Pād wōt Ippān Jabdewōt Iien, Jabdewōt Jikin, Jabdewōt Wāween

N̄an “kwaļo̧k” ej n̄an leļo̧k jerbal in jipan̄, kea, ak leļo̧k jipan̄ ko n̄an kaenōm̧m̧an ak kam̧ōņōņōik ro jet. Jerbal in loļo̧k ko an kōrā ej n̄an pukot wāween kilen kwaļo̧k n̄an ro jej loļo̧k er. Jisōs Kraist eaar kwaļo̧k n̄an aolep—jabdewōt iien im jabdewōt jikin. Eaar naajdik 5,000, kar kaenōm̧m̧an Meri im Marta ilo mej eo an ļeo jeier, im kar kwaļo̧k gospel eo An n̄an kōrā eo ilo aebōj laļ eo. Eaar kōm̧m̧ane kōnke Eaar obrak kōn iakwe.

N̄an ļoor waanjon̄ok eo An, āinwōt rūkaki in loļo̧k ro an kōrā ro jemaron̄ in jeļā im iakwe sister ro jej loļo̧k er, keememej bwe iakwe ej pedped eo an aolep men otemjej jej kōm̧m̧ane. N̄e jej jar n̄an im̧we n̄an jeļā kilen jerbal ippān im jipan̄ er kōkajoorļo̧k tōmak eo an, “enjeļ ro repan ilo̧k jān [ad] iaiio̧.”¹

Jān ejaak eo an Doulul eo an Kōrā ro ilo 1842 n̄an rainin, jerbal in kwaļo̧k eo an kōrā ro ekar kōjeraam̧m̧an mour ko. N̄an waanjon̄ok, Joan Johnson, juon eo emej pāleen 82 an iiō, im eo m̧ōttan ilo jerbal in loļo̧k ko an kōrā kar loļo̧k ro riturier eo 89 an iiō im ewōr nan̄inmej in pneumonia ippān. Raar loe ke eo riturier ekar jab kōņaan bwe ren etal juon alen ilo juon allōn̄, kōn menin raar jino mije ļo̧k e kajjojo wiik ilo loļo̧k ak ilo taļboon.

N̄an rūkaki in loļo̧k ro jet an kōrā ro, jilkintok juon ennaan ilo taļboon ak ilo email kōn naan in rōjan̄ me emaron̄ in men eo em̧m̧antata n̄an kōm̧m̧ane n̄an juon sister ilo allōn̄ in. Kōm̧m̧ani jem̧jerā ko an juon make im ron̄jake ilo juon mejatoto in iakwe eo eaorōk n̄an jerbal in loļo̧k an kōrā ro. Kapāāl ko raan kein im iien jelm̧ae ilo iien loļo̧k ko rejipan̄ kōj n̄an kōm̧m̧ani jabdewōt iien, jabdewōt jikin, im ilo elōn̄ wāween ko.² Kwaļo̧k āinwōt an Jisōs kar kwaļo̧k.