O Le Auala e Fesoasoani Atu Ai le Inisitituti ia te Oe e Aoaoina le Talalelei
Faataitai auala nei e tolu ina ia tele ni mea e te aoaoina mai au vasega inisitituti o mataupu faalelotu.
“Ua sili atu ona faigata le lalolagi i ona po nei nai lo … tausaga talu ai,” na saunoa ai Elder M. Russell Ballard o le Korama a Aposetolo e Toasefululua. “Ua tele atu mea faalavefau ua faasalaveia ai o tatou alii talavou ma tamaitai talavou mai a latou sauniuniga mo se misiona ma se olaga fiafia i le lumanai.” I le taimi nei, ua sili atu nai lo se isi lava taimi muamua, e manaomia ona tatou aoao “pe faapefea ona faalogo ma tali atu i musumusuga a le Agaga Paia.”1
Ina ia fesoasoani ia te oe ina ia ogatusa atili faaleagaga, ua saunia e le Ekalesia inisitituti o mataupu faalelotu. E mafai ona tuuina atu ia te oe e le inisitituti ni “aafiaga anoa i le afioga a le Atua.”2
Pe a e auai i le inisitituti, e mafai ona e filifili mai le tele o vasega. O faiaoga o e malamalama i manaoga ma fesili a talavou matutua o le a fesoasoani atu ia te oe e aoao mai tusitusiga paia ma aoaoga a perofeta o aso e gata ai.
O se suiga talu ai i inisitituti ua tuuina atu ai nei ia te oe se avanoa e faaaoga ai (1) api talaaga o suesuega o le kosi, (2) fesili o le kosi, ma le (3) galuega faatino mo le aoaoina patino ina ia siitia ai lou aoaoina ma faamalosia lou faatuatua ia Iesu Keriso. O nei filifiliga e tolu mo suesuega o le a fesoasoani ia te oe e faapatino ai lau suesuega i le talalelei ma aoao atu ai i le auala e galue ai le Agaga ma oe.
Api Talaaga mo le Suesueina o le Kosi
Na fautuaina mai e Elder Richard G. Scott (1928–2015) o le Korama a Aposetolo e Toasefululua le faamaumauina o uunaiga faaleagaga i totounu o se api talaaga: “Tusi i lalo i se mea malu ia mea taua e te aoaoina mai le Agaga. O le a e iloaina a o e tusia musumusuga taua, e masani ona tele isi musumusuga e oo mai.”3
E faaaoga e tagata aoga se api talaaga (po o se pepa po o se polokalama o le Potutusi o le Talalelei) i le vasega ma le fale e faamaumau ai uunaiga a o latou suesue i tusitusiga paia. O Jayme Dhennz, o se tagata aoga a le inisitituti i Filipaina, na vaai i faamanuiaga o le tausia o se api talaaga mo suesuega: “E le mafai ona ou le tusiaina ni fuaitau ma savali mai tusitusiga paia po o saunoaga a perofeta aua e faalautele ai lo’u aoaoina o le talalelei.”
O tagata aoga inisitituti a Brother Seiichi Takahashi i Nakoia, Iapani, e fiafia i le faamaumauina aua e faatagaina ai le “faagasologa o le aoaoina ia sologa lelei” ma fesoasoani i tagata aooga ia o mai saunia i le vasega e aoao ma auai.
O Taisia Bartolomeo o Italia i saute na fai mai, “O le tusiaina o mea sa ou aoaoina, ua mafai atili ai ona ou toe manatua ia mataupu pe a ou manaomiaina.” O lana uo aoga, o Mariaterasa Santoro, na faaopoopo mai, “O la’u api talaaga o se mea e mafai ona ou tilotilo i ai e toe manatua ai se mataupu faaleagaga patino po o se faaaliga faaletagata lava ia.”
Fesili o le Kosi
O fesili o loo tuuina atu i le amataga o le kosi e avatua i tagata aooga ni autu e mafaufau loloto i ai ma suesue i le aluga o le kosi. I le faaiuga, e auina atu e tagata aooga a latou lava tali na taialaina e le Agaga i le latou faiaoga.
O Ilaria Bellomo, o se tagata aoga i saute Italia, na faamalamalama mai, “O fesili na ou tomanatu ai i lo’u olaga ma le manatu faapea o mea o loo ou suesueina i le inisitituti e fesoasoani ia te au ia ou iloa atili Iesu Keriso.”
O Jinseop Jeong, o se tagata aoga inisitituti i Korea, lea na fai mai, “O fesili na fesoasoani ia te au ia mafaufau loloto i ai ma toe iloilo mea sa ou aoaoina. O se taimi taua tele e toe iloilo ai, manatunatu loloto, ma faaaoga mea sa ou aoaoina.”
O le tuputupu ae faaleagaga a tagata aooga na faamaonia mai i a latou tali. O Sister Seonsim Kang, o se faiaoga inisitituti i Korea na fai mai, “O se aafiaga maoae mo au le faitau ma aoao i molimau ma manatu a tagata aooga.”
Galuega Faatino o le Aoaoina Faaletagata Lava Ia
O le toatele o tagata aooga inisitituti e filifili ma le agaga tatalo e faia se galuega faatino anoa. E fuafua lava i mea latou te fiafia i ai, ua fatuina e tagata aooga i le lalolagi atoa se faatufugaga e faatatau i le talalelei, musika, vitio, ma faaupuga e tuu i luga o ala faasalalauga faaagafesootai. O nei galuega faatino e valaauliaina tagata aooga ia galulue i mea sa latou aoaoina i le vasega. Mo se faataitaiga, o se tasi o tagata aoga sa filifili e vali se ata o le Faaola e o faatasi ma le kosi “O Iesu Keriso ma le Talalelei e Faavavau.”
O se tasi o tagata aoga o loo auai i le vasega o le “Aiga e Faavavau” sa faia se galuega faatino o talafaasolopito o le malumalu ma aiga lea na “taunuu i se malaga o le malumalu ma lo’u tinamatua ma tagata o lou aiga ia na matou faamaeaina le silia ma le 40 faamauga o le malumalu lea na saunia i le gasologa o le semesa. O lenei mea na aumaia faalatalata lo matou aiga.”
E pei ona faailoa mai e Cenia Avila Organis, o se tagata aoga inisitituti i Bicol, Filipaina, o le galue ai i se galue faatino a le tagata lava ia mo le aoaoina e “aumaia ai le fetuutuunai,” tuuina atu i tagata aooga le saolotoga e aoao ai i le afioga a le Atua ma lagona le Agaga i le faaaogaina o a latou lava taleni.
Taunuuga ua Siitiaina
O le faaaogaina o nei faiga po o metotia mo le aoaoina e mafai ona faaleleia ai lau suesueina o le talalelei ma faaloloto ai lau molimau. O le filiga i le suesueina o le talalelei e ala i kosi po o vasega o le inisitituti, o le a e malamalama atili ai i le ala e faaagoa ai le afioga a le Atua i lou lava olaga ma le ala e faamanuia ai olaga o isi.