Kam blong Save Sista Ia mo Famli blong Hem

Fet, Famli, Help

Rita Jeppeson mo visiting tija blong hem oli kam gudfala fren taem tufala i bin save visitim tufala mo serem ol prinsipol blong gospel. Be taem tufala i visit, tufala i stap plei ol gem blong yusum toktok. Hemia i wanem Rita i laekem tumas abaot visiting tija blong hem from se tufala i fren gud, mo visit ia i no blong tikim sam samting long wan lis we oli raetemdaon. I gat plante samting we ol sista oli stap mekem long taem blong wan visit, olsem blong wokbaot tugeta, o pulum rabis gras long garen taem ol pikinini oli stap pleiplei.

Elda Jeffrey R. Holland blong Kworom blong Olgeta Twelef Aposol i talem se, “Yufala i mas luk yufala bakegen olsem ol mesenja we Lod i sendem yufala i go long ol pikinini blong Hem. … Mifala i hop se bambae yufala i statem wan jeneresen blong memba we oli tru blong stap lukluk long gospel, we oli lukaotgud mo kea gud long olgeta wanwan, oli lukluk ol nid long saed blong spirit mo long saed blong laef long eni wei we oli save mekem.”¹

Lod, tru long Moses i givim komanmen long ol pikinini blong Isrel se strenja we i stap long medel blong olgeta bae wan dei i bon long medel blong olgeta, mo bambae oli mas lavem strenja ia olsem we oli lavlavem olgetawan bakegen (luk long Levitikas 19:34). Olgeta sista we yumi stap visitim, maet oli olsem ol strenja taem yumi stap statem seves blong yumi, be taem yumi kam blong save hem mo famli blong hem, bambae yumi wantem moa blong “karem ol hevi samting blong wan wan long [yumi], blong mekem se oli nomo hevi, mo “hat blong [yumi] oli joen tugeta blong kam wan long lav, long wanwan long [yumi].” (Mosaea 18:8, 21).

Reyna I. Aburto, Seken Kaonsela long Rilif Sosaeti Jeneral Presidensi, i tingbaot se hem i jes divos, mo hem i wan niu memba blong Jos. Hem i talem: “Mo ol visiting tija blong mi oli kam long haos blong mi, mo oli tekem wan gud filing i kam se mi mi pat blong wan grup, mo oli putum lav long hat blong mi.”²