Ang mga Sister Mangalagad, Makighimamat, ug Mopresentar

Si Sister Jean B. Bingham, Kinatibuk-ang Presidente sa Relief Society, ug Bonnie H. Cordon, Kinatibuk-ang Presidente sa Young Women, milatid og daghang makatawhanong programa sa Simbahan, sama sa limpyo nga tubig, pag-atiman sa bag-ong natawo [neonatal], ug mga pagbakuna, ug ingon man ang mga programa sa edukasyon ug literacy sa Simbahan, samtang nakighimamat sila sa mga lider sa gobyerno ug nangalagad sa mga miyembro sa Simbahan sa Ghana, Nigeria, ug Ivory Coast (Côte d’Ivoire).

“Ang katuyoan sa among pagbisita mao ang pagpakighimamat sa mga Santos, ang paghimo og pipila ka pagtudlo sa mga sister, pagpaminaw sa ilang mga hagit, mobati sa ilang mga kasingkasing, ug sa pagpahibalo kanila nga gimahal namo sila,” miingon si Sister Bingham.

Si Sister Bingham ug Sister Cordon mipahigayon og debosyonal sa mga misyonaryo sa Ghana Accra West Mission. Nakighimamat usab sila sa pipila ka miyembro sa ilang mga panimalay. Si Sister Bingham miapil sa usa ka sulay nga programa sa kahibalo sa ebanghelyo [pilot gospel literacy program], nga nagtudlo sa mga tawo unsaon sa pagbasa samtang nagtudlo kanila mahitungod sa ebanghelyo ni Jesukristo. Ug ang duha ka sister miapil sa usa ka sibya sa pagbansay sa pagpangulo nga nanukad sa Accra, nga napadangat ngadto sa sobra 100 ka kongregasyon sa West Africa; nakighimamat sa Unang Ginang sa Ghana ug sa Permanent Secretary sa Ministry of Women Affairs and Poverty Alleviation sa Gobyerno sa Estado sa Lagos sa Nigeria.

Human makighimamat sa mga sister sa Ivory Coast, miingon si Sister Cordon, “Ang ilang pagsalig ug pagsabut mahitungod sa Dios ug kon kinsa Siya ug unsay Iyang mahimo ngadto sa ilang mga kinabuhi, nakapahingangha kanako.” Miingon siya nga sa dihang naghisgot siya kabahin sa pagkaadunay templo sa Abidjan, usa ka sister mihilak sa kalipay. “Mobiya kami nga adunay panglantaw nga nakasentro sa Africa,” miingon si Sister Cordon. “Mobiya kami nga adunay bag-ong gugma alang sa mga miyembro sa Africa.”

Si Sister Joy D. Jones, Kinatibuk-ang Presidente sa Primary, mihatud og kwarta nga natigum pinaagi sa Kahayag sa Kalibutan nga kampanya ngadto sa mga buhatan sa pipila ka matinabangong organisasyon sa Manhattan, New York, USA. “Among gipasidunggan ang Manluluwas nga si Jesukristo pinaagi sa pagserbisyo,” miingon si Sister Jones, mitimaan nga nindot kaayong tan-awon ang nahitabo “samtang ang mga tawo miila sa nindot nga oportunidad sa paghatag.”

Sa Siyudad sa Salt Lake, Utah, USA, si Sister Sharon Eubank, Unang Magtatambag sa Kinatibuk-ang Kapangulohan sa Relief Society, mihatud og kwarta nga natigum pinaagi sa Kahayag sa Kalibutan nga “mga makina sa pagpanghatag” ngadto sa usa ka pundohanan og pagkaon, sa usa ka matinabangon nga organisasyon nga nagtanyag og pag-atiman sa mata sa mga bata, ug sa usa ka sentro alang sa mga milalin. Pipila lang kini sa $2.3 milyon nga natigum gikan sa mga makina sa Arizona, New York, ug Utah, USA, ug sa London, England, ug sa Manila, Philippines, ug gipasa ngadto sa matinabangon nga mga organisasyon sa tibuok kalibutan.