“Kelo̧k ilo Reba ņe!”
Elvin Jerome Laceda
Pampanga, Philippines
Kōmeļeļe jān Gary Alfonso
Juon raan bubu eaar ba bwe in bōk jet m̧ōn̄ā ekar kōpooji n̄an kōrā eo nej jinō. Eaar juon rālepān Jadede ebwiļ, im ekar bar wōr jet men ko jet ikar kōņaan kōm̧m̧ani ijelo̧kin etal in kōm̧m̧ane ta ijjitōn̄ eo an bubu. Iaar ba bwe en ba n̄an ro rilikū jet bwe ren etal, ak eaar m̧akoko bwe ekōņaan wōt n̄a.
Juon awa em̧ootļo̧k, im iaar en̄jake bwe in aikuj kōm̧m̧ane ta eo bubu eaar ba. Iaar būk m̧ōn̄ā ko im jibadōkļo̧k m̧weeo im̧ōņ kōrā eo nej jinō. Eaar ettoļo̧k, im ke ij tōkeek ļo̧k, iaar jab ļōmņak in pād wōt.
Iaar lo kōrā eo nej jinō im nin̄nin̄ eo nejin ļalem an allōn̄ ruttoin ilo am̧m̧ak eo eaar loklok ippān wōjke in m̧an̄ko eo. Wōjke ko raar pād iturin juon reba me ej to̧o̧r ilikin m̧weeo. Iaar etetalļo̧k n̄an er n̄an leļo̧k m̧ōn̄ā ko. Āliktata, to ko ilo am̧ak ko raar tum̧. Kōrā eo nej jinō im nin̄nin̄ eo nejin raar wōtļo̧k n̄an reba eo. Mijak eaar kaiļbōk eō. Iaar jab jeļā kilen aaō, im ejjeļo̧k juon n̄an jipan̄. Iaar jab jeļā ta eo n̄an kōm̧m̧ane.
Ilo m̧ōkajin, iaar ron̄ ainikien jetōb: “Kelak!”
Ilowaan wōt juon jekōn, iaar kelak. Jeram̧m̧an, iaar lo nin̄nin̄ eo ilowaan wōt jejjo̧ jekōn, im kōrā eo nej jinōe eaar maron̄ waļo̧k jen dān eo. Ke ij waļo̧k jen dān eo kōn nin̄nin̄ eo, ijjab maron̄ tōmak ta eo eaar waļo̧k. Iaar kelak n̄an reba eo men̄e iaar jab jeļā kilen aaō, ak kōn aō kar ron̄jake Jetōb eo, nin̄nin̄ eo rilikū im n̄a kar bōk lo̧mo̧o̧r im jab maļon̄.
Iaar kile ewi aorōkin n̄an kile im ron̄jake tōl im im̧we an Anij ej letok n̄an kōj kōn Jetōb Kwojarjar. Ij kam̧m̧oolol bwe iaar maron̄ in kōm̧m̧ane ta eo jibu eaar ba im kar bōk m̧ōn̄ā ko n̄an m̧weeo m̧ōn kōrā eo nej jinō. Ij jeļā jej aikuj kōm̧m̧ane kijejeto ko me rekkar n̄an im̧we ko an jetōb bwe jen maron̄ pād ilo pein Anij n̄an jipan̄ ro Nejin.