Ko e Hā, ʻUhingá, mo e Foungá: Ko ha Fakamatala Fakaikiiki ki hono Fakafoki Mai ʻo e Ongoongoleleí

ʻĪmisi

city taken up to heaven

Kuó ke ʻosi fanongo nai ʻi ha kolo kuo ʻave kotoa ki he langí? Ko e kolo ʻo Saioné—ʻa ia naʻe fokotuʻu ʻe ʻĪnoké—naʻa nau fuʻu angamāʻoniʻoni pea ʻohake ʻa e kakaí ke nau nofo mo e ʻOtuá (vakai, Mōsese 7:23).

ʻĪmisi

noahs ark

ʻOkú ke ʻilo pē fekauʻaki mo e ʻaʻake ʻa Noá. Ko ha kakai pē ʻe toko valu—ʻa ia ko e fāmili ʻo Noá—naʻa nau moʻui mei he Lōmakí he naʻa nau fanongo ki he ngaahi fakatokanga ʻa Noá (vakai, Sēnesi 7; Mōsese 8). Ka naʻá ke ʻiloʻi nai naʻá ne maʻu e lakanga fakataulaʻeikí ʻi heʻene kei taʻu 10 (vakai, T&F 107:52) pea naʻe ʻi ai ha “kakai lalahi … [naʻa] nau kumi kia Noa ke toʻo ʻene moʻuí”? (Mōsese 8:18).

ʻĪmisi

abraham

Naʻe meimei feilaulauʻi ʻa ʻĒpalahame ʻe he kau taulaʻeiki koví, ka naʻe fakahaofi ia ʻe ha ʻāngelo (vakai, ʻĒpalahame 1). Naʻá ne maʻu ha ngaahi fakahā fakaofo ʻo kau ai ha vīsone ki he moʻui ʻi he maama fakalaumālié. Ko hono hakó ʻa e kau mēmipa ʻo e Siasí, pea ʻoku tau hingoa kiate ia ʻa e fuakava faka-ʻĒpalahamé. (Vakai, ʻĒpalahame 2–5.)

ʻĪmisi

moses

Naʻe tataki ʻe Mōsese ʻa e Kau ʻIsilelí mei ʻIsipite pea tokoniʻi kinautolu ke nau maʻu ʻa e tauʻatāiná. Naʻá ne “feinga faivelenga ke fakamāʻoniʻoniʻi ʻa hono kakaí koeʻuhí ke nau lava ʻo mamata ki he fofonga ʻo e ʻOtuá; ka naʻa nau fakafefeka honau lotó ʻo ʻikai te nau malava ke kātakiʻi ʻa e nofo ʻi hono ʻaó” (T&F 84:23–24). Ko hono moʻoní, koeʻuhi ko ʻenau hē mei he moʻoní, naʻa nau hē holo ai ʻi he toafá ʻi ha ngaahi taʻu ʻe 40!

ʻĪmisi

Jesus Christ

Naʻe ʻikai ngata pē ʻi hono akoʻi ʻe Sīsū Kalaisi ʻa e ongoongoleleí mo fakahoko ha ngaahi mana lahí, ka naʻá Ne toe fokotuʻu foki Hono Siasí ʻi he māmaní. Naʻá Ne fai ha fakalelei maʻa ʻetau ngaahi angahalá pea naʻe kalusefai Ia peá Ne toetuʻu ke tau malava ai ʻo ikunaʻi ʻa e mate fakalaumālié mo fakatuʻasinó. Ko e ʻulu Ia ʻo Hono Siasí ʻi he kuongá ni pea ko Ia mo e Tamai Hēvaní ʻa e tupuʻanga ʻo e mafai lakanga fakataulaʻeikí.

ʻĪmisi

the great apostasy

Hili e Toetuʻu ʻa e Fakamoʻuí, naʻe feinga ʻa ʻEne Kau ʻAposetoló mo e kau taki kehe ʻo e Siasí ke fakamafola ʻa e ongoongoleleí, ka naʻe fakasītuʻaʻi ʻe he kakaí ʻa ʻenau ngaahi akonakí pea aʻu pē ʻo nau fakapoongi ha tokolahi ʻo e Kau ʻAposetoló. Naʻe mole ai ʻa e kakato ʻo e ongoongoleleí, koeʻuhi ko e faiangahala ʻa e kakaí. Naʻe hoko mai ha fakapoʻuli fakalaumālie ki he māmaní (vakai, ʻĪsaia 60:2).

• Ne laka hake ʻi he taʻu ʻe 1,000 ʻa e ʻikai lava ke maʻu ʻe he kakaí ʻa e ngaahi ouau ʻo e fakamoʻuí, ngaahi tāpuaki ʻo e temipalé, pe ngaahi fakahinohino ʻa ha palōfita.

• Ne mole ha ngaahi moʻoni mahuʻinga mei he Tohi Tapú.

• Ne akoʻi ha ngaahi fakakaukau loi fekauʻaki mo e natula moʻoni ʻo e ʻOtuá.

• Naʻe liliu pe akoʻi hala ha ngaahi ouau ʻo e fakamoʻuí (vakai, ʻĪsaia 24:5).

• Ne faifai pea iku ʻa e hē mei he moʻoni ko ʻení ki hono fokotuʻu ʻo ha ngaahi siasi lahi.

ʻĪmisi

reformation

Lolotonga e Hē Fakaʻaufuli mei he Moʻoní, naʻe ʻi ai ha kakai fakakaukau fakalotu ʻi ʻIulope naʻa nau fakatokangaʻi naʻe ʻikai akoʻi totonu e ongoongolelei ʻo Sīsū Kalaisí. Ko e kau fokotuʻu lotu ko ʻení naʻe ʻikai ko ha kau palōfita, ka naʻa nau fai honau lelei tahá ke akoʻi e moʻoní ʻo fakatatau ki heʻene mahino kiate kinautolú. Naʻa nau tokoni ke lava ʻo maʻu ʻe ha kakai tokolahi ange ʻa e Tohi Tapú. Naʻe feinga ha tokolahi ke maʻu e tauʻatāina fakalotú pea nau tofa ai e hala ki hono Fakafoki Mai ʻo e ongoongoleleí.

ʻĪmisi

joseph smith

ʻA ia naʻe mole kotoa nai ʻo taʻengata e kakato ʻo e ongoongoleleí? ʻIkai! Naʻe toe fakahā mai ʻe he ʻOtuá ha ngaahi moʻoni mahuʻinga kia Siosefa Sāmita. Naʻe toe fakafoki mai ʻe ha kau talafekau fakalangi ʻa e ngaahi kī kotoa ʻo e lakanga fakataulaʻeikí naʻe fie maʻú, kiate ia (vakai, T&F 27:8–13; 110; 128:18–21), ʻo hoko ai ʻeni ko e “kuonga ʻo e kakato ʻo e ngaahi kuongá” (T&F 138:48). ʻOku toe ʻiloa foki ko e kuonga fakaʻosí, koeʻuhí he ko e kuonga fakaʻosi ʻeni kimuʻa ʻi he Hāʻele ʻAnga Ua Mai ʻa Sīsū Kalaisí.