Nganong Wala man Mopasidaan ang Dios Kanako?
Lark Montgomery
Texas, USA
Paghulagway pinaagi ni Tim Zeltner
Ang akong bana ug ako nagpuyo sa pinuy-anan sulod sa campus sa Texas State Technical Institute sa dihang ang among duha ka kinamagulangang anak upat ug duha ka tuig ang panuigon. Mao kadto ang among unang kasinatian sa bungtod nga ilaya sa Texas, ug ganahan ko niini! Matag tingpamulak, ang sentro sa Texas mapuno sa kabulakan. Sa mga tanaman, kakahoyan, bakante nga mga umahan, sa mga daplin sa dalan, bisan asa ko motan-aw dihay daghang mga bulak nga makita.
Akong isuroy ang akong mga anak nga sakay sa stroller hapit kada adlaw. Mangita kami og bag-ong mga dapit nga suhiron, ug tugutan nako ang akong mga anak sa pagpanguha og ihalas nga mga bulak kutob sa ilang gusto. Among tapuson ang among pagsuroy agi sa kasilinganan diin ang kadaghanan sa mga balay adunay nindot pagkaatiman nga mga tanaman sa bulak.
Usa ka adlaw miliko kami og eskina sa dihang nakadiskubre mi og daghang mga papel nga nagkatag sa usa sa mga tanaman sa mga bulak. Daling nakatag sa hangin ang mga papel sa tibuok nataran. Nakahukom ko nga akong hipuson ang sagbot sa dili pa kini mosamot sa pagkatag. Namunit ko og pipila ka hakgom sa mga pahina ug gisulod kini sa akong bag alang sa diaper.
Sa akong pagtan-aw sa ubos, nakaamgo ko nga naggunit ko og pornograpiya. Nakalitan, mihangyo ko sa akong mga anak nga magpabilin diha sa stroller samtang dali nakong gipanguha ang nahabilin nga mga pahina. Naglagot ko sa dihang daklit akong nakakita sa mga butang nga dili gayud nako gustong makita. Sa akong kasingkasing, nagsugod ko sa pagreklamo, “Nganong wala man ko pasidan-i sa Dios nga moagi og laing dalan paingon sa balay?”
Dayon nakadungog ko sa dili masaypan nga tingog sa brake sa school bus. Mga usa ka dosena nga mga bata ang nanganaog gikan sa bus. Silang tanan miagi sa nataran nga napuno sa pornograpiya pipila lamang ka gutlo ang milabay.
Nianang higayuna, nausab ang akong tibuok nga panglantaw. Nasayud na ako karon nganong wala ko pasidan-i nga moagi og laing dalan. Mapasalamaton ko nga didto ko aron pamuniton kadto nga mga pahina aron kadto nga mga bata dili makakita niadtong makadaot nga mga imahe. Samtang nagpadulong na ko sa balay, nakahunahuna ko, “Unsa kaha kon dugay nga miabut ang school bus? Unsa kaha kon wala nako mahibaloi nganong anaa ako niadto nga kasinatian? Unsa ka dugay kaha nga maglagot ko sa Dios?”
Sukad nianang adlawa, ang oportunidad nga gihatag sa Ginoo kanako nga makita nganong nahitabo kadto nga kasinatian nakatabang kanako sa pagsalig nga ang Iyang kaalam ug mga katuyoan labaw pa kay sa akoa.
Usahay masayud ko nganong dunay nahitabo; usahay dili ko masayud. Apan bisan unsa pa man, nasayud ko nga kinahanglan ko nga adunay pagtuo nga ang Ginoo adunay mas dakong katuyoan nga dili nako makita sa kanunay.