Pagtudlo sa mga Tin-edyer ug sa Mas Gagmay nga mga Bata
Ang Atong Sagrado nga mga Lawas
Mga paghulagway ni David Green
Kon kita dili motudlo sa atong mga anak mahitungod sa mahangturong kaimportante sa mga lawas, ang kalibutan gusto kaayo nga mopuli ug motudlo og dili mao sa atong mga anak alang kanato.
Sa 1 Mga Taga-Corinto 6:19, si Apostol Pablo nagtudlo nga ang atong mga lawas sagrado: “Wala ba kamo masayud nga ang inyong lawas templo sa Espiritu Santo nga nagapuyo sa sulod kaninyo?” Dili kini mao ang gitudlo sa kalibutan. Hinoon, makalibug nga mga mensahe nagtuyok-tuyok libut sa atong mga anak, makapangutana ug makahimo og mga pagduha-duha.
Unsa ang perpekto nga gidak-on sa lawas?
Unsa ang sakto nga mga sinina ang sul-ubon?
Unsay akong gamitan sa akong lawas?
Ania ang pipila ka ideya sa pagtabang sa mga bata nga makapasalamat sa ilang mga lawas isip talagsaong mga instrumento alang sa kaayohan.
Ang mga Lawas mga Gasa
Ang mga lawas nagkalain-lain og mga porma, mga kolor, mga gidak-on, ug abilidad. Tingali ang labing bililhon nga mensahe nga akong masulti sa atong mga anak mao nga ang matag lawas usa ka bililhon nga panalangin. Ang pag-angkon og pisikal nga lawas usa ka importante nga bahin sa plano sa kalipay—human sa tanan, ang atong kalag gilangkuban sa atong espiritu ug sa atong lawas! (tan-awa sa Doktrina ug mga Pakigsaad 88:15). Sumala sa gitudlo ni Pablo, ang atong mga lawas mga templo alang sa Espiritu Santo.
Ang mga bata, sama sa mga hamtong, mahimong maguol unsay hitsura o giunsa sa paglihok sa ilang lawas. OK ra na. Tabangi ang mga bata nga makasabut nga bisan ang dili perpekto nga mga lawas makatugot nato nga makat-on ug motubo. Kita makapakita og ehemplo sa pagtutok sa maayong mga butang nga mahimo sa atong mga lawas imbis mabalaka pag-ayo mahitungod sa hitsura sa atong lawas o pagtandi sa atong lawas ngadto sa uban. Sa umaabut, ang matag usa nato mabanhaw, ug ang atong mga lawas “ipahiuli ngadto sa ilang tukma ug hingpit nga bayanan” (Alma 40:23).
Pag-atiman sa mga Lawas
Ang himsog nga mga kinaiya nga mapalambo sa mga bata makapanalangin kanila sa nahibilin nilang mga kinabuhi. Isip mga ginikanan, kita adunay importante nga impluwensya sa pagkaon nga ilang kan-on, sa ilang pisikal nga mga kalihokan, sa ilang mga kinaiya sa pagpanglimpyo, ug sa ubang mga paagi sa ilang pag-atiman sa ilang mga lawas. Agig dugang sa pag-awhag kanila nga magmahimsog, kita makahimo og kahimtang sa pamilya nga magpakita niining maayong mga desisyon. Kini naglakip sa dayag ug walay lipud-lipud nga mga panaghisgutan mahitungod sa sekswal nga kasuod ug unsa nga mga kausaban ang mapaabut sa ilang lawas kon sila modako na. (Alang sa tabang sa paghimo og saktong-edad sa panag-istoryahanay, lantawa sa A Parents Guide sa ChurchofJesusChrist.org.)
Pagpugong sa Pag-abuso
Subo lang, mga usa sa upat ka tawo sa tibuok kalibutan giabusohan isip mga bata.1 Kita makapaningkamot sa pagpanalipod ug mohatag og pagtugot sa atong mga anak. Kita makatudlo kanila sa pag-ingon og “dili” sa mga butang nga sila dili komportable, ug nga kon ang usa ka tawo mopasakit kanila, kinahanglan nga sila mangayo og panabang—ug magsige og pangayo hangtud nga sila luwas na. Kita makatudlo kanila sa sakto nga mga pulong alang sa mga bahin sa lawas, maghimo og luwas nga panag-istoryahanay sa emosyonal nga paagi mahitungod sa ilang mga pangutana, ug mag-awhag kanila sa pagbantay sa Espiritu. (Tan-awa sa “Pagpanalipod sa mga Bata” sa umaabut nga Oktobre 2019 Liahona.)
Adunay daghang makadaot nga mga mensahe sa media mahitungod sa mga lawas. Unsa ang gibasa, gitan-aw, ug gipaminaw sa atong mga anak? Samtang kita motudlo sa atong mga anak sa pag-ila ug paglikay sa makadaot nga media, sila mas makahimo sa pag-ila tali sa mga kamatuoran ug mga bakak. (Tan-awa sa “Growing a Healthy Technology Garden” gikan sa Abril 2017 Ensign.)
Ang Pagkamabination
Nakahimo ba kita sukad og dili mabination nga mga pamahayag mahitungod sa lawas sa usa ka tawo—lakip sa atoa? Kon mao, kita nagpakita og makadaot nga ehemplo alang sa atong gagmayng mga anak. Hinoon, kita makahimo og kinaiya sa pagpadayag og pasalamat alang sa mga butang nga mahimo sa atong mga lawas. Kita makahimo og mabination nga mga komentaryo, lakip sa pagdayeg sa mga tawo sa mga aksyon ug mga hiyas imbis sa panagway lamang.
Sa katapusan, ang ubang mga tawo motagad sa ilang mga lawas sa mga paagi nga gitudlo nga atong likayan. Samtang kita nagsulti sa atong mga anak sa pagpalayo gikan sa mga patik, pagpatusok, ug dili ligdong nga sinina, atong siguroon nga kita usab nagtudlo kanila nga magmabination. Samtang kita dili mouyon sa mga pagpili nga himoon sa mga tawo, kita kinahanglan nga motagad sa kanunay uban ang gugma ug pagtahud.