Ngkana Ko Tangirai
Te boto ni iango irouia kairake ni katoa ririki 2019 bon te wewete ni mwakuri—te kakao ae e onoti mai iroun ara tia Kamaiu. Kam a bane n rin? Ko tatangira te Uea? Ko tauraoi n toua mwin kawaina?
Ara tia Kamaiu Iesu Kristo e karaoa ibukira te bwai are ti aki kona ni karaoia i bon iroura. Ao tera are E tuangiira bwa boon mwiina? E tuangiira bwa ti na kaawakin Ana tua bwa ti aonga ni kakaabwaiaaki ao ni karekea n tai nako Tamneina bwa e na memena iroura (taraa Moronaai 4:3).
Taian tuua bon bwai n tangira n akoi. E taku te tia Kamaiu “Ngkana kam tangirai, kam na tou mwin au tua,” ma bukin tera? Ibukina bwa E TANGIRIKO! E tangiriko bwa ko na kukurei. E tangira maium bwa e na on n te kukurei ao n akea tokin bwai aika a na riki ni maium. E tangiriko bwa ko na mauri ao ni kawakinaki man buakakan te aonaaba. E tangiria ni kabwaroa te kakabwaia iaom ake a rang korakora “n te aro are kam na aki kona ni butimwaei” (3 Nibwaai 24:10). E tangiriko bwa kona oki ni maeka ma Ngaia ao ni karekei ni kabane kakabwaia are ea tia ni berita iai ma Tamara are i Karawa.
Ururinga n tai nako bwa mwaitira ana tangira Tamara are i Karawa nakoia Natina. Iai ana tangira ae e kororaoi ibukim. Ko kona ni kaota am tangira Ibukina ni kawakinan Ana tua nako. Am mwakuri aika a raraoi a na uota te kakabwaia ae bati nakoim ao nakoia ake a mena irarikim.
Ngkai bon ara burabeti, Beretitenti Russell M. Nelson, e taku: “Ti kainnanoiko bwa ko na raoniira bwa ana taanga ni buaka aika kairake te Uea. E na bon korakora te kaokoro ngkana akea ngkoe!” E kaoko bwa ko na “tei n okoro [ao] n aki katotoonga te aonaaba” n mauakina Ibukin Kakorakorakiia Kairake ao man kawakinan taian tua—n “taraaki n aron, taetae n aron, ni mwakuri n aron, ao ni kunnikainiko n aron ana reirei ni koaua Iesu Kristo” (“Hope of Israel” [taromauri n te aonaaba ni kabuta ibukiia kairake, Tuun 3, 2018], 8, HopeofIsrael.lds.org).
N am tai ni keiaki ni ongotaeka iroun te Uea ao Ana burabeti, e na kaoniko te Tamnei ae e Raoiroi n ana tangira te Uea ao ni kakoaua nakoim n aron rikim mai iroun te Atua ngkai bon naati mwaane ao aine iroun te Uea. Kakabwaia akanne a na rikirake ngkana ko keiaki n mauakina te raoiroi. Te Uea ao te burabeti a onimakiniko. A tangirii ngkami. Ti berita bwa e na rikirake te nanomwaaka, onimakinam, ao te rau ngkana ko ongotaeka ao ni kawakini taian tuua.