Kilai koya kei na nona matavuvale

Vakabauta, Matavuvale, Veivukei

Ko Rita Jeppeson kei na nona dauveisiko erau sa veitokani vinaka sara ena nodrau dau sota ka veiwasei ena veivakavuvuli ni kosipeli. Ia na nodrau dau sota e dau mai oka talega kina nodrau dau qito tuva vosa vata. Oqo na ka e dau taleitaka o Rita me baleta nona dauveisiko ka ni kila ni rau veitokani ia na veisiko oya e sega ni “toqai walega” ena lisi. E vuqa na ka e rawa ni caka ni ra sota na veitacini yalewa, me vaka na taubale vata se na cavu co ena iteitei ni ra qito tiko na gone.

E a kaya o Elder Jeffrey R. Holland mai na Kuoramu ni iApositolo Le Tinikarua, “Raici iko ni o nona mata na Turaga ki vei ira Nona isolisoli. … Keitou nuitaka … ni ko ni na tauyavutaka e dua na itabagauna ni kauwai dina sara yavutaki ena kosipeli ena vukudra na lewenilotu, veiyadravi veikauwaitaki, walia na leqa vakayalo kei na leqa vakayago ena sala cava ga e veivukei.”¹

E a vakaroti ira na Isireli na Turaga ena gusu i Mosese ka kaya “na kai tani sa tiko vulagi kei kemudou ena tautauvata vei kemudou kei na dua na kai nomudou, ia mo lomani koya me vaka ko sa lomani iko” (Vunau ni Soro 19:34). O ira na tacida yalewa eda vakatavulica era rairai “kai tani” ena itekivu ni noda veiqaravi, ia ni da kilai ira mai kei na nodra vuvale, na noda gagadre ena tubu meda “veivuketaka na nomudou icolacola me mamada kina” ia “me ra duavata sara ka veilomani” (Mosaia 18:8, 21).

O Reyna I. Aburto, na iKarua ni Dainivakasala ena Mataveiliutaki Raraba ni Soqosoqo ni Veivukei, e nanuma ni a se qai sere ga ka lewena vou na lotu. “O rau na noqu dauveisiko ena nodrau lako mai ki neitou vale,” e a kaya, “erau kauta mai na vakilai ni sema kei na loloma ki lomaqu.”²