Fa’aineinera’a nō te fa’aro’o i te reo o te Atua

’Ua fa’ata’a mai te peresideni Uchtdorf e aha te ’ohipa mātāmua tā te Atua i rave i muri a’e i te hāmanira’a i te tāne ’e te vahine o te paraparaura’a ïa ia rāua ’e ’ua hōro’a ’oia i te ha’amāramaramara’a ’e te arata’ira’a faufa’a roa ia rāua. E fāri’i ā tātou i taua ha’amaita’ira’a ra, i te ’āva’e nō ’ēperēra ’e i te ’āva’e nō ’ātopa, i roto i te ’āmuira’a rahi, i te taime e paraparau mai ai te mau feiā fa’atere o te ’Ēkālesia ia tātou ’e e hōro’a mai ai i te a’o ia tātou i te mea tā te Fatu e hina’aro ra ’ia fa’aro’o tātou.

’Ua fa’aro’o a’ena ānei ’outou i te reo o te Atua nā roto i tāna mau tāvini i te ’āmuira’a rahi ? ’Ua fāri’i a’ena ānei ’outou i te hō’ē parau poro’i ta’a ’ē, ’o tei hōro’a mai i te hō’ē pāhonora’a o tā ’outou i mā’imi noa na ? I roto i te hō’ē buka ’ā’amu, e nehenehe ’outou e pāpa’i i te reira ’itera’a ’e nāhea te ’ohipa i tupu i te tauturura’a ia ’outou. Nō reira ’a fa’aineine nō te fa’aro’o i te reo o te Fatu i teie ’āmuira’a e haere mai nei ma te pāpa’i i te mau uira’a tā ’outou e vai ra, ’e i te tuatāpapara’a i teie mau uira’a i roto i tā ’outou tai’ora’a i te pāpa’ira’a mo’a. ’A pure i te Metua i te Ao ra ma te ani ’ia fāri’i i te mau pāhonora’a ’e i te mau mana’o i te ’āmuira’a. ’A fa’aro’o ai ’outou i te mau tāvini a te Fatu, ’a tūtonu i ni’a i te mau fa’aurura’a tāta’itahi… E aha tā ’outou i ’apo mai ? Nāhea ’outou i te fa’aurura’ahia ’ia taui ? ’A pāpa’i i teie mau fa’aurura’a nō te mea nā te Vārua e paraparau ra ia ’outou !

’A ha’amana’o tāmau noa ē ’ua here te Metua i te Ao ra ia ’outou ’e e arata’i ’oia ia ’outou nā te ’ē’a ’āfaro. ’A tītau ai ’outou i te fa’aro’o i tōna reo nā roto mai i tōna mau tāvini, e ha’amaita’ihia ’outou ’e e ha’apūaihia ’outou.