeta.

Yu yu han blong Hem.

Ol gudgudfala han.

Ol han blong lav.

Ol han we oli kea.

Mo i no gat wan samting we wan i save talem abaot yu we i save jenisim hemia. Ol toktok blong olgeta oli no gat mining komperem long wanem God i talem abaot yu.

Yu yu pikinini we i impoten tumas long Hem.

Hem i lavem yu.

Iven taem yu kikim leg blong yu, iven taem yu tanem i gowe long Hem, God i lavem yu yet. Sapos yu filim se yu lus, oli sakem yu, o fogetem yu—yu no fraet. Gudfala Man blong Lukaot long Sipsip bae i faenem yu. Bae Hem i karem yu antap long solda blong Hem. Mo bae Hem i karem yu i gobak hom.²

Ol dia sista blong mi. Plis letem ol tabu trutok ia oli draon gud insaed long hat blong yufala. Mo bae yufala i faenem se i gat plante risen blong yumi stap hapi, from se yu gat tabu fiuja blong mekem i kamtru.

Sevya blong wol we yumi lavem, i givim laef blong Hem blong mekem se yu save jusum blong mekem fiuja ia i kam ril. Yu tekem long yu, nem blong Hem; yu wan disaepol blong Hem. Mo from Hem, yu save putum ol klos blong glori we i no save finis.

Nambatu sista i stap kros long wol. Olsem sista blong hem we i no stap glad, hem i filim se ol problem long laef blong hem, wan narawan nao i stamba blong hem. Hem i blemem famli blong hem, ol fren, bos mo ol fren long wok, polis, ol neiba, ol lida blong Jos, fasin blong jenis blong tedei, iven paoa blong laet blong san, mo badlak. Mo hem i toktok from evri samting ia.

Hem i no luk se hem i wan nogud woman. Be hem i filim se hemwan nomo i traem blong mekem samting i gohed. Evri narawan, hem i biliv se oli selfis, oli tingting smol, mo oli no laekem man. Be hem, hem i gat ol gudfala tingting—i gat jastis, tru fasin mo lav.

Sore tumas, kaen tingting blong sista ia we i ting defren, i semmak long plante long yumi. Hemia oli faenemaot long wan stadi we oli mekem bitwin ol grup we oli agensem wanwan long olgeta. Olsem pat blong stadi ia, ol man oli intaviu long ol man Palestaen mo ol man Isrel long Medel Is mo ol man Ripablik mo Demokrat long Yunaeted Stet. Oli faenem se “wanwan saed i filim se grup blong olgeta i mekem samting wetem lav, be i no fasin blong no laekem man; be taem oli askem from wanem nara grup i stap long raorao, oli poenem se fasin blong no laekem man nao i pusum nara grup blong kam agens.”³

Long nara toktok, wanwan grup i tingting abaot olgetawan se olgeta nao oli “ol gudfala man”—oli stret, oli kaen mo oli tru. Be oli luk nara grup olsem “ol nogud man”—oli no save stret samting, oli no ones, mo oli nogud.

Long yia we mi bon long hem, wol i stap long wan nogud wo we i mekem wol i krae sore bigwan mo i harem nogud tumas. Wo ia, kantri blong mi i statem—sam grup blong pipol we oli lukluk sam nara grup se oli ivel mo oli tingting se man i no mas laekem olgeta.

Oli kilimded olgeta ia we oli no bin laekem. Oli mekem olgeta oli sem mo daonem olgeta. Oli tekem se oli no gat paoa—oli no man. Taem yu stap tokbaot nogud wan grup blong ol pipol olsem, bae yu mekem folem toktok blong yu wetem ol aksen blong vaelens agensem olgeta.

Mi seksek taem mi tingting long wanem i bin hapen long namba twante senturi.

Taem wan i agensem, o i no agri wetem yumi, temtesen i blong ting se wan samting i rong wetem olgeta. Mo afta, i isi blong joenem ol rong tingting long ol toktok mo aksen blong olgeta.

Yes, oltaem yumi mas stanap long wanem we i stret, mo i gat ol taem we yumi mas toktok from. Be, taem yumi mekem olsem wetem kros, o nogud kros long hat blong yumi—taem yumi tok strong long ol narawan blong spolem olgeta, mekem oli sem o sarem maot blong olgeta—janis i stap we yumi no stap mekem samting ia long stret mo gud fasin.

?Wanem nao Sevya i tijim?

“Be mi mi talem long yufala, se yufala i mas lavem ol enemi blong yufala, mo yufala i mas prea from olgeta we oli stap mekem i nogud tumas long yufala.

“Long fasin ia bambae yufala i soemaot we yufala i pikinini blong Papa blong yufala long heven.”⁴

Hemia nao wei blong Sevya. Hem i fas step blong brekemdaon ol fanis we oli mekem se man i kros, i no laekem man, i seraot, mo i gat vaelens long wol.

“Yes,” mebi bae yu talem: “Bae mi glad blong lavem ol enemi blong mi—sapos nomo oli glad blong mekem sem samting.”

?Be hemia i impoten o no? Yumiwan, yumi responsibol blong stap olsem disaepol, mo hemia i nomata nating long wanem wei nao ol narawan oli tritim yumi. I klia se yumi hop se bae oli andastanem man, mo oli gat lav tu; be lav blong yumi long olgeta, i no mas dipen long ol filing we oli gat long yumi.

Maet ol hadwok blong yumi blong lavem ol enemi blong yumi bae oli mekem hat blong olgeta i sofsof, mo bae i lidim olgeta blong mekem gud samting. Maet bae i no mekem eni samting. Be hemia i no jenisim komitmen blong yumi blong folem Jisas Kraes.

So, olsem ol memba blong Jos blong Jisas Kraes, bambae yumi lavem ol enemi blong yumi.

Bambae yumi winim kros mo fasin blong no laekem man.

Bambae yumi fulumap hat blong yumi wetem lav i go long evri pikinini blong God.

Bambae yumi go aot blong blesem ol narawan mo givim seves long olgeta—iven “olgeta we oli yusum nogud yumi, mo olgeta we oli agens long yumi.”⁵

Nambatri sista i ripresentem stret mo tru disaepol blong Jisas Kraes. Hem i mekem wan samting we i had blong mekem—hem i trastem God iven taem oli jikim mo givim hadtaem long hem. Long wan wei, hem i holemtaet fet mo hop blong hem nomata long ol jik mo krangke tingting raon long hem. Hem i laef wetem glad, i no from se situesen blong hem i wan gudwan, be fromhem i stap glad.

I no gat wan i gotru long rod blong laef ia we i no gat man i agensem. Wetem plante paoa we oli traem blong pulum yumi longwe, ?olsem wanem nao bae yumi putum ae blong yumi i luk nomo glori blong hapines we Lod i promesem long olgeta we oli stap fetful?

Mi biliv se ansa i stap long wan drim blong wan profet, plante taosen yia i pas. Profet ia, nem blong hem i Lihae, mo drim blong hem i stap long gudfala Buk blong Momon.

Long drim blong hem, Lihae i luk wan bigfala fil, mo insaed long hem i gat wan gudfala tri, we i naes we i naes. Hem i luk tu se i gat ol bigfala grup blong ol pipol, we oli stap wokbaot from tri ia. Oli wantem testem frut blong hem we i gud tumas. Oli bin filim mo trastem se bae frut i givim olgeta bigfala glad mo wan pis we i stap.

I gat wan smol rod we i go long tri, mo long saedsaed blong hem i gat wan rel blong aean we i helpem olgeta blong stap long rod ia. Be i bin gat tu, wan klaod blong tudak we i blokem ae blong olgeta blong oli no luk rod mo tri. Mo maet wanem i wan moa bigfala denja, i saon blong ol bigfala laflaf, mo ol jik we oli kamaot long wan bigfala bilding we i gat plante spes, we i stap kolosap. I sapraes tumas se ol jik ia i winim tingting blong sam we oli kasem tri finis, mo oli testem finis gudfala frut ia, mo oli stat blong oli sem, mo oli go lus.⁶

Maet oli stat blong gat tu tingting se i tru se tri ia i naes olsem we oli bin tingting long hem long fas ples. Maet oli stat blong gat kwestin se wanem oli gotru long hem i tru o nogat.

Mebi oli tingting se sapos oli tanem baksaed long tri, bae laef i moa isi. Mebi bae oli nomo jikim o laf long olgeta bakegen.

Mo yes, ol pipol we oli bin stap jik, i luk se oli ol pipol we oli hapi mo oli gat gud taem. Maet, sapos oli lego tru ia, bae oli gat ples insaed long kongregesen blong bigfala bilding ia wetem plante spes, mo bae oli klapem han blong jajmen, waes tingting, mo gudfala samting blong olgeta.

Ol dia sista, ol dia fren, sapos yu faenem se i had blong hang strong long rel blong aean ia, mo wokbaot stret i go from fasin blong sevem man; sapos laflaf mo jik blong ol narawan we oli luk se oli save samting i mekem se yu gat tu tingting; sapos tingting i trabol from i no gat ansa long sam kwestin o from sam doktrin we yu no andastanem yet; sapos yu no harem gud from sam samting we i no stret, mi askem strong long yu blong tingbaot drim blong Lihae.

!Stap long rod!

!Neva lego rel blong aean—toktok blong God.!

Mo taem eniwan i traem blong mekem yu yu sem from se yu stap tekpat long lav blong God, no lisin long olgeta.

Neva fogetem se yu yu pikinini blong God; ol rij blesing oli stap; sapos yu save lanem blong mekem tingting blong Hem, !bae yu laef wetem Hem wan moa taem!⁷

Ol promes blong pres mo wan ples we i kam long wol, yu no save dipen long hem, oli no tru mo oli no save stretem tingting. Ol promes blong God, yes, oli sua, tru mo gat glad—naoia mo blong oltaem.

Mi invaetem yu blong tingting long relijin mo fet long wan lukluk we i moa hae. I no gat wan samting we oli givim insaed long bigfala bilding wetem plante spes we yu komperem wetem frut blong stap laef folem gospel blong Jisas Kraes.

“God i putum gud plante samting oli rere finis blong ol man we oli lavem hem. Ol man oli no luk ol samting ia long ae blong olgeta. Oli no harem tok blong olgeta long sora blong olgeta mo oli no tingbaot olgeta long tingting blong olgeta be olgeta oli rere i stap.”⁸

Mi lanem blong miwan se rod blong stap disaepol long gospel blong Jisas Kraes, i rod ia we i go long glad. Hem i rod i go long sef ples mo pis. I rod ia i go long trutok.

Mi testifae se tru long presen mo paoa blong Tabu Spirit, yu save lanem samting ia blong yuwan.

Be taem yumi stap wet, sapos rod ia i kam strong tumas long yu, mi hop se bae yu faenem wan sef ples blong haed mo karem paoa insaed long gudfala oganaesesen blong Jos: Praemeri, Ol Yang Woman, mo Rilif Sosaeti. Oli olsem ol sefhaos folem rod ia, we yu save stop mo karembak tras blong yu mo fet blong yu from haf rod we i stap yet. Oli wan sef hom, wan ples blong filim se yu pat, blong kasem toktok blong leftemap tingting long ol sista mo ol nara disaepol.

Ol samting we yu lanem long Praemeri oli mekem yu yu rere from ol narafala trutok we yu stap lanem olsem ol yang woman. Rod blong stap olsem disaepol we yu wokbaot long hem long ol klas blong Yang Woman oli lidim yu blong mekem fren, mo stap sista blong Rilif Sosaeti. Wetem evri step folem rod ia, yu kasem sam moa janis blong soemaot lav blong yu long ol narawan tru long ol aksen blong fet, lav mo sore, jareti, klin fasin mo seves.

Sapos yu jusum rod ia blong stap disaepol bae i lidim yu blong yu glad bigwan mo blong yu kasem tru tabu fasin blong yu.

Bae i no isi. Bae i nidim evri bes fasin we yu gat—evri waes tingting blong yu, evri fasin blong mekem samting, fet, tru fasin, paoa, strong tingting, mo evri lav blong yu. Be wan dei, bae yu lukluk i gobak long ol hadwok blong yu, mo O, bae yu talem tangkyu se yu bin biliv, mo yu no bin aot long rod ia.

I gat plante samting abaot laef we yu no save kontrolem. Be long en, yu gat paoa blong jusum ples we yu stap go mo plante long ol eksperiens blong yu folem rod ia. Hem i no abaot ol samting we yu save mekem, be ol joes blong yu we bae i mekem samting i defren.⁹

Yu no save letem ol situesen oli mekem se yu no glad.

Yu no save letem oli mekem se yu yu wan defren kaen woman.

Yu save stap glad we yu yu wan gel blong God. Yu save faenem glad mo hapines long gladhat blong God mo long lav blong Jisas Kraes.

Yu save stap glad.

Mi askem strong long yufala blong fulumap hat blong yufala wetem fasin blong talem tangkyu mo gud fasin blong God we i no gat limit long hem. Ol sista we mi lavem, !Yufala i save mekem! Mi prea wetem evri lav blong sol blong mi se bae yufala i mekem joes blong gohed strong from tri blong laef. Mi prea se bae yufala i jusum blong leftemap voes blong yumi mo mekem laef blong yumi i wan naes miusik blong presem God, blong stap glad wanem nao lav blong God, mo ol gud samting blong Jos blong Hem, mo wanem gospel blong Jisas Kraes i save karem i kam long wol.

Singsing blong fasin blong stap tru disaepol, maet tiun blong hem i no saon gud, o i laod tumas long samfala. Stat long stat finis, i bin olsem.

Be long Papa long Heven, mo olgeta we oli lavem mo givim ona long Hem, hem i wan singsing we i naes tumas—i singsing ia we i gudfala mo i mekem yu kam tabu, i tokbaot lav we i pemaot man mo seves long God mo ol nara man.¹⁰

Mi livim blesing blong mi olsem wan Aposol blong Lod wetem yufala, se bae yufala i stap long rod ia mo bae yufala i faenem paoa blong gohed wetem glad olsem wan gel blong God, mo semtaem, stap glad blong wokbaot evri dei long rod blong glori blong stap disaepol. Long tabu nem blong Jisas Kraes, amen.