Parau Poroʻi nā te mau tuahine hāhaere, Tītema 2017
Hina’aro ’ia amo i te mau hōpoi’a a te tahi ’e te tahi
’A tuatāpapa nā roto i te pure i teie mātēria ma te ’imi i te heheura’a ’ia ’ite e aha te fa’a’ite atu. Nāhea te ta’a-maita’i-ra’a i te fā o te Sōtaiete Tauturu e fa’aineine i te mau tamāhine a te Atua nō te mau ha’amaita’ira’a ’o te ora mure ’ore ?
Fa’aro’o ’Utuāfare Tōtauturu
« ’Ua hā’atihia tātou e te feiā e hina’aro nei ’ia tāu’a atu tātou ia ratou, ’ia fa’aitoito, ’ia pāturu, ’ia tāmāhanahana, ’ia hāmani maita’i », te parau ïa a te peresideni Thomas S. Monson. « ’O tātou te rima o te Fatu i ni’a i te fenua nei, ma te fa’auera’a ’ia tāvini ’e ’ia fa’ati’a i tāna mau tamari’i i ni’a. Tē tūru’i nei ’oia i ni’a ia tātou ».1
’Ua parau te peresideni Henry B. Eyring, Tauturu mātāmua i roto i te Peresidenira’a Mātāmua : « ’Ua ha’amata te hō’ē tauira’a rahi i roto i tō ’outou ’ā’au i te taime ’a tomo mai ai ’outou i roto i te ’Ēkālesia. ’Ua rave ’outou i te hō’ē fafaura’a, ’e ’ua fāri’i ’outou i te hō’ē parau tapu tei ha’amata i te taui i tō ’outou nātura mau.
« ’Ua fafau ’outou ē, e tauturu ’outou i te Fatu ’ia amo i tā ratou mau hōpoi’a ’ia māmā ’e ’ia tāmāhanahanahia. ’Ua hōro’ahia ia ’outou te mana nō te tauturu i te Fatu ’ia ha’amāmā i te feiā tei teimaha i te taime ’a fāri’i ai ’outou i te hōro’a o te Vārua Maitai ».2
« E fa’a’ohipa tātou i te māramarama o te ’evanelia nō te hi’o ia vetahi ’ē mai tā te Fa’aora e hi’o—ma te here, te ti’aturi ’e te aroha », te parau ïa a Jean B. Bingham, te peresideni rahi o te Sōtaiete Tauturu. « Tē vai ra te mahana e roa’a ai ia tātou te ’ite hope i te ’ā’au o vetahi ’ē ’e e ’oa’oa ai tātou ’ia fa’a’itehia mai te aroha ia tātou nei—mai ia tātou ho’i e fa’a’ite i te mau mana’o ’e te mau parau aroha ia vetahi ’ē…
« E hōpoi’a ’e e ha’amaita’ira’a nā tātou ’ia fa’atupu i te maita’i i roto i te ta’ata tāta’itahi ’a rohi ai tātou ’ia rahi atu te rirora’a mai tō tātou Fa’aora ».3
’Ia amo ana’e tātou i te hōpoi’a a te tahi ’e te tahi ’e ’ia ha’apa’o ho’i tātou i tā tātou mau fafaura’a, tē ’īriti nei ïa tātou i te ’ē’a nō Iesu Mesia nō te ha’amaita’i ia vetahi ’ē. ’Ua ha’api’i Elder Jeffrey R. Holland nō te pupu nō te Tino ’Ahuru Ma Piti ’āpōsetolo : « Nō te ho’o fāito ’ore o te Fa’atasaurora’a ’e te Tāra’ehara, tē fafau atu nei au ia ’outou e’ita ’oia e huri mai i tōna tua ia tātou. ’Ia parau ana’e ’oia i te feiā ’o tei ha’eha’a te ’ā’au ē : ‘’A haere mai iā’u nei’, tē parau ra ïa ’oia ē, ’ua ’ite ’oia i te ’ē’a nō te haere i rāpae, ’e ’ua ’ite ’oia i te ’ē’a nō te haere i ni’a. ’Ua ’ite ’oia i te reira nō te mea ’ua haere ’oia nā reira. ’Ua ’ite ’oia i taua ’ē’a ra nō te mea ’o ’oia iho te ’ē’a.4
Te tahi atu mau pāpa’ira’a mo’a
© 2017 nā Intellectual Reserve, Inc. Fatura’a pāruruhia. Nene’ihia i Marite. Parau fa’ati’a nō te reo peretāne : 6/16. Parau fa’ati’a nō te ’īritira’a : 6/16. ’Īritira’a nō Visiting Teaching Message, December 2017. Tahitian. 97932 895