Pweng sin Prestuhnsi Se Met, Eprel 2018
Ke Kuht Tuhkweni Fahsr Na Met
Sel Prestuhn Russell M. Nelson
Tamuhlwel ac tahmtahel sacohk, nga engan in wi kowos ke lututacng se inge. Lwen ahkosr somlah ah kuht fihliyac sie mwet luhlahp, mwet pahluh se luhn God—Prestuhn Thomas S. Monson. Wacngihn kahs kuh in oruh nuhnuhnkweyuck nuh ke yohk srihpaciyacn ac wolacnaiyacn moul lal. Nga fah sruikihn ma pahtpaht kawuck lasr ke kuhlwacng ke ma el lutiyucme. Inge kuht enenuh in ngwetoht na met nuh ke pacl fahsruh uh ke luhlahlfongi kuh lasr kacl Jisus Kraist, suc la Alu se inge.
Lwen luo somlah ah Mwet Sap nuh kwewa tuhkweni ke infuckihl se lucng ke Salt Lake Tempuhl. Elos oraclah sulwaclah na tiac etweyuck se we, ma se met, in sifil akiyac Prestuhnsi Se Met inge ac, ma se ahk luo, tuh nga in kuhlwacnsap ekihn Prestuhn luhn Alu uh. Srihklac kahs in ahkuhtweyac nuh sum lah puhla fuhkah se ke srihsrngiyucki ac fihliyucki nga in ekihn Prestuhn ke Alu uh sin poun Tamuhlwel wiyuck—Tamuhlwel suc sruok nohfohn ki luhn pristut suc fohlohkihnyuckyang sel Mwet Pahluh Joseph Smith ke we—se inge. Ohiyac na muhtahl ac mongfihsracsr se pa inge.
Tohkohyang ma kunuck in srwelah lah suc Leum El ahkolah in ekihn mwet sropo luhk. Nga ac sulwaclah fuhkah Mwet Singucul Luo yacna sahyacn Mwet Sap, kais sie suc nga luhngse yohk? Nga srui kaksyak yohk nuh sin Leum ke topukyacn pruhe kaifwe luhk. Nga arulacna kulohkihn lah Prestuhn Dallin Harris Oaks ac Prestuhn Henry Bennion Eyring kwewana luhngse in wiyuc kuhlwacnsap ekihn Mwet Kahsruh Se Met ac Ahk Luo, ahkfuhlwactye. Prestuhn Dieter F. Uchtdorf el srackna muhta ke acn se lal ke U luhn Mwet Sap Singucul Luo ah. El eis tari kunohkohn yohk suc el arulacna fal nuh kac.
Nga ahkfuhlwactyacl ac Prestuhn Eyring ke kuhlwacnsap yohk lalos ekihn mwet kahsruh nuh sel Prestuhn Monson. Elos arulacna kuh in mukwikwi, moniyuck, ac ahkkweyeyuck. Kuht arulacna tarilac selos. Kais sie selos luhngse in kuhlwacnsap inge yac elos arulacna enenweyuck yohk.
Ke Mwet Sap se ahkluo ke wal fuhlwact, Prestuhn Oaks el oacyacpac ekihn Prestuhn ke U luhn Mwet Sap Singucul Luo. Tuhsruhk, pahng lal nuh ke Prestuhnsi Se Met ac tahfwelah ke tahklac luhn Alu uh, Prestuhn M. Russell Ballard, tukun wal fuhlwact, fah kuhlwacnsap ekihn Aholyacn Prestuhn ke u sacn. Prestuhnsi Se Met fah orekma ke kuhiyacn paholos wi Mwet Singucul Luo ah in otwelah luhngse luhn Leum ac tahpuhk orekma muhtahl Lal na met.
Kuht kuloh ke pruhe lowos. Elos eisyuckyang nuh fin facluh nuh sesr. Ke lututwacng se tukun wacngihnlac lal Prestuhn Monson, oasr sie pruhe suc oreklac sin tuhlihk mukul yac-ahkosr se inel pa Benson. Nga fahk ke lwacta se sihmlac sin ninac kiyacl nuh sin muhtwacn kiyuck, Wendy. Benson el pruhe, “Pahpah Inkuhsrao, kuloh nuh sum ke Prestuhn Thomas S. Monson el kuh in sifil liye muhtwacn kiyacl. Kuloh nuh sum ke mwet pahluh sasuc lasr. Kahsrwel tuh elacn puhlaik ac tiac sahngweng ke ma sasuc. Kahsrwel elacn kapkapwack in kuh in mahno ac fokoko. Kahsrwel tuh in oasr kuh sel mweyen el sruok pristut. Ac kahsrwe kuht in kwacna wo.”
Nga kuloh nuh sin God ke kain in tuhlihk se ac pahpah ninac kiyacl suc lihksreni lohacng nuh ke kihsackuhnlah laltahl nuh sel in suwohs, srihpen kaiyuck lalos—nuh sin ninac pahpah nuh kwewa, mwet luti, ac mempucr suc us ma toasr ac kena la in kuhlwacnsap tari. Nuh ke kahs sahyac an, tuh kais sie suwos, nga pa mongfihsracsr kuhlwacng emet uh.
Leum El Oasr ke Acn in Kol
Ke kuht tuhkweni fahsr na met, nga suli kom in nuhnkuh ke ohiyac wolacna suc Leum El karihngihn Alu Lal. Ke Prestuhn se ke Alu uh wacngihnlac, wacngihn ma lukmac kac lah suc ac pahng in kuhlwacnsapuh tohkohyang ke kuh sacn. Wacngihn orekmakihnyacn sahrom, wacngihn eyeinse, tuh orekma mihs muhkwena ke oreklac luhn plwacn wolacna, pa Leum Sifacna pa ac akiyac mwet se nuh ke acn sacn uh.
Kuhlwacnsap luhn kais sie Mwet Sap pa lwen in lotwelah ac ahkolah nuh ke ma kunac puhkantwen ke pacl fahsruh uh. Mwet Sap se kuh in kuhlwacnsap sun puhlan pacl se in kihluckyak liki siah srihsrihk se met an nuh ke siah fuhlwact se ke raun se. Ke pacl sacn, el eis tari etwack se met lal ke kais sie ip ke orekma ke Alu uh. El oacyacpac sun in ahkohnohki wowo nuh sin mwet fin facluh, weacng ma mahtuh lalos, facsin, kahs oacna ke orekma lal oruh elacn kalweni raunweack facluh. Kuh luhn kapwack ke kolyacn Alu uh usrnguck. Nga etuh lah wacngihn sie oacna. Ma sacn tiac kuh in ahklutye kuht, mweyen pa inge Alu luhn Leum. El tiacna orekma tukun ohiyac luhn mwet uh.
Nga tuh kuhlwacnsap ke U luhn Mwet Sap Singucul Luo ye Prestuhn limekohsr met ke Alu uh. Nga tuh liye kais sie Prestuhn eis fwackyuck ac top lalos nuh ke fwackyuck sacn. Leum El ac pacl nuh kwewa fah luti ac ahkkweye mwet pahluh Lal. Leum El oasr ke acn in kol. Kuht suc akmuhsralah tari in witnisi ine muhtahl Lal fin facluh nohfohn fah tahfwelah in suk in etuh luhngse Lal ac ukwe.
Muhtana ke Inkacnek
Inge, nuh sin kais sie mempucr ke Alu uh nga fahk, sruk-yac na inkacnek in olwelah. Kihsackuhnlah lom in ukwe Mwet Lahngo pa in oraclah olwelah lom nuh sel ac na kom srukyacna olwelah ingacn in fah ikucslah sruhngucl nuh ke mwe ahkinsewowo luhn nguhn nuh kwewa ac sukohsohk ikacklah nuh sin mukul, muhtwacn, ac tuhlihk nuh kwewa ke acn nuh kwewa.
Ekihn Prestuhnsi sasuc se, kuht ke muhtwacwacack ke sahflahiyacn nuhnak uh. Ke srihpac se, kuht sramsram nuh sum mihsenge ke tempuhl. Sahflah se suc tuh kuht kais sie kwacfweacng in olwelah ke kuh lun lohm sin Leum, sil ekihn sucu, luhlahlfongi nuh ke olwelah oreklac lun tempuhl ma ahkoekuhtlac nuh ke mwe sang yohk luhn God—suc pa moul ma pahtpaht. Akwuck luhn tempuhl ac olwelah kom oraclah oasr ki in ahkkweye moul lom, pahyuck ac sucu lom, ac kuh lom in lain ma koluk. Ahkfuhlwact lom lun tempuhl ac kuhlwacnsap lom we kacn mwet mahtuh lom fah ahkinsewowoye kom ahkyohkyelihk fwackyuck lom sifacna ac mihs ac fah ahkkapye orekma lom in muhtana ke inkacnek in olwelah.
Inge, fin kom sraklah falkom liki inkacnek, lwelah ngacn suli kom ke finsrak nuh kwewa lun insiyuck kom in nuhnak muhnahs fohlohkoh. Lah mac ngac siyuck lom, mac lain kom, oasr acn se ahkoeyucklac nuh sum, Alu sin Leum. Kom ac fihl se sonna isuslac fah ahkinsewowoyeyuck ke ohiyom inge kom in fohlohk nuh ke inkacnek in olwelah. Pahpah tuhmasr Inkuhsrao sruikihn tuhlihk Nahtuhl, ac El kena kais sie sesr in fohlohk nuh lohm Sel nuh Yohrohl. Pa inge finsrak yohk luhn Alu luhn Jisus Kraist luhn Mwet Luhlahlfongi ke Lwen Sahflah—in kahsruh kais sie sesr in fohlohk nuh lohm sesr.
Nga ahkkahlwemye luhngse loal luhk nuh sum—luhngse suc yohkwelihk puhlan pacl loes se in ohsun sum, wi kom ahkfuhlwactye, ac kuhlwacnsapwe kom. Lwelah wolacna lasr pa in som nuh ke muhtuhnfacl nuh kwewa, kain nuh kwewa, kahs, ac mwet, kahsruh in ahkolah facluh nuh ke Tuhkuh Ahkluo luhn Leum. Ohinge kuht fah oruh ke luhlahlfongi kacn Leum Jisus Kraist, etuh lah El pa kol uh. Pa inge orekma Lal ac Alu Lal. Kuht pa mwet kuhlwacnsap Lal.
Nga ahkkahlwemye kihsackuhnlah luhk nuh sin God Pahpah Ma Pahtpaht tuhmwacsr ac Wen Nahtuhl, Jisus Kraist. Nga etuh Kacltahl, luhngse Eltahl, ac olwelah tuh ngacn kuhlwacnsap Eltahl—ac kom—ke momong nuh kwewa luhlahl luhk ke moul luhk. Ke ine muhtahl luhn Jisus Kraist, amen.
© 2018 sel Intellectual Reserve, Inc. All rights reserved. Sihmlac fin acn USA. Ahkkweyeyucklac ke kahs English: 6/17. Ahkkweyeyucklac ke lweng: 6/17. Lwenglah luhn First Presidency Message, April 2018. Kosraean. 15048 868