E tamaiti tā tāua tamaiti nā te Metua i te Ao ra

Hōho’a

mother and son

Hōho’a nō te ta’ata pāpa’i ’e tāna tamaiti

’Ua tae mai tā māua tamaiti iti, ’o Hayden, i te fenua nei, ’ua ’ere’ere roa, ’aita e aho ’e ’ua fifi nō te ora mai. ’Aita ’oia i ta’i. ’Aita i ha’uti.

I te ’itera’a vau i te mau taote ’e te mau tuati tē horo haere ra nā roto i te piha fare ma’i, ’ua ta’a ’iā’u e ’ohipa ’ino teie e tupu ra. ’Ua hōro’a ’oi’oi tā’u tāne ’e to’u metua tāne i te hō’ē ha’amaita’ira’a autahu’ara’a ia Hayden, ’e ’ua tūra’i-rū-hia ’oia i te vāhi rapa’aura’a rū. ’Aita i maoro roa ’ua ’itehia mai ē, e ma’i māfatu varavara roa. Tau mahana, te rave-ra’a-hia te mau tāpūra’a māfatu i ni’a iāna.

Nā roto i te mana semeio o te mau ha’amaita’ira’a autahu’ara’a, te ha’apaera’a mā’a ’e te mau pure, ’ua tupu te ’ohipa māere, ’ua ora mai ’o Hayden. ’Ua ’oa’oa roa ’ino māua i te fa’aho’ira’a i tā māua tamaiti i te fare ’e ’ua ha’amata atura i tō mātou orara’a ’āpī.

E ’oa’oa fāito ’ore tā Hayden i hōpoi mai i roto i tō mātou orara’a. ’Ua poihere mātou iāna ’e ’ua here ho’i iāna. ’A tere noa ai te tau, ’ua ha’amata vau i te ha’ape’ape’a ē, ’aita ’oia e haere ra i mua mai tei tīa’ihia. Noa atu ā ’ua parau mai te mau ta’ata ’aravihi ē, e haere mai te reira ’āraua’e, ’ua tāmau noa tō’u hepohepo ’a tāputo noa ai au nō te tauturu i tā’u tamaiti.

’Ua tuatāpapa māua tā’u tāne i te mau mea ato’a e roa’a ia māua nō ni’a i te ma’i o Hayden. ’Ua rave māua i te mau mea ato’a tā te mau taote i ani mai ia māua ’ia rave. ’Aita rā i haere ri’i a’e i mua.

’Ua ha’amata vau i te rohirohi ’e i te ta’ahoa. ’Ua tāparu vau i tō’u Metua i te Ra’i e tauturu mai ’ia ’ite i te hō’ē ta’ata e nehenehe e tauturu ia Hayden, ’aita rā te tauturu i tae mai. Tē ’ino noa ra Hayden. ’Ua ha’amata te hōpi’i i te tupu i ni’a iāna. ’Ua mata’u māua. ’Ua mana’o māua ē, tē fa’aru’e ra ’oia.

I te hō’ē pō, tē ’imi ra vau i te tahi mau pāhonora’a i te maorora’a pō. ’Ua pāpa’i au i te hō’ē rata ia Hayden. ’Ua parau atu vau i tō’u here iāna ’e te fifi nō’u i te tāmatara’a i te fa’a’ōhie i tōna orara’a. ’Ua parau vau iāna ē i tō’u orara’a tā’āto’a, e tāmata vau i tē noa’a mai te tauturu tītauhia nōna.

’Ua teimaha ri’i au i te ta’ahoa ’e te pāpū ’ore. ’Ua tūturi au i raro ’e ’ua ani au i tō’u Metua i te Ra’i, « Nō te aha ? » ’Ua tae mai te mana’o ē, ’ua tono mai ’oia ia Hayden nō te mea i ’ite ’oia ē, e’ita roa atu vau e fa’aea i tē tāmata i tē tauturu i ta’u tamaiti. Nō te aha pa’i ïa ’aita vau e ’ite ra i te mau pāhonora’a ? Nō te aha ïa noa atu ā te taote ’āpī, noa atu ā te rā’au ’āpī, e patu noa terā i mua. ’Aita ānei te Metua i te Ao ra i here ia Hayden ?

E’ita roa e mo’e iā’u i terā taime. I terā iho taime ’ua tauahi mai te hō’ē mana’o māhanahana ’e te here iā’u. ’Ua ō mai te mau parau i roto i tō’u ferurira’a e ’ere nō’u : « Jerlyn, e aha, tē mana’o ra ’oe ē ’ua rahi a’e tō ’oe here iāna i tō’u ? »

’Ua fa’aea noa vau. ’Ua mau roa te tau. ’Ua tahe tō’u roimata—e ’ere nō te ta’ahoa mai mua a’enei, nō te tīa’ira’a rā, te māramaramara’a ’e te here.

I taua taime ra, ’ua taui te mau mea ato’a. ’Ua marū tō’u ’ā’au. ’Ua taui tā’u uira’a. Tē māramarama nei au ē, ’ua here te Metua i te Ra’i ia Hayden ma te here hope roa. ’Ua tonohia Hayden i’ō nei i roto i te hō’ē tino e tano i tōna mau hina’aro ’e tāna mau rāve’a nō te tupu ’e nō te ha’api’i. Tē vai rā tōna iho mau ’aravihi hō’ē roa ’e te mau tāmatara’a, mai ia tātou tāta’itahi. ’Ua ha’api’i mai au ē, e mea faufa’a rahi te mau tamari’i e huma tō rātou ’e e mau tamari’i herehia e te Metua i te Ao ra ’e e misiōni ta’a ’ē tā rātou i ni’a i te fenua nei.

Tē fāri’i tāmau nei māua ta’u tāne i te mau pāhonora’a ’e te mau ha’amaita’ira’a, e tae mai rā te reira i te taime a te Fatu, ’eiaha rā tō’u iho nei. ’Ua arata’ihia māua i te mau buka ti’a, i te rāpa’aura’a ti’a, i te mau fare ha’api’ira’a ti’a ’e i te mau ’orometua ti’a nō te tauturu ia Hayden ’ia manuia i roto i teie orara’a tāhuti nei. ’Ua tūtava māua nō te ’imi i te ’ē’a tā tō tātou Metua i te Ra’i i fa’anaho nō Hayden ’eiaha rā te ’ē’a tā māua i hina’aro nōna. Tē rave nei māua i te mau mea ato’a nō te tauturu ia Hayden ’ia tae’a tōna fāito pūai hanahana ’e ’ia ora i te orara’a tā tōna Metua i te Ao ra i ’ōpua nōna. ’Ua pāpū roa mai tō māua māramaramara’a i te fa’anahora’a a te Metua i te Ao ra i teienei, ’e ’ua māramarama ho’i māua ē, nāna ’o Hayden nā mua e nā māua i muri iho.