Bo Modengelii ma Telungalek er Ngii

Klaumerang, Telungalek, Ngeseu

A Rita Jeppeson ma kldemel ra odingel e olisechakl a kmal mla mo ungil sechelei sel le kaiuedingel e losaod osischakl ra ebangkelio. Ng di odingel er tir a uldimukl er ngii a kuk di klekool. A Rita kmal soal tiang ra ngkal loldingel e olisechakl er ngii leng medengei el uase te sechelei e tial odingel a di kirel “kedmekill el tekoi.” Ng betok el tekoi a sebechir a rodos el meruul sel loldingel, sebechir el di mererorael malechub e te omadel a chudel ra sers e a rengalek a kausekool.

A Elder Jeffrey R. Holland ra Chelechad ra Teruich ma terung el Apostol a dilu el kmo, “Momes er kau el oderchelel a Rubak el mora Rengelekel . … Aki oureng … me mkedmeklii a ungil teletael, lultuil ra ebangkelio el kirir a rechedal a ikelesia, lomes e omekerreu ra tang ma tang, lomes a usbechellel a tekoi ra klechad ma reng ra ngii di el teletael ra ngesou.”¹

A Rubak lokiu a Moses a dilu ra rengalek ra Israel el kmo a “ngii di el chad el kiei lobengkemiu a di mo uaia le ta er kemiu el milechell lobengkemiu, e komo oubeltik el reng el mo er [ngii]” (Leviticus 19:34). A rodos el doldingel er tir a locha “ngodech el chad” sel domuchel ra omesiunged, ng di sel dorael el mo medengelii ma telungalek er ngii, e a blak el reng er kid a mo mesisiich el mo “mesebechakl ra ta ma tang, me bol kebekakl” me a “rengud a mo tang el ngara beltik el reng el mora tang ma tang” (Mosiah 18:8, 21).

A Reyna I. Aburto, Ongerung el Counselor ra Cheldellel Omerredel ra Relief Society, a lotkii a taem el dirk blol merek el bechiil el beches el chedal a Ikelesia. “A roldingel e olisechakl er ngak a mlei ra blik,” ngii a millekoi, “e milskak a mekekeald el reng ma beltik el reng ra renguk.”²